بيۋرو وتىرىسىندا ماجىلىستە ماقۇلدانعان زاڭ جوبالارىن كوميتەتتەر اراسىندا ءبولۋ ماسەلەلەرى قارالدى, سونداي-اق 9 ساۋىرگە جوسپارلانعان سەناتتىڭ كەزەكتى وتىرىسىنىڭ كۇن ءتارتىبى ماقۇلداندى. كوميتەت توراعالارى وتىرىستا قارالاتىن ماسەلەلەردىڭ دايىندىعى تۋرالى حاباردار ەتتى.
بيۋرو وتىرىسىندا ءسوز العان سەنات توراعاسى د.نازارباەۆا ەل پرەزيدەنتى مەن توتەنشە جاعداي ءتارتىبىن قامتاماسىز ەتۋ جونىندەگى مەملەكەتتىك كوميسسيا كوروناۆيرۋس ينفەكتسيانىڭ تارالۋىنا قارسى قاجەتتى بارلىق شارالاردى شۇعىل جانە الدىن الا قابىلداپ جاتقانىن اتاپ ءوتتى.
«ەندى ەڭ باستىسى – ولاردىڭ جەرگىلىكتى جەرلەردە جۇزەگە اسىرىلىپ, ناقتى ورىندالۋى. وكىنىشكە قاراي, كوبىنە تاپسىرمالاردىڭ جەرگىلىكتى جەرلەردە ورىندالۋى كوپ سۇراق تۋىنداتىپ جاتادى. قازىرگى كەزدە ەلدىڭ ەكونوميكاسىنا دا, ادامدارعا دا كۇردەلى كەزەڭنىڭ سالدارىن اۋىر سەزىنبەي شىعۋ ءۇشىن مەملەكەتتىك ورگانداردىڭ, دەپۋتاتتىق كورپۋستىڭ جانە بارلىق دەڭگەيدەگى اكىمدەردىڭ, سونداي-اق, بيزنەس-قۇرىلىمداردىڭ بىرلەسىپ كۇش جۇمساعانى دۇرىس», - دەدى سەنات باسشىسى.
داريعا نازارباەۆا تالقىلاۋدى قورىتىندىلاي كەلىپ, سەنات كوميتەتتەرىنە 2020 جىلعا ارنالعان بيۋدجەتكە ەنگىزىلەتىن ناقتىلاۋلاردى مۇقيات زەرتتەۋدى جانە ءوز باعىتتارى بويىنشا ونىڭ ورىندالۋىنا مونيتورينگ جۇرگىزۋدى پىسىقتاۋدى تاپسىردى. اتاپ ايتقاندا, 1 ترلن تەڭگە بولىنەتىن جۇمىسپەن قامتۋدىڭ جول كارتاسى باعدارلاماسىنا نازار اۋدارۋ قاجەتتىگى ايتىلدى.
پالاتا توراعاسىنىڭ پىكىرىنشە, وڭىرلەردەن سايلانعان دەپۋتاتتار ءوز ايماقتارىندا جۇمىسپەن قامتۋدىڭ جول كارتاسىنىڭ قاراجاتىن قانداي ماقساتتارعا جانە وبەكتىلەرگە جۇمساۋ جوسپارلانىپ وتىرعانىن مۇقيات زەردەلەۋى ءتيىس. «بۇرىنعى الەۋمەتتىك باعدارلامالاردى ىسكە اسىرۋ كەزىندە كوپتەگەن بۇرمالاۋشىلىققا جول بەرىلگەنىن ءبىز جاقسى بىلەمىز. قالالاردىڭ كارانتينگە جابىلۋىنا بايلانىستى جۇمىسسىز قالعان ادامدارعا كوڭىل ءبولۋ كەرەك. ولار ەرەكشە قولداۋعا مۇقتاج», - دەپ اتاپ ءوتتى د.نازارباەۆا.
سەنات توراعاسى وتىرىس سوڭىندا ەلباسى مەن Birgemiz قوعامدىق قورىنىڭ ايماقتارداعى تۇرعىندارعا كومەك كورسەتۋ جونىندەگى باستاماسىن قولداۋدا ءماسليحات دەپۋتاتتارىنىڭ جۇمىسىن ۇيىمداستىرعانى ءۇشىن پارلامەنت سەناتى جانىنداعى جەرگىلىكتى وكىلدى ورگاندارمەن (ماسليحاتتارمەن) ءوزارا ءىس-قيمىل جاساۋ جونىندەگى كەڭەس توراعاسىنىڭ ورىنباسارى تولەۋبەك مۇقاشەۆقا جانە رەسپۋبليكالىق ءماسليحات دەپۋتاتتارىنىڭ بىرلەستىگىنە العىس ءبىلدىردى.
