بۇل اڭگىمەنى بىرنەشە جىل بۇرىن تەمىرتاۋلىق جۋرناليست, ارعى تەگى موڭعوليا قازاعى مارقۇم امانجول اقىن ۇلىنىڭ اۋزىنان ەستىپ ەدىم. شامامەن وتكەن عاسىردىڭ 60-شى جىلدارى بولۋى كەرەك. ەل جايلاۋعا كوشىپ, ەكىاشا سايىن اياعىنان ورلەتە اقبوز ۇيلەرىن تىگىپ, باسى سوناۋ ماڭگى مۇزداقتان قۇلايتىن جىڭىشكە سۋدى جاعالاي قونىس العان. سالقىن توسكە قوي-ەشكىسىن قاپتاتىپ, جەلىگە ق ۇلىن بايلاپ جايعاسقان ەلدە ايتا قويار ەرمەك تە جوق. قاريالار توپ-توپ بولىپ قىدىرادى, قىستان قالعان سىباعالارىن جەيدى, جەلپىنتىپ اڭگىمە ايتادى. ولاردىڭ ەتەگىندە بيتتەي جابىسىپ ءبىر-ءبىر نەمەرەسى جۇرەدى. ەرەسەكتەرى قوي-قوزىنىڭ قامىمەن الەك. كەشكى ساۋىننان كەيىن اعىتقان بيەلەردى تاڭ بوزىمەن جيىپ كەلۋگە تىسقاقتى بوزبالا بولماسا بولبىرلار شىدامايدى. كەيبىر جاۋىندى كۇندەرى ساقا ايعىرلار ءۇيىردى ىقتاتا ايداپ كەتىپ, تابىلماي قينارىن قايتەسىز...
كەشكە بيەنى اعىتىپ, قوي مەن قوزىنى جامىراتىپ ەل ورىنعا وتىرعان سوڭ ءتىرى جاننىڭ ءبارى راديودان «توعىزدىڭ حابارىن» تىڭدايدى. جايلاۋداعى ەلدى سىرتقى دۇنيەمەن بايلانىستىرىپ تۇرعان وسى عانا. سىعىرايعان ماي شامىنىڭ جارىعى... توردە وتىرعان توبەدەي قارتتار... وڭ جاقتا جامباستاپ جاتقان جىگىتتەر... كەشكى ءسۇتتى قازانعا اسىپ ونىسى تاسىپ كەتپەسىن دەپ تەلمىرگەن جەڭگەلەر... جانتايىپ جاتقان اعالارىن جاستانىپ قالعىعان بالالار... ءبارى ساعات كەشكى 9-دا عالام جاڭالىعىن ايتىپ, اراسىندا ءان-كۇي تىڭداتاتىن راديوعا تەلمىرەدى.
ءبىر كۇنى راديودان قوبىزشى ىقىلاس دۇكەن ۇلى جايلى شاعىن سيۋجەت بەرىلدى. سوڭىندا جاپپاس قالامباەۆ بولۋى كەرەك قوبىزشىنىڭ «قاسقىر» كۇيىن وينادى. جۇرگىزۋشى «بۇل كۇيدى ويناعاندا يتتەر ۇرەدى» دەپ ايتىپ تا ۇلگەرگەن جوق, كۇيدىڭ ءبورى بوپ ۇليتىن ەكىنشى قايىرىمىنا كەلگەندە كۇللى اۋىلدىڭ ءيتى شۋلاپ قويا بەردى. ءتىپتى كۇيدىڭ ءۇيىرلى قاسقىردى ۇلىتاتىن تۇسىنا كەلگەندە قانشىقتار شەبەلەنىپ, كۇشىكتەردىڭ قۇمىعا قىڭسىلاعانى مەن ماڭ توبەتتەردىڭ قوراعا قاسقىر شاپقانداي ارپىلداعىنان كورسەڭىز عوي... سايدىڭ ءىشى ازان-قازان. ءتىپتى كۇي توقتاسا دا, يتتەردىڭ توقتايتىن ءتۇرى جوق. «اۋىل ءيتى الا بولسا دا, ءبورى كورسە بىرىگەدى» دەگەندەي اتا جاۋى قاسقىردىڭ ءدال قۇلاق تۇبىنەن ۇلىعانى ولاردى ۇرەيلەندىرسە كەرەك. يتتەر تاڭ اتقانشا تىنىم تاپپادى. سايدى قۇلداي قونعان ەل دە سول ءتۇنى ۇيىقتاعان جوق. كوردىڭىز بە كۇيدىڭ قۇدىرەتىن.
