ماسكەۋدىڭ تۆەر سوتى سەيسەنبى كۇنى «بتا-بانك» شەڭبەرىندە زاڭسىز الىنعان قارجىلاردى شىعارىپ بەرگەنى جانە الاياقتىعى ءۇشىن زاڭگەر ەلەنا تيششەنكونى قاماۋعا الدى. بۇل تۋرالى «قازاقستان جاڭالىقتارى» حابارلادى.
وسىلايشا سۋديا الەكسەي كريۆورۋچكو ونى ەكى ايعا تەرگەۋ-وقشاۋلىعىنا قاماپ, تەرگەۋ جاعىنىڭ تالابىن قاناعاتتاندىردى.
وزىنە 6 ملرد. تەڭگەنى ۇرلاپ كەتتى دەگەن ايىپ تاعىلعان بويدا باس ساۋعالاپ, شەت ەل اسىپ كەتكەن «بتا-بانكتىڭ» بۇرىنعى باسقارۋشىسى مۇحتار ءابىلازوۆتىڭ سوڭىنان تيششەنكو دا جىم-جىلاس جوعالعان ەدى. ىزدەستىرە كەلگەندە, ونىڭ ءىزى ماسكەۋدەن تابىلدى. مۇنىڭ ءوزى ول وتكەن جازدا لوندونداعى سوتتاردىڭ بىرىنە تۇسىنىكتەمە بەرۋگە كەلگەننەن كەيىن مۇمكىن بولدى. ول بريتانيادان سوڭ فرانتسياعا كەلىپ, ءابىلازوۆ قولعا تۇسەتىن ەكس-ان-پروۆانس قالاشىعىنا جول تارتتى. وسىنىڭ ارقاسىندا قاششىن وليگارح تا قولعا تۇسكەن ەدى.
سۇلتان بوزايعىر.
