قازاقستان پرەزيدەنتى نۇرسۇلتان نازارباەۆ G20 ءسامميتى اياسىندا بۇۇ-نىڭ باس حاتشىسى پان گي مۋنمەن كەزدەسۋ وتكىزدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
قازاقستان پرەزيدەنتى نۇرسۇلتان نازارباەۆ G20 ءسامميتى اياسىندا بۇۇ-نىڭ باس حاتشىسى پان گي مۋنمەن كەزدەسۋ وتكىزدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
كەزدەسۋدە كوپتاراپتى ءوزارا ءىس-قيمىلدىڭ كەڭ اۋقىمى, سونداي-اق وڭىرلىك قاۋىپسىزدىكتىڭ وزەكتى ماسەلەلەرى قارالدى.
قازاقستان پرەزيدەنتى ەلىمىز بۇۇ-نىڭ باستامالارىن ءاردايىم قولداي وتىرىپ, ۇيىمنىڭ قىزمەتىنە بەلسەنە اتسالىسىپ كەلە جاتقانىن اتاپ ءوتتى.
– ءبىز بىرلەسىپ يادرولىق قارۋسىزدانۋ جانە جاپپاي قىرىپ-جوياتىن قارۋدى تاراتپاۋ سالاسىندا كوپ جۇمىس جاسادىق. سونداي-اق, 29 تامىزدى يادرولىق سىناقتارعا قارسى حالىقارالىق ءىس-قيمىل كۇنى دەپ جاريالاۋ جونىندەگى باستامامىزدى قولداعانىڭىز ءۇشىن العىسىمىزدى بىلدىرەمىز. بۇعان قوسا, ءبىز «جاسىل ەكونوميكانى» دامىتۋ جونىندەگى باعدارلاماعا بەلسەنە اتسالىسىپ, بۇل باعىتتاعى جۇمىستى جالعاستىرۋدامىز, – دەدى نۇرسۇلتان نازارباەۆ.
مەملەكەت باسشىسى قازاقستاننىڭ الماتىدا بۇۇ-نىڭ وڭىرلىك ورتالىعىن قۇرۋ جونىندەگى باستاماسىن اتاي كەلە, ونىڭ جۇمىسى ءۇشىن بارلىق جاعداي جاسالاتىنىن ءمالىم ەتتى.
قازاقستان پرەزيدەنتى حالىقارالىق سيپاتتاعى بارلىق پروبلەما, اسىرەسە, سوعىس پەن بەيبىتشىلىك ماسەلەسى حالىقارالىق قۇقىق قاعيداتتارىنىڭ نەگىزىندە جانە ۇيىمنىڭ قاتىسۋىمەن شەشىلۋى ءتيىس ەكەنىن اتاپ كورسەتتى.
ءوز كەزەگىندە باس حاتشى وسى كەزدەسۋدىڭ وتكەنىنە ريزاشىلىعىن ءبىلدىردى.
– مەن G20 سامميتىنە قازاقستاننىڭ شاقىرىلۋى ەلدىڭ ەكونوميكالىق دامۋىنىڭ تابىستارى مەن جەتىستىكتەرىنىڭ ءسوزسىز مويىندالۋىنىڭ جانە حالىقارالىق بەدەلىنىڭ ارتۋىنىڭ, سونداي-اق جاھاندىق ەكونوميكالىق ءماسەلەلەردى شەشۋدەگى مەملەكەت ءرولىنىڭ دالەلى بولىپ تابىلادى دەپ ەسەپتەيمىن. ءسىز قازاقستاندى وڭىرلىك قاۋىپسىزدىكتە ماڭىزدى ءرول اتقاراتىن ەلگە اينالدىردىڭىز جانە بۇعان ءسىزدىڭ كوشباسشىلىعىڭىزدىڭ ارقاسىندا قول جەتكىزىلدى, – دەدى پان گي مۋن.
باس حاتشى قازاقستاندى مىڭجىلدىق ماقساتتارى جەتىستىكتەرىمەن جانە بىرقاتار اۋقىمدى ەكونوميكالىق مىندەتتەردى شەشۋىمەن قۇتتىقتادى.
سۋرەتتەردى تۇسىرگەندەر
س.بوندارەنكو, ب.وتارباەۆ.
