بەسقاراعاي اۋدانىندا بولعانىمىزدا اۋدان باسشىلارى ەلباسىنىڭ تالابىنا وراي الماتىدان اۋىلعا, كانونەركا دەگەن جەرگە كەلىپ وندىرىسپەن شۇعىلدانىپ جاتقان ارمان ەسىمدى قوس ازاماتتىڭ تىرشىلىكتەرىمەن تانىسۋىمىزدى وتىنگەن ەدى.
بەسقاراعاي اۋدانىندا بولعانىمىزدا اۋدان باسشىلارى ەلباسىنىڭ تالابىنا وراي الماتىدان اۋىلعا, كانونەركا دەگەن جەرگە كەلىپ وندىرىسپەن شۇعىلدانىپ جاتقان ارمان ەسىمدى قوس ازاماتتىڭ تىرشىلىكتەرىمەن تانىسۋىمىزدى وتىنگەن ەدى.
ەل ماقتاعان جىگىتتى قىز جاقتاعان دەيدى حالقىمىز. بۇلاردىڭ تىرلىگىن ەل باسشىلارى قۇپ كورىپ جاتسا, ولارمەن نەگە تانىسپاسقا دەپ قايتار جولدا اتباسىن كانونەركا اۋىلىنا تىرەگەنبىز. ەكى ارماننىڭ ءبىرى جاقيانوۆ «IsunPlast» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى بولسا, ەكىنشى ارمان يمانعازين ونىڭ ءوندىرىس جونىندەگى ورىنباسارى ەكەن. قىرقىندا قامال الۋعا ۇمتىلىپ وتىرعان بۇلاردىڭ ەكەۋى دە وسى ءوڭىردىڭ ازاماتى. بۇلار وسىعان دەيىن الماتىدا ءتۇرلى كاسىپپەن اينالىسىپتى. مەكتەپتە ورىسشا وقىعانمەن قازاقشاعا دا جۇيرىك.
قازىردە بۇلار پوليەتيلەن قۇبىرلارىن شىعاراتىن جاڭا كاسىپورىندى قاتارعا قوسۋمەن اينالىسۋدا. ديامەترى 160 ميلليمەتردەن 400 ميلليمەترگە دەيىن جەتەتىن مۇنداي قۇبىرلاردىڭ توعىز ءتۇرى شىعارىلماق. بۇل قۇبىرلار سۋ, گاز, كابەل تارتۋعا پايدالانىلاتىن بولادى. جانە ولاردى اۋىستىرۋ وڭاي. ياعني ءبىر جەردەن اقاۋ شىعىپ جاتسا, قۇبىردىڭ ءبارىن اۋىستىرىپ جاتپايسىڭ.
جاڭا كاسىپورىن تولىق كۇشىنە ەنگەندە, ياعني ەكى اۋىسىمدا ىسكە قوسىلعاندا جالپى سالماعى ايىنا ەكى ءجۇز توننادان استام, ال جىلىنا ءۇش مىڭ تونناعا جۋىق قۇبىر شىعاراتىن بولادى. باس ديرەكتور مۇنداي كاسىپورىننىڭ اۋداندا جوق ەكەندىگىن, سەمەيدە دە بىرەۋ عانا ەكەندىگىن, جالپى ەلىمىز بويىنشا پوليەتيلەن قۇبىرلارىنا دەگەن قاجەتتىلىك 70 پايىزعا عانا ورىندالىپ وتىرعانىن, سوندىقتان اماندىق بولسا وزدەرىنىڭ ونىمدەرىنە دەگەن سۇرانىس كوپ بولاتىندىعىن ايتقان. سوعان وراي بۇلار ءوز ونىمدەرىن شىعىس قازاقستانمەن بىرگە, كورشىلەس پاۆلودار جانە قاراعاندى وبلىستارىنا, سونىمەن بىرگە, رەسەيدىڭ التاي ولكەسى مەن ءنوۆوسىبىر ايماعىنا جونەلتەتىندەرىن مالىمدەگەن. ەلباسى ايتقانداي, ءوز ونىمدەرىن شەتكە شىعارۋ ۋاقىت تالابى, كەدەن وداعى تالابى.
ءبىز دە قاراپ تۇرماي باس ديرەكتورعا سوندا سىزدەردى وسىنداي قۇبىر شىعارۋ تۋرالى ويعا نە جەتەلەدى دەيمىز عوي باياعى. بىرىنشىدەن, ەلباسى بىزگە, جاستارعا اۋىلعا بارىپ, ەلگە پايدالارىڭدى تيگىزىڭدەر, دەدى ەمەس پە دەيدى ارمان. سونان سوڭ, ەكىنشىدەن, ەلىمىزدە قولعا الىنىپ وتىرعان «اق بۇلاق» باعدارلاماسىمەن جەتە تانىسقان سوڭ, وسىنداي ويعا كەلدىك. تەگىندە ەسكى سۇرلەۋمەن جۇرە بەرگەنشە, تىڭ جول ىزدەگەن جاقسى. ال ونى ءبىز, جاستار ىزدەستىرمەسەك, كىم ىزدەستىرەدى؟
ارمان سولاي دەگەنمەن, اۋەلدە بۇل شىركىندى باستاۋ قيىن دەمەكشى, تىڭ جۇمىستى قولعا الۋ وڭايعا تۇسپەپتى. بۇلار سوڭعى جيىرما جىل بويى قاڭىراپ بوس تۇرعان سوۆحوز كەڭسەسىن ساتىپ الادى. ونىڭ عيمارات دەگەن اتى عانا ەكەن. ەسىك, تەرەزەدەن ەشتەڭە جوق. سۋ مەن جارىق جانە جوق. كەڭسە اۋلاسىن بەلۋاردان كەلەتىن ارام ءشوپ باسىپ كەتكەن. قوقىس دەگەنىڭىزدى توننالاپ تاسىپ شىعارادى.
مىنە, ەندى, سول عيماراتىڭىز ءبىر جونگە كەلىپ قالىپتى. بۇل جۇمىسپەن وننان استام اۋىل ازاماتتارى اينالىسىپ جاتسا, ەرتەڭ كاسىپورىن پايدالانۋعا بەرىلگەندە دە وندا وسى اۋىلدىڭ جيىرماشاقتى ازاماتى جۇمىس ىستەيتىن بولادى. ال ولاردىڭ ورتا تابىسى كەم دەگەندە 50 مىڭ تەڭگەنى قۇراماق. قازىردە بولاشاق جۇمىسشىلاردى دايارلاۋ ءىسى قوسا جۇرگىزىلۋدە.
وسى ورايدا جاڭا كاسىپورىنعا شانحايدىڭ جاڭا قۇرال-جابدىقتارى ورناتىلىپ جاتقانىن ايتا كەتسەك دەيمىز. ارماننىڭ ءوزى شانحايعا دا بارىپ كەلىپتى. ءبىزدىڭ سۇراعىمىزعا وراي باس ديرەكتور وسىنداي قۇبىرلاردى جاساۋعا قاجەتتى شيكىزاتتى, رە-100 ماركالى پلاستماسسا ۇنتاقتارىن ازىرگە رەسەيدەن الىپ جاتقاندارىن, ەندى ونداي شيكىزات اتىراۋدا جاسالىپ جاتقانىن ايتقان. مۇنداي شيكىزات گازدان جاسالاتىن كورىنەدى. سونىڭ ءبارى ءوندىرىستى دامىتۋداعى ءبىزدىڭ ەلىمىزدەگى وڭدى ءۇردىستى بايقاتسا كەرەك. ال ونىڭ ءبىر پاراسى اۋىلدا قولعا الىنىپ وتىرعانى, ارينە, قۋانىشتى جاعداي. امانشىلىق بولسا, بۇلاردىڭ جاڭا كاسىپورنى ءبىر-ەكى ايدا قاتارعا قوسىلماق. ال ولار مۇنداي يگىلىكتى ءىستى بىلتىرعى جىلدىڭ شىلدە ايىندا عانا قولعا العان بولاتىن.
سۇراستىرا كەلگەندە باس ديرەكتوردىڭ ءتورت بالاسى بار ەكەندىگىن بىلدىك. ولاردىڭ ۇلكەنى ەلدوس ستۋدەنت بولسا, قالعاندارى مەكتەپتە وقيتىن كورىنەدى. ال سالتانات كەلىنىمىز استانادا «قازاقتەلەكوم» سالاسىندا قىزمەت ەتۋدە. ۇرپاققا دا باس-كوز بولىپ, اۋىلدى دا گۇلدەندىرۋگە اتسالىسىپ جاتقان مۇنداي ازاماتتاردان قايتىپ اينالمايسىڭ!
داۋلەت سەيسەن ۇلى.
شىعىس قازاقستان وبلىسى,
بەسقاراعاي اۋدانى.
سۋرەتتە: ءوندىرىس الاڭ ىنان كورىنىس.
