ەلىمىز 6 قاڭتاردان باستاپ «ا» جوسپارىنا كىرىسىپ, ارنايى بورتپەن قىتايداعى ستۋدەنتتەرىمىزدى, تۋريستەرىمىزدى اۋىرماي تۇرىپ ەلگە قايتارىپ الدى. كەلگەن سوڭ دا ولاردى كارانتيننەن وتكىزىپ, بارلىعىن تولىق تەكسەردى. ياعني, ولاردىڭ بارلىعى ەكى اپتا كارانتينگە جاتقىزىلىپ, ودان كەيىن دە باقىلاۋدا بولدى. بۇل – ءبىر. ەكىنشىدەن, پرەزيدەنتتىڭ جارلىعىمەن توتەنشە جاعداي دا ۋاقتىلى جاريالاندى. كارانتين توعىز جولدىڭ تورابىنداعى ەكى ۇلكەن قالادا باستالعانى دا دۇرىس بولدى. سول ارقىلى شەتەلدەن كەلگەن ازاماتتارىمىزدان اۋرۋدى ەرتە انىقتاپ, ەم جاسالىپ جاتىر. بۇل – وڭاي ينفەكتسيا ەمەس. ونىمەن كۇرەسۋ دە قيىنعا سوعىپ تۇر. بىراق الدىن الۋ شارالارى وڭدى جۇرگىزىلگەندىكتەن قازىر اۋرۋ جۇقتىرعانداردىڭ 80 پايىزدان استامىنىڭ جاعدايى جەڭىل. سوندىقتان ولاردى ەمدەۋگە كوپ شىعىن دا كەتپەيدى. ناۋقاستاردىڭ سانىنىڭ كوبەيگەنىنەن قورىقپاۋ, قايتا دەر كەزىندە ىندەتتىڭ وشاعىن تاۋىپ, تىزگىندەپ جاتقانىمىزعا قۋانۋ كەرەك.
حالىق توزىمدىلىك تانىتۋى ءتيىس. پرەزيدەنت مالىمدەمەسىندە ايتىلعانداي, مەملەكەت تاراپىنان اقشالاي دا, زاتتاي دا كومەك كورسەتىلىپ جاتىر. مۇنىڭ بارلىعى – ادامنىڭ ءومىرىن ساقتاۋ ءۇشىن جاسالىپ جاتقان دۇنيە. حالىق وسىنى ءتۇسىنىپ, الىپ-قاشپا اڭگىمەلەرگە ەرىك بەرمەۋى كەرەك دەپ ەسەپتەيمىن. سوندىقتان ادامدار كارانتين ەرەجەلەرىن قاتاڭ ساقتاۋى ارقىلى ءبىر-بىرىنە عانا ەمەس, مەملەكەتكە دە كومەكتەسە الادى.
پرەزيدەنت مەنىڭ ارىپتەستەرىمە ۇستەمەاقى دا تاعايىندادى. بۇل مەملەكەت باسشىسىنىڭ مەديتسينا قىزمەتكەرلەرىنە دەگەن ۇلكەن قۇرمەتى, جوعارى باعاسى دەپ سانايمىن. تەك قانا مەديتسينا سالاسىنىڭ قىزمەتكەرلەرى عانا ەمەس, الدىڭعى شەپتە پوليتسيا قىزمەتكەرلەرى مەن جۋرناليستەر دە ءجۇر. ەرىكتىلەردىڭ دە ەڭبەگى ەرەن. مىنە, وسىلاردىڭ بارلىعى جۇدىرىقتاي جۇمىلىپ, ءبىزدىڭ ەلىمىزگە ءتان ءبىر-بىرىنە قامقور, جاناشىر بولا بىلەتىن كەرەمەت قاسيەتىن كورسەتۋدە. ال قاراپايىم ادامنىڭ بۇعان قوساتىن ۇلەسى – ءتارتىپ بۇزباۋ, ۇيىنەن شىقپاۋ.
جاقسىلىق دوسقاليەۆ,
مەديتسينا عىلىمىنىڭ دوكتورى, پروفەسسور, اكادەميك
