كوروناۆيرۋستىڭ تارالۋىن بولدىرماۋ جونىندەگى وڭىرلىك جەدەل شتابتىڭ حابارلاۋىنشا, ارنايى جيىنعا شاقىرۋ الدىندا اسكەري مىندەتتى ازاماتتاردىڭ بارلىعى زەرتتەلگەن. ال, شاقىرىلۋشىلار اتىراۋ وبلىسىنىڭ قورعانىس ىستەرى جونىندەگى دەپارتامەنتىندە مەديتسينالىق كوميسسيا ارقىلى ىرىكتەلگەن. جيىنعا قاتىسۋشى اسكەري قىزمەتشىلەر ماماندىقتارى مەن تاجىريبەسىنە وراي ءۇش توپقا بولىنگەن.
ءبىرىنشى توپ – اۋرۋحانا ءبولىمى. ەكىنشى توپتا رادياتسيالىق, حيميالىق جانە بيولوگيالىق قورعانىس ۆزۆودى بار. ءۇشىنشى توپقا اتقىشتار ۆزۆودى كىرەدى. اسكەري قىزمەتكە شاقىرىلۋشىلاردىڭ نەگىزگى مىندەتتەرىنە كوروناۆيرۋستىڭ تارالۋىن بولدىرماۋ جونىندەگى جەدەل شتابتىڭ جۇمىسىنا قاتىسۋ, بلوكپوستتاردا قىزمەت ەتۋ, قالا اۋماقتارىن دەزينفەكتسيالاۋ, ينفەكتسيا وشاقتارى بار وبەكتىلەردى كۇزەتۋ جانە مەديتسينالىق كومەك كورسەتۋ كىرەدى.
جيىن 10 ءساۋىر-10 مامىر ارالىعىندا وتەدى دەپ كۇتىلۋدە. الايدا, وڭىردە قالىپتاسقان جاعدايلارعا سايكەس ونىڭ مەرزىمى ءۇش ايعا دەيىن سوزىلۋى مۇمكىن. ارنايى جيىن كەزىندە شاقىرىلعان ازاماتتار قر قارۋلى كۇشتەرىنىڭ اسكەري قىزمەتشىسى مارتەبەسىن الادى. ولار «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا سايكەس بارلىق الەۋمەتتىك جەڭىلدىكتەر قولدانىلادى. اتاپ ايتقاندا, مەديتسينالىق كومەك, كيىممەن جانە تاماقپەن قامتاماسىز ەتىلەدى.
سونىمەن قاتار, ارنايى جيىننىڭ بارىسىندا اسكەري قىزمەتكە جارامدى ادامداردىڭ جۇمىس ورنى مەن لاۋازىمى ساقتالادى. ولارعا ورتاشا جالاقى تولەنەدى. ال, جۇمىس ىستەمەيتىن ادامدارعا مەملەكەت ەسەبىنەن ەڭ تومەنگى جالاقى مولشەرى, ياعني, 42 500 تەڭگە تولەنەتىن بولادى.
جۇماسات عازيز
