كەشە مەملەكەت باسشىسى نۇرسۇلتان نازارباەۆ ەلورداداعى №64 مەكتەپ-ليتسەيىندە ءبىر توپ وقۋشىلارمەن كەزدەستى. ءبىلىم كۇنىنە بايلانىستى وتكىزىلگەن بۇل ءىس-شارادا ەلباسى وقۋ باعدارلاماسىنا ەنگىزىلگەن «قازاق ەلى» ءپانىنىڭ العاشقى ساباعىن وتكىزدى. اتالعان ءپاننىڭ ماڭىزىن جەتكىنشەكتەرگە جان-جاقتى ءتۇسىندىرىپ, ەل دامۋىنىڭ باسىم باعىتى ساپالى بىلىممەن ولشەنەتىنىن قاداپ ايتتى. ەلىمىز قولعا الىپ, ىسكە اسىرىپ جاتقان باياندى باعدارلامالار مەن وركەندەۋ جولىنداعى ماڭىزدى مىندەتتەردى دە نازاردان قاعىس قالدىرمادى. بۇگىن, مىنە, ەلباسى ءسوز ەتكەن ماسەلەلەرگە ۇستازدار مەن وقۋشىلار وزىندىك ءۇنىن قوسىپ وتىر.
گۇلنار پارمانوۆا,
شىمكەنت قالاسىنداعى قازىبەك بي اتىنداعى №36 ورتا مەكتەپتىڭ مۇعالىمى
ماعان ەڭ الدىمەن,پرەزيدەنت نۇرسۇلتان نازارباەۆتىڭ بالالارمەن ەمەن-جارقىن سويلەسىپ, اشىق اڭگىمەگە شاقىرعانى قاتتى ۇنادى. سول-اق ەكەن, بالالار دا اشىلىپ سالا بەردى...مۇعالىم ۇنەمى ىزدەنىس, وي ۇستىندە جۇرەتىن حالىق عوي. ءوز باسىم گازەت, جۋرنال بەتتەرىندە جارىق كورگەن جاقسى ماقالالاردى ساقتاپ, ىشىندەگى ۇناعان ويلاردى, سوزدەردى قويىن داپتەرىمە ءتۇرتىپ جۇرەتىنىم بار. وسى جولى دا ەلباسىنىڭ ايتقان ماعىنالى سوزدەرىن جازىپ الدىم. «ادامنان بارلىق نارسە تارتىپ الىنۋى مۇمكىن. بىراق, ءبىلىمىڭ مەن كاسىبىڭ بولسا, ونى سەنەن ەشكىم تارتىپ الا المايدى» دەپ ايتقانى جۇرەگىمنىڭ تورىنەن ورىن الدى. جالپى مەملەكەت باسشىسى ەلدىڭ قازىرگى جاعدايىن, الداعى باعىتىمىزدى, ءجۇرىپ وتكەن جولىمىزدى, اسىرەسە, جاستاردىڭ پاتريوت بولىپ ءوسۋى تۋرالى وتە كەرەمەت, قاراپايىم عانا تىلمەن, مىسالمەن تۇسىنىكتى قىلىپ ايتىپ بەردى. ەلباسىنىڭ بۇل ءسوزى, مىسالدارى ءاربىر جاسقا, بالا تاربيەلەپ جاتقان ءاربىر اتا-اناعا, ءاربىر مۇعالىمگە ۇلكەن وي سالىپ, ومىرلىك باعىت بولاتىنى اقيقات.
ايگەرىم ابىلداەۆا,
مۇعالىم,
وڭتۇستىك قازاقستان وبلىسى,
تۇلكىباس اۋدانى.
«وتاندى ءسۇيۋ – يماننان» دەگەن. جۇرەگىندە يمانى بار ادامنىڭ ارى دا تازا, قولى دا تازا, ەلى مەن جەرى ءۇشىن ايانباي, ادال قىزمەت ەتەدى. مىنە, ءبىز جاستارىمىزدى وسىلاي تاربيەلەۋىمىز كەرەك. ەلباسىنىڭ استانالىق جەتكىنشەكتەرمەن وتكەن كەزدەسۋىندە وسى ەلدىك, پاتريوتتىق سەزىم, ەلدىڭ بولاشاعى ماسەلەلەرى وتە جاقسى اڭگىمە بولدى. قازىرگى جاستاردىڭ تالابى تاۋداي. شىنىندا بويدا قۋات, كۇش-جىگەر باردا ولار تاۋ قوپارىپ, كوپ تىرلىك تىندىرىپ تاستاعىسى كەلەدى. اتا-انا, مۇعالىمنىڭ باستى مىندەتى – سول بالالارعا دۇرىس باعىت-باعدار, تاربيە بەرە ءبىلۋ. ياعني, قابىلەتىنە قاراي ماماندىق تاڭداۋعا جاعداي جاساۋى كەرەك. ايتپەسە, كوپتەگەن جاستار ءار ءىستىڭ باسىن ءبىر شالىپ, ارى-بەرى شاپقىلاپ جۇرگەندە, بىرىنشىدەن, التىن ۋاقىتتارىن وتكىزىپ الادى, ەكىنشىدەن قولىنان كەلمەيتىن ىسكە كيلىگىپ, جىگەرلەرىن جاسىتىپ الادى. پرەزيدەنت بۇل كەزدەسۋدە وسى نارسەنى ءدوپ باسىپ, بالالاردىڭ ساناسىنا قۇيا ءبىلدى.
اجار بورانباەۆا
قوستاناي قالالىق ءبىلىم ءبولىمىنىڭ
مەكتەپكە دەيىنگى سەكتور ادىسكەرى
مەملەكەت باسشىسى نۇرسۇلتان نازارباەۆتىڭ استانا قالاسىنداعى №64 مەكتەپ-ليتسەيىنىڭ وقۋشىلارىمەن كەزدەسۋىن جاڭالىقتاردان كورگەندە ەلەڭ ەتكەنىم راس. ويتكەنى, ءوزىم ادىسكەر بولعاندىقتان بالاعا تاربيە بولاتىن شارانىڭ بارلىعىنا قۇلاق تىگىپ جۇرەتىنىم بار. جاڭالىقتاردىڭ ارتىنشا نۇرسۇلتان ءابىش ۇلىنىڭ وسى كەزدەسۋىن, انىعىراق ايتسام, بالالار الدىنداعى ەلدىك ساباعىنىڭ تولىق نۇسقاسىن كەشكى استىڭ بارلىعىن جيناپ قويىپ, تەلەديدار الدىندا قيمىلداماي كورىپ, تىڭدادىم. ارتىنشا اتا-انالار, ارىپتەستەرىم تەلەفون سوعىپ, حابارلاسا باستادى. ءبىر قىزىعى, ەلباسىنىڭ وقۋشىلارمەن اڭگىمەسىن كوپتەگەن اتا-انالار بالالارىمەن بىرگە وتىرىپ كورىپتى.
ءبىزدىڭ پرەزيدەنتتىڭ جۇرتتى ءۇيىرىپ الاتىن شەشەندىك تالانتىن دۇنيەجۇزىندەگى ساياسي قايراتكەرلەر جازىپ ءجۇر. مەن ەندى نۇرسۇلتان ءابىش ۇلىنىڭ ءبىلىمى تەرەڭ ۇستاز ەكەنىن ايتقىم كەلەدى. وقۋشىلاردىڭ الدىندا وتكەن اڭگىمەسىنىڭ ءار جولى بالالاردىڭ بولاشاققا باعدار ەتەتىن باعدارلاماسى ءتارىزدى كورىندى ماعان. جالپى, جەتكىنشەكتەردىڭ ءاردايىم ەسىندە جۇرەتىن وتان, ەل, پاتريوتيزم, ەلدىڭ تاريحى دەگەن قاسيەتتى سوزدەردى بالانىڭ ۇعىمىنا تۋرالاپ ايتىپ بەردى. ال مۇنداي كەزدەسۋدى, اسەرلى اڭگىمەنى تومەنگى سىنىپ وقۋشىلارى عۇمىر بويى ۇمىتپايدى, ولاردىڭ تەز قابىلدايتىنىن بىلەمىن. مەن ەلباسىنىڭ №64 مەكتەپ-ليتسەي وقۋشىلارىمەن وتكىزگەن وسى ساباعىن وقۋ باعدارلاماسىنا ەنگىزىپ, جىل بويىنا ءار مەكتەپتەگى سىنىپ ساعاتتارىندا بالالارعا قايتالاپ كورسەتۋدى ۇسىنار ەدىم.
امانگۇل قالدىباەۆا,
اقتوبە قالاسىنداعى №40 ورتا مەكتەپ ديرەكتورىنىڭ وقۋ ءىسى جونىندەگى ورىنباسارى
مەملەكەت باسشىسى نۇرسۇلتان نازارباەۆ №64 مەكتەپ-ليتسەيىندە وقۋشىلارعا بولاشاقتىڭ كىلتى بىلىمدە, عىلىمدا ەكەنىن ايتىپ, ەلىمىز كەلەشەگىنىڭ بۇدان دا جارقىن بولاتىنىنا ناقتى دەرەكتەر كەلتىردى. «مەن ەلىمىزدىڭ 2050 جىلعا دەيىنگىدامۋ باعدارلاماسىن جاريالادىم. ول 37 جىلدان كەيىن بولادى. بۇل سەندەردىڭ ناعىز كەمەلدەرىڭە كەلىپ, جۇمىس ىستەيتىن شاقتارىڭ»,- دەپ نۇرسۇلتان ءابىش ۇلى جاستارعا ۇلكەن ءۇمىت ارتاتىنىن اڭعارتتى. ءوز ەلىنىڭ پاتريوتى بولۋ ءۇشىن, سول قوعامعا پايدالى ءىس تىندىرۋ قاجەتتىگىن العا تارتتى. بارلىق بايلىقتىڭ باستاۋى ەڭبەك ارقىلى كەلەدى دەگەندى ۇعىندىردى. ول ءۇشىن تەرەڭ ءبىلىم, ۇلتجاندىلىق قاسيەت كەرەك ەكەنىنە كوڭىل اۋداردى. مۇنداي شىنايى اسىل ادامزاتتىق قاسيەتتەردىڭ مەكتەپ پەن وتباسىنان دا قالاناتىنى انىق. بيىلدان باستاپ ەنگىزىلگەن «قازاق ەلى» ءپانى بۇل باعىتتاعى ءساتتى قادام بولدى.
ەرسايد ءجۇسىپوۆ, قىزىلوردا وبلىسى, شيەلى اۋدانىنداعى №159 ورتا مەكتەبىنىڭ ديرەكتورى
مەملەكەت باسشىسى نۇرسۇلتان نازارباەۆتىڭ استانا قالاسىنداعى №64 مەكتەپ-ليتسەيىندە وقۋشىلارعا وقىعان ءدارىسىن «ەگەمەن قازاقستان» گازەتىنەن اسا ۇلكەن ىلتيپاتپەن وقىپ شىقتىق. ەرەكشە اتاپ وتەرلىگى, بۇل وقۋشىلاردىڭ ومىرىندەگى ەڭ ءبىر ەلەۋلى وقيعا رەتىندە قالماق. سەبەبى, تاۋەلسىز قازاقستان مەملەكەتىن قۇرعان, دامۋشى مەملەكەتتەردىڭ قاتارىنا قوسىپ, الەمدىك بيىك دەرجاۆالارمەن تەرەزەسى تەڭ ەل ەتكەن ۇلت كوشباسشىسىنان ءدارىس تىڭداۋ ەكىنىڭ بىرىنە بۇيىرا بەرمەيدى.
ءوز دارىسىندە ەلباسى «ەڭبەك ەتكەن ادام عانا پاتريوت. جالقاۋلار پاتريوت بولا المايدى. ويتكەنى, پاتريوت دەگەن ۇلى ۇعىم. وتاندى ءسۇيۋ رامىزدەردەن باستالادى. ماسەلەن, مەملەكەتتىك تۋ. الەمدىك تاريحقا قارايتىن بولساق, ءبىر تۋدىڭ استىنا جينالعان ءاربىر حالىقتىڭ ءوز ەلىن قورعاعانىن نەمەسە ەلىنىڭ تىنىشتىعى مەن بەيبىتشىلىگى ءۇشىن شايقاستارعا شىققانىن كورەمىز. ءبىزدىڭ مەملەكەتتىك تۋىمىزدىڭ ورتاسىندا شۇعىلالى كۇن, ونىڭ استىندا قالىقتاپ ۇشقان قىران بەينەلەنگەن. تۋدىڭ ءتۇسىنىڭ كوگىلدىرلىگى حالقىمىز العا قويعان ماقساتتارعا جەتۋ ءۇشىن بىرىگۋدىڭ جوعارى جانە يگىلىكتى يدەياسى بار ەكەنىن بىلدىرەدى. ال جۇلدىزدى شاڭىراق بەينەلەنگەن ەلتاڭبا ورتاق ءۇيىمىزدىڭ سيمۆولىن بىلدىرەدى-بۇل بەيبىتشىلىك پەن تۋعان جەردى قاۋىپ-قاتەردەن قورعاۋدىڭ ەجەلگى ۇلگىسى. ءپاتريوتيزمدى ۇلتشىلدىقپەن شاتاستىرۋعا بولمايدى. پاتريوت-ءوز ەلىن سۇيەتىن جانە وزگە مەملەكەتتەرگە قۇرمەتپەن قارايتىن ادام. ەكىنشى دۇنيەجۇزىلىك سوعىستىڭ قاسىرەتتى تاجىريبەسى پاتريوتيزمنەن ۇلتشىلدىققا ءوتۋدىڭ قاۋىپتى ەكەنىن, سونداي-اق وزگە حالىقتى كەمسىتپەي, ءوز ەلىڭدى ءسۇيۋ قاجەتتىگىن ناقتى كورسەتىپ بەردى. وسىنداي باعدارمەن ءومىر ءسۇرۋ قاجەت» دەدى پرەزيدەنت. جاس ۇرپاقتى مەملەكەتىن سۇيۋگە, قۇرمەتتەۋگە, قاجەت جاعدايدا قورعاۋعا ۇندەگەن وسىناۋ سوزدەر ولاردى جىگەرلەندىرەرى حاق.
قاناعات مۇقانوۆ, اقتوبە وبلىسى,
قۋرايلى اۋىلىنداعى ورتا مەكتەپتىڭ وقۋشىسى
شىنى كەرەك, مەملەكەت باسشىسى نۇرسۇلتان نازارباەۆپەن كەزدەسۋگە بارعان قاتارلاستارىما قاتتى قىزىقتىم. ۇلت كوشباسشىسىن بەتپە-بەت كورىپ, ساليقالى ويلارىن تىڭداۋ قانداي عانيبەت دەسەڭىزشى ؟! تەرەڭ ءبىلىمدى بولۋ, ەڭبەك ەتە ءبىلۋدى ايتا وتىرىپ, «ءوز ەلىڭدى ءسۇي, وزگە حالىقتى كەمسىتپە» دەگەنىنەن كوپ نارسەنىڭ بايىبىنا بارۋعا بولادى. ءوز ەلىڭدى ءسۇيۋ دەگەن قۇرعاق سەزىم عانا ەمەس, سول جولدا ءونىمدى ەڭبەك ەتۋ, قوعامعا پايدالى ءىس تىندىرۋ ەكەنىن دە تۇسىندىرە كەتتى. سونىمەن بىرگە, العا قويعان بارلىق مىندەتەردى ورىنداۋ ءۇشىن ءبىلىم مەن عىلىمدى دامىتۋ,بىلىكتى كادرلار دايارلاۋ قاجەتتىگىن قاپەرگە الدى. «بۇل ءۇشىن سەندەر, ەڭ الدىمەن, دەنساۋلىقتارىڭا كوڭىل بولۋلەرىڭ قاجەت. جاقسى دەنساۋلىعى بار ادام عانا ۇلكەن ماقساتتارعا جەتە الادى. ال جاقسى دەنساۋلىقتىڭ كەپىلى-سپورت. سپورتپەن اينالىسۋ كەرەك. كۇندە تاڭەرتەڭ بەلگىلى ءبىر جاتتىعۋلاردى جاساپ ۇيرەنۋ كەرەك. ءوزىڭدى ءبىر قالىپتى ۇستاپ ءجۇرۋ دە ونەر. سوندىقتان بىلىمگە, تابىسقا ۇمتىلاتىن ادام وسىنى ۇمىتپاسىن», -دەپ ەلباسى وقۋشىلارعا جىگەر بەردى. بۇل بىزگە ۇلكەن ۇلاعات, ارينە.
ايناگۇل نۇرمۇحامبەتوۆا,
تالدىقورعان قالاسىنداعى دارىندى بالالارعا ارنالعان م. ارىن اتىنداعى №24 ارناۋلى ليتسەيىنىڭ وقۋشىسى.
پرەزيدەنتىمىز نۇرسۇلتان نازارباەۆتىڭ استاناداعى №64 مەكتەپ-ليتسەيىندە دارىندى وقۋشىلارعا وقىعان ءدارىسىن تەلەديداردان تىڭداپ, گازەتتەردەن وقىدىم. نەگىزى, ەل جاسامپازدىعىن ارتتىرۋ پەرزەنتتىك پارىزىمىز. ول ءۇشىن ءبىز ساپالى ءبىلىم الۋعا ۇمتىلۋىمىز ءتيىس. ساپالى ءبىلىم عانا تىعىرىقتان الىپ شىعادى. ماسەلەن, ەلىمىز كەڭەس وداعىنان ءبولىنىپ شىققاندا, جاعدايىمىز مۇشكىل بولعان ەدى. ەكونوميكاعا ناقتى ساراپتاما جاساي بىلگەن ماماندارىمىز سول قيىندىقتاردى جەڭۋگە ىقپال ەتتى. سونىڭ ناتيجەسىندە بارلىق سالا بويىنا قان جۇگىردى. ال قازىر بىزگە قولدا بار بايلىقتى ءتيىمدى يگەرۋ مىندەتى تۇر. دەگەنمەن, ونى ورىنسىز پايدالانساڭ, تاۋسىلاتىن كەزەڭى دە جەتەدى. سوندىقتان دا بالامالى قۋات كوزدەرىڭ قازىردەن باستاپ وندەۋدى ءساتتى جۇزەگە اسىرۋ قاجەت. ال ەلباسى ونى كادەگە جاراتۋ ءۇشىن جوعارى تەحنولوگيالاردى پايدالانۋ قاجەتتىگىن اتاپ ءوتتى. ءبىز ەندى ءبىلىم مەن عىلىمدى ۇشتاستىرعانىمىز ءجون.
ەربولات باقىت,
وقۋشى,
ماڭعىستاۋ وبلىسى.
مەملەكەت باسشىسى نۇرسۇلتان نازارباەۆتىڭ جاڭا وقۋ جىلى باستالىسىمەن مەكتەپ وقۋشىلارىنىڭ اراسىنا ارنايى كەلگەندىگى قانداي اسەرلى! بۇل ءبىلىم بەرۋ سالاسىنا, ۇستازدار مەن وقۋشىلارعا ۇدايى نازار اۋدارىپ, كوڭىل ءبولىپ وتىراتىندىعىنىڭ دالەلى.
«قازاق ەلى» ءپانىنىڭ ەنگىزىلۋى وتە دۇرىس. سەبەبى, اركىم ءوز ەلىنىڭ تاريحىن, مادەنيەتىن, كەشەگىسىن تانىپ-سەزىنۋ ارقىلى عانا پاتريوتتىق سەزىمدى قالىپتاستىرا الادى, وتاندى ءسۇيۋ قاجەتتىگىن ۇعىنادى. ادەبيەت پانىنەن ساباق بەرەتىن ۇستازىمنىڭ «نۇرسۇلتان ءابىش ۇلىنىڭ قازاق تاريحىندا ءبىز ۇيالاتىن ەشتەڭە جوق» دەگەن ءسوزى بار» دەپ ايتقانى ەسىمدە. ولاي بولسا, ءبىز دە بابالاردىڭ ءداستۇرىن جالعاستىرۋعا, كەلەشەك تاريحتى بولاشاق ۇرپاق ۇيالمايتىنداي ەتىپ ورنىقتىرۋعا ءتيىستىمىز. جالپى پرەزيدەنت وقۋشىلار ۇعىمىنا سايكەس ءسوز ساپتادى. تاۋەلسىز قازاقستاننىڭ ۇزدىك ەلۋ ەلدىڭ قاتارىنا ەنۋىن, بىراق وعان تۇراقتاپ قالماي العا ۇمتىلۋىن اسەرلەنە تىڭدادىم. «وزگە ەلدەر بىزگە ەسكى-قۇسقىسىن بەرەتىنى بەلگىلى» دەگەن سوزدەن, ءبىزدىڭ ەلىمىزدىڭ, اسىرەسە جاس ۇرپاقتىڭ الدىندا كوپ جۇمىستار, مىندەتتەر تۇرعاندىعىن اڭعاردىم. سونداي-اق, كەزدەسۋدە جاڭا تەحنولوگيالاردى مەڭگەرۋ, جاڭا ەكونوميكالىق جاعدايدا ءومىر ءسۇرۋ, «ەكسپو-2017» كورمەسىنىڭ قازاقستانعا بەرەرى سەكىلدى اۋقىمدى ماسەلەلەرمەن قاتار, كومپيۋتەردە ۇزاق وتىرۋدىڭ اپارىپ سوقتىرۋى مۇمكىن كەلەڭسىزدىكتەرى دە اشىپ ايتىلدى.
