پاراساتتى ءبىلىمدى ادام عانا ءوز ەلىن ورگە سۇيرەيدى. مەملەكەت باسشىسى نۇرسۇلتان نازارباەۆ ەلورداداعى №64 مەكتەپ-ليتسەيدە وقۋشىلارمەن كەزدەسۋىندە وسىعان ەكپىن بەردى. جالپى, تاۋەلسىز ەلىمىزدىڭ تۇعىرىن بەكەمدەيتىن جاس جەتكىنشەكتەردىڭ بويىنا ەلباسى پاتريوت ۇعىمىن ءسىڭىرىپ, الدا تۇرعان قاداۋ-قاداۋ ماسەلەلەردى تارقاتتى. ال كەشەدەن بەرى رەداكتسيامىزعا پرەزيدەنت قوزعاعان سان الۋان تاقىرىپقا بايلانىستى جىلى لەبىزىن بىلدىرگەن وقىرمانداردان حاتتار كەلىپ تۇسكەن بولاتىن. بۇگىن دە سولاردىڭ بىرقاتارىنا ورىن بەرىپ وتىرمىز.
اينۇر ورازىمبەتوۆا, قىزىلوردا قالاسىنداعى №176 ورتا مەكتەپتىڭ مۇعالىمى
مەملەكەت باسشىسى نۇرسۇلتان نازارباەۆ ءوز دارىسىندە ۇلت تاريحىنا قاتىستى كەلەلى اڭگىمە جۇرگىزدى. «تۋعان جەرىڭنىڭ, ەلىڭنىڭ تاريحىن بىلمەيىنشە, شىنايى پاتريوت بولۋ مۇمكىن ەمەس. راسىندا دا, تاريح تەك بىزدەن باستالمايدى. بىزگە دەيىنگى مىڭجىلدىقتاردا دا ادامدار ءومىر ءسۇردى. ولار كىمدەر ەدى, جالپى, قازاق ۇلتى قالاي قالىپتاستى دەگەندى ءبىلىپ الۋ وتە ماڭىزدى. ءبىزدىڭ داۋىرىمىزگە دەيىنگى ەكى مىڭجىلدىقتاردا قازاق جەرىندە ساق, عۇن تايپالارىنىڭ ءومىر سۇرگەنى تاريحتان ءمالىم. ەسىك قورعانىنان تابىلعان ەڭ العاشقى التىن ادام ساق داۋىرىنە جاتقىزىلادى. ودان كەيىن ەلىمىزدىڭ ارحەولوگياسى ءۇشىن وتە ماڭىزدى وقيعالار رەتىندە بەرەلدەن جانە اتىراۋ ماڭىنان تابىلعان التىن كيىمدى ادامداردى ايتۋعا بولادى. ەلىمىزدىڭ شىعىسىنان باتىسىنا دەيىن ەڭ كەمى 3 مىڭ شاقىرىم. وسى سايىن دالادا ءبىر مادەنيەتتىڭ ادامدارى ءومىر سۇرگەنى انىق. ارينە, بۇل مالىمەتتەر كەز كەلگەن تاريحي دەرەكتەردەن تابۋعا بولاتىن دەرەكتەر, بىراق ءبىز ءۇشىن ەڭ ماڭىزدىسى – ءبىزدىڭ جەرىمىزدە مەكەن ەتكەن ساق تايپاسىنىڭ, ياعني ارعى اتا-بابالارىمىزدىڭ الەمدىك وركەنيەتكە ءوز قولتاڭبالارىن قالدىرا الۋىندا» دەدى ول. ەلباسى وسى ارقىلى وتكەندى قۇرمەتتەۋگە شاقىرىپ وتىر.
– مەن دجون كەننەديدىڭ ءبىر ءسوزىن وتە جاقسى كورەمىن. ول ەلىم ماعان نە بەرەدى دەپ ەمەس, مەن ەلىمە نە بەرەمىن دەپ ويلانۋ كەرەكتىگىن ايتادى. ءيا, وتانعا دەگەن ماحابباتتى ىسپەن دالەلدەۋ كەرەك. ءبىز قازىر مەملەكەتتىلىكتى قالىپتاستىرۋ, تاۋەلسىزدىكتى نىعايتۋ ءۇشىن ەلدىڭ ءوز ازاماتتارىنىڭ ەڭبەگىن قاجەت ەتەتىن كەزەڭدى باستان وتكەرىپ جاتىرمىز. اركىم ءوز ەڭبەگى ارقىلى مەملەكەتتى كوركەيتە بىلسە, سوندا عانا مەملەكەت قۋاتتى بولادى,- دەگەن پرەزيدەنتتىڭ پىكىرى شىنىندا دا وزەكتى. ويتكەنى, ءبىز ارقايسىسىمىز تۋعان مەملەكەتىمىزدىڭ وركەندەۋى ءۇشىن جان اياماي ەڭبەك ەتۋگە ءتيىسپىز. سوندا عانا ەلىمىز زور جەتىستىكتەرگە جەتە الادى. بۇل ورايدا جاستاردىڭ وسى قاعيداتتى ساناسىنا ءسىڭىرىپ وسكەنى كەرەك. سەبەبى, جاستار ەلىمىزدىڭ بولاشاعى.
گۇلباعىم قوجاحمەت, قىزىلوردا وبلىسى, قازالى اۋدانىنداعى №25 ورتا مەكتەپتىڭ مۇعالىمى
پرەزيدەنتىمىز نۇرسۇلتان نازارباەۆ بۇرناعى كۇنى ەلوردالىق وقۋشىلارعا ءدارىس وقىدى. ءدارىس بارىسىندا ەلباسى وقۋشىلارعا وتاندى سۇيۋگە, مەملەكەتتىڭ پاتريوتى بولۋعا ۇندەدى.
سونىمەن قاتار, ءبىلىم سالاسىنداعى, مەملەكەتتىڭ دامۋ جولىنداعى ىرگەلى ىستەردى اتاپ ايتتى. كەزدەسۋ بارىسىندا وزىمە مەملەكەت باسشىسىنىڭ مىنا ءسوزى ەرەكشە اسەر ەتتى. «وسىدان ءبىراز جىل بۇرىن مەن دامىعان ەلۋ ەلدىڭ قاتارىنا كىرۋدى جوسپارلاعان بولاتىنمىن. داۆوس فورۋمى ەلىمىزدىڭ ەلۋ ەلدىڭ قاتارىنا كىرگەنىن مالىمدەدى. بىراق بۇل از. وزگە ەلدەر العا قاراي جىلجىپ بارادى. ءبىز نەگە ولاردى ىلعي دا قۋىپ ءجۇرۋىمىز كەرەك؟ وزگە ەلدەردەن جاڭا تەحنولوگيالاردى الىپ جاتىرمىز. بىراق ولار بىزگە ەسكىسىن بەرەتىنى تۇسىنىكتى. سوندىقتان سول تەحنولوگيالاردى ءوزىمىز جاساۋعا ۇمتىلۋىمىز كەرەك. ول ءۇشىن عىلىم دامۋى ءتيىس. ەگەر بىزدە عىلىم, ينجەنەريا دامىمايتىن بولسا, وزگە ەلدەر بىزگە ەسكى-قۇسقىسىن تاستاي بەرەتىن بولادى. اينالاعا قاراڭىزدارشى, تەحنولوگيالار قانداي جىلدامدىقپەن دامىپ بارادى. مەن اقپاراتتىق تەحنولوگيالاردى ايتىپ وتىرعان جوقپىن. ينجەنەريا, مەديتسينا, ەنەرگەتيكا سالاسىنداعى تەحنولوگيالاردىڭ قارىشتاپ دامىپ بارا جاتقانى ءبىزدى ويلاندىرۋى ءتيىس». پرەزيدەنتتىڭ وسى سوزىنەن-اق مەملەكەتكە, قازاقستاندىقتارعا ۇلكەن جاناشىرلىقتى بايقايمىز. نۇرسۇلتان ءابىش ۇلى وقۋشىلاردىڭ اقپاراتتىق تەحنولوگيالاردى كوپ پايدالاناتىنىن, بىراق ولار ءۇشىن مۇنىڭ ونشا پايدالى ەمەس ەكەنىن دە ايتتى. تۆيتتەر, باسقا دا الەۋمەتتىك جەلىلەردە كوپ ۋاقىتتى ولتىرگەنشە ادامدارمەن كوزبە-كوز سويلەسۋدىڭ, ارالاسۋدىڭ اناعۇرلىم ناتيجەلى ەكەنىن جەتكىزدى. «ينتەرنەت ارقىلى دوس تابۋ ق يىن. ال ادامدارمەن تىكەلەي ارالاسقان كەزدە ونىڭ كوڭىل-كۇيىن, ساعان دەگەن كوزقاراسىن اڭعارۋعا, ءوزىڭنىڭ ول ادامعا دەگەن كوڭىل-كۇيىڭدى ناقتى جەتكىزۋگە مۇمكىندىك بار. كومپيۋتەردىڭ ىشىنە كىرىپ كەتەتىندەي بوپ, بۇكىل ۋاقىتىن سونىڭ الدىندا وتكىزەتىن ادامدار ءتۇپتىڭ تۇبىندە جالعىزدىقتان كۇيزەلەدى. الەمدە سۋيتسيد وقيعالارىنىڭ ورىن الىپ جاتۋى دا وسىعان بايلانىستى بولۋى مۇمكىن. جالپى, بىلەسىزدەر مە, كومپيۋتەردىڭ الدىندا وتىراتىن ادامدار بار, سوسىن وقيتىن ادامدار بار. كەيىن كومپيۋتەردىڭ الدىندا وتىراتىن ادامدار وقىعان, ساۋاتى بار ادامدارعا قىزمەت ەتەتىن بولادى». وسىناۋ ءسوز ارقىلى ەلباسى وقۋشىلاردىڭ بولاشاعىن ايقىنداپ بەردى دەۋگە بولادى.
ساۋلە راحمەتوۆا, الماتى قالاسىنداعى №148 مەكتەپ-گيمنازيانىڭ مۇعالىمى
ەلىمىزدىڭ ءتورى-استانا قالاسىندا پرەزيدەنت نۇرسۇلتان نازارباەۆ وتكىزگەن ءتالىم مەن تاربيە ساباعى بارشا قازاقستاندىق شاكىرت پەن ۇستازعا باعىت كورسەتەتىن رۋحاني جۇلگە بولدى دەپ ايتار ەدىم. ەلباسى جاس ۇرپاق وكىلدەرىمەن وتكىزگەن كەزدەسۋىندە كەلەشەكتىڭ تىزگىنىن ۇستايتىن ازاماتتار قانداي بولۋى كەرەك جانە ۇراندى ەلدىڭ ۇل-قىزى قالىپتاسۋ جولىن قالاي تاڭداۋى كەرەك دەگەن سەكىلدى ماڭىزدى تاربيەلىك ماسەلەنى ورتاعا سالدى.
بۇعان دەيىن ينتەراكتيۆتى تاقتا ارقىلى قازاقستاننىڭ بارشا تالىمگەر شاكىرتتەرىنە جول نۇسقاپ, جارقىن دا جاسامپاز ءومىردى ناسيحات ەتىپ جۇرگەن مۇنداي قادام ءبىزدىڭ بۇگىنگى بىلىمگە ۇمتىلعان جاس ورەندەرىمىز ءۇشىن اسا پايدالى داستۇرگە اينالىپ وتىر.
بىزدەر دە, قازاقستاندىق ۇستازدار مەن تاربيە سالاسىنىڭ قىزمەتكەرلەرى ءوز كەزەگىمىزدە ەلباسى ۇندەگەن تاربيە مەن ءبىلىم جولىنا ءوز ۇلەسىمىزدى قوسىپ, كەلەر ۇرپاقتى تەلەگەي تابىسقا قول جەتكىزەر سوقپاققا سالامىز دەپ سەنەمىن. مەملەكەت باسشىسى ارنايى ۋاقىت ءبولىپ جاستاردى بىلىمگە شاقىرۋىنىڭ ءوزى كوپتەگەن جاستاردىڭ تالانتى مەن تالابىن جانداندىرا تۇسەدى جانە ءبىلىم جولىندا ءوزارا ءادىل باسەكەگە باستايتىنى انىق دەپ بىلەمىز.
تالانتى مەن تالابىن ءبىر ارنادا ۇشتاستىرا بىلگەن ەلىمىزدىڭ العىر شاكىرتتەرىمەن بولعان دارىستە مەملەكەت باسشىسى جاس ۇرپاققا ۇلكەن كوڭىل بولەتىنىن تاعى ءبىر مارتە دالەلدەدى. پرەزيدەنت ەلىمىزدىڭ تابيعي بايلىقتارىنىڭ كۇندەردىڭ ءبىر كۇنى بىتەرىنە, سول سەبەپتى قازاقستاندىقتاردىڭ, سونىڭ ىشىندە جاستاردىڭ زامان تالابىنا ساي ونەر مەن بىلىمگە كوڭىل بولۋىنە نازار اۋدارتىپ وتىرعاندىعى قۋانتتى. العا باسقان جاڭا زامان جاڭا تەحنولوگيانىڭ ءداۋىرى ەكەنى بەلگىلى. سوعان وراي جاستار الەمدىك ستاندارتتارعا ساي جاڭا تەحنولوگيالاردى يگەرۋى ءتيىس. ەلباسى ايتقانداي, سوندا عانا ءبىز كوشتەن قالماي, باسەكەگە بارىنشا قابىلەتتى دامىعان الىپ مەملەكەتتەردىڭ قاتارىنا كىرەمىز.
ىڭكار سابيتقىزى, الماتى قالاسىنداعى №148 مەكتەپ-گيمنازياسىنىڭ تۇلەگى
مەملەكەت باسشىسى نۇرسۇلتان نازارباەۆتىڭ تالانتتى جاستارمەن وتكىزگەن تاربيە ساباعى ءبىزدى اسا قىزىقتىردى. پرەزيدەنتپەن كەزدەسكەن شاكىرتتەردىڭ ءبارى دە ءتۇرلى سپورتتىق جارىستار مەن ءبىلىم وليمپيادالارىنىڭ جەڭىمپازدارى ەكەن..
مەنى تاعى ءبىر قۋانتقانى, بيىلعى وقۋ جىلىن ەلباسىمىز نۇرسۇلتان نازارباەۆتىڭ دارىسىمەن باستاعانىمىز بولىپ وتىر. ءبىز وزىمىزگە ارنالعان مەكتەپ باعدارلاماسىمەن قاتار جەكە تىرلىگىمىزدە دە ۇلكەن ءومىر جولىنا قادام باسىپ كەلە جاتقان ۇرپاقپىز. ەلباسىنىڭ ساباعى ءبىزدى ۇلكەن ىسكە-مەملەكەتتىڭ دامۋ جوسپارىنا جول سىلتەپ وتىر. ءبىلىمدى ۇرپاق دەگەنىمىز تەك قانا ساباعىن 5-كە وقىپ, سپورتتى سەرىك ەتكەن جاس قانا ەمەس, سونىمەن قاتار ءوز وتانىنىڭ كەلەشەگىنە ۇلەس قوسسام دەپ ۇلكەن اعالار مەن اپالارىمىزدان ءتالىم الاتىن جاس ۇلان دەپ بىلەمىن. سوندىقتان دا ءبىز قازاقستاننىڭ الەمدەگى ەڭ وزىق ەل بولۋىنا اتسالىساتىن ءبىلىمدى مامان بولىپ شىعۋ جولىندا وقۋ مەن ۇيرەنۋدەن تالمايتىن ىزدەنىس جولىندا بولامىز دەگىم كەلەدى.
مەملەكەت باسشىسىنىڭ ءتالىم مەن تاربيەگە تولى ساباعى بىزگە جاقسى اسەر قالدىردى. پرەزيدەنتتەن ساباق تىڭداۋ بارلىق وقۋشىلار ءۇشىن ۇلكەن ونەگە ەكەنى ءسوزسىز. نۇرسۇلتان ءابىش ۇلى ءوز ءومىرى مەن حالىققا جاساپ وتىرعان قىزمەتىن بايلانىستىرىپ ايتقان ءاربىر عيبراتتى ءسوزى ءبىزدىڭ سانامىزدا ماڭگىلىككە ورىن الدى. ەلىمىزدىڭ بارشا وقۋشىسىنا ول كىسىنىڭ ەل ءۇشىن جاساپ جاتقان كوپتەگەن ىستەرى جاقسى تانىس. اسىرەسە, جاستاردىڭ تەرەڭ ءبىلىم الىپ, زامان كوشىندە وزگە ەلدەردىڭ بالالارىنان كەم بولماي ساپالى ءبىلىم الۋىنا, دامىعان ەلدەردەگىدەي زاماناۋي تەحنيكامەن بۇگىنگى مەكتەپتەردى قامتاماسىز ەتىپ جاعداي جاساعانى ءۇشىن ريز امىز.
ارداق قاسىمحانوۆ, كوكشەتاۋ قالاسىنداعى №3 كاسىبي مەكتەپ-گيمنازياسىنىڭ وقۋشىسى
ءپاتريوتيزمنىڭ باستى ارقاۋى – جاۋاپكەرشىلىك. نۇربولات سانسىزباي, ماديار باقىتجان, ءبيبىنۇر كەنجەحانوۆا سياقتى استانالىق سىنىپتاستارىمنىڭ مەملەكەت باسشىسىنىڭ الدىندا مۇدىرمەي سويلەپ, ءوز ويلارىن ەركىن جەتكىزۋى ءسۇيسىندىردى. ولاردىڭ سوزدەرىنە قاراپ اركىمنىڭ پىكىرى ءارتۇرلى ەكەندىگىن, بىراق پىكىرلەر الۋاندىعى ارقىلى تۇپكى ۇستانىم تۋىندايتىنىن اڭعاردىم. ماسەلەن, وقۋشىلار ءپاتريوتيزمنىڭ نەگىزى ەلدى جۇرەكپەن سۇيۋدە, تاريحتان ءتالىم الۋدا, بۇگىنگى وزگەرىستەرگە قۋانىپ, ەرتەڭگى كۇنگە سەنىممەن اياق باسۋدا, جاسامپازدىققا جەتۋ ءۇشىن كوپ ەڭبەكتەنىپ, تولىققاندى ءبىلىم الۋدا دەپ بىلەدى. وسىنىڭ بارلىعىنىڭ جيىنتىعى ادالدىق پەن جاۋاپكەرشىلىككە كەلىپ سايادى.
ءبىز تاۋەلسىز قازاقستانىمىزبەن ماقتانا ءبىلۋىمىز كەرەك. الەم تانىعان استانامىز ءبىزدى جاڭا شۋاقتى بيىكتەرگە باستايدى. ءبىزدىڭ ۇرپاق «ەكسپو-2017» سياقتى جاڭا وقيعالاردى جاساۋشىلار بولاتىندىعىنا سەنەمىن. ويتكەنى, پرەزيدەنتىمىزدىڭ وقۋ جىلىنىڭ العاشقى كۇنى وتكىزگەن ءدارىسى بارشامىزدى جاۋاپتى ىستەرگە باستايدى, وعان دايىندىعىمىزدى ۇشتاپ, جىگەرىمىزدى نىقتايدى.
ايجان كوشەرباي, اتىراۋ قالاسىنداعى نازارباەۆ زياتكەرلىك مەكتەبىنىڭ وقۋشىسى
مەملەكەت باسشىسى نۇرسۇلتان نازارباەۆتىڭ استانالىق ۇزدىك وقۋشىلارمەن وتكىزگەن عيبراتتى ءدارىسى اسىرەسە, مەنىڭ زامانداستارىمدى ەلدى سۇيۋگە ۇمتىلدىرىپ, وتاننىڭ پاتريوتى بولۋعا جىگەرلەندىرەدى دەپ ويلايمىن. سەبەبى, پرەزيدەنتتىڭ تاۋەلسىز قازاقستاندى الەمنىڭ باسەكەگە قابىلەتتى تانىمال ەلدەرىنىڭ قاتارىنا قوسۋ جولىنداعى ەرەن ەڭبەگى بارشامىزدى وتانشىلدىققا تاربيەلەيتىن ونەگە دەپ بىلەمىن.
ءبىز قازاقستانداي تاۋەلسىز ەلىمىزدى الەمدەگى جان-جاقتى دامىعان مەملەكەتتەردىڭ قاتارىنان كورۋىمىز ءۇشىن الدىمەن جاقسى ءبىلىم, سونان سوڭ ءوزىمىز قالايتىن ماماندىقتىڭ بىلگىرى بولۋىمىز كەرەك. بۇل ءۇشىن ارينە, ءبىز ەرىنبەي-جالىقپاي ءبىلىم الۋعا ۇمتىلامىز. ال ءبىزدىڭ ساپالى ءبىلىم الۋىمىز ءۇشىن ءوزىم جاقىندا تابالدىرىعىن اتتاعان نازارباەۆ زياتكەرلىك مەكتەبىندە بارلىق جاعداي جاسالىپ وتىر. ەندەشە, ءبىز جالقاۋلىقتان اۋلاق بولۋىمىز كەرەك.
پرەزيدەنت ەڭبەك ەتۋگە قۇلشىنىسى جوق جالقاۋ ادامنىڭ وتاننىڭ پاتريوتى بولمايتىنىن باسا ايتتى. ال ءبىز وتاننىڭ پاتريوتى بولعىمىز كەلەدى. كەلەشەكتە قازاقستاننىڭ گۇلدەنىپ, كوركەيە بەرۋىنە ءوز ۇلەسىمىزدى قوسۋدى كوزدەيمىز.
