ەلباسى • 04 ءساۋىر، 2020

ەلباسى ايماق اكىمدەرىمەن نە تۋرالى سويلەستى - ءباسپاسوز حاتشىسى ءمان-جايدى ءتۇسىندىردى

65 رەتكورسەتىلدى

قازاقستان رەسپۋبليكاسىنىڭ تۇڭعىش پرەزيدەنتىنىڭ ءباسپاسوز حاتشىسى ايدوس ۇكىباي ەلباسى نۇرسۇلتان نازارباەۆتىڭ ايماق باسشىلارىمەن نە تۋرالى سويلەسكەنى تۋرالى اقپارات تاراتتى.

«كەشە قازاقستاننىڭ تۇڭعىش پرەزيدەنتى اكىمدەردىڭ بارىمەن تەلەفون ارقىلى سويلەستى. قازىرگى جاعدايعا بايلانىستى اڭگىمەنىڭ نەگىزگى وزەگى – توتەنشە جاعداي كەزىندە ازاماتتاردىڭ قاۋىپسىزدىگىن قامتاماسىز ەتۋ بولدى. نۇرسۇلتان نازارباەۆ حالىقتى قولداۋ جۇمىستارىن قىزۋ جۇرگىزىپ جاتقان ۆولونتەرلەر مەن باسقا دا ازاماتتاردىڭ دەنساۋلىعى ءۇشىن الاڭداۋشىلىق ءبىلدىردى. اۋرۋدى جۇقتىرۋ قاۋپىن ازايتۋ ءۇشىن ەلباسى ۆولونتەرلار مەن الەۋمەتتىك قىزمەتكەرلەردىڭ جۇمىس فورماتىن قايتا قاراۋدى ۇسىندى» دەيدى ايدوس ۇكىباي.

سونىمەن قاتار اڭگىمە بارىسىندا اكىمدەر نۇرسۇلتان نازارباەۆقا ايماقتاردىڭ قاجەت ەتەتىن ءار تۇرعىنىنا الەۋمەتتىك كومەكتى جەتكىزۋ ماقساتىندا قۇرىلعان «Birgemiz» قوعامدىق قورىمەن جۇمىستىڭ قالاي جۇرگىزىلىپ جاتقانىن بايان ەتكەن. ماسەلەن، اقمولا وبلىسىندا 3 مىڭعا جۋىق ادام قور ەسەبىنەن 50 مىڭ تەڭگە الادى.

«سولتۇستىكتەگى وڭىرلەردىڭ اكىمدەرىمەن سويلەسكەن كەزدە قازاقستاننىڭ تۇڭعىش پرەزيدەنتى سۋ تاسقىنىنا قارسى ءىس-شارالار مەن كوكتەمگى ەگىس ناۋقانىنا باسا نازار اۋداردى. اتاپ ايتقاندا، نۇرسۇلتان نازارباەۆ اگرارشىلاردىڭ دايىندىعىنا، اۋىل شارۋاشىلىعى تەحنيكالارىنىڭ جاي-كۇيى جايلى بىلگىسى كەلدى. ەلباسى اگرارشىلارعا سەنىم ءبىلدىرىپ، قيىندىقتارعا قاراماستان ولارعا جان-جاقتى كومەك كورسەتىلەتىنىن جەتكىزدى» دەيدى ول.

ايدوس ۇكىباي ودان بولەك قاۋىپسىزدىك كەڭەسى توراعاسىنىڭ وڭتۇستىكتەگى وبلىستاردىڭ باسشىلارىمەن سويلەسكەن كەزىندە ەلدىڭ بارلىق وڭىرىنە ازىق-ت ۇلىك جەتكىزۋدە وسى ايماقتاردىڭ ءرولى زور ەكەنىن ايتىپ وتكەنىن جازادى. تۇركىستان وبلىسىنىڭ اكىمى ومىرزاق شوكەەۆ ەرتە پىسەتىن كوكونىستەردى كەيبىر ايماققا جەتكىزۋ جۇمىستارى باستالىپ كەتكەنىن بايانداعان. سونىمەن قاتار ەلباسى تۇركىستان قالاسىنداعى قۇرىلىس جۇمىستارىنان حابار الدى. وبلىس اكىمى قۇرىلىس الاڭدارىنىڭ بارىندە سانيتارلىق-ەپيدەميولوگيالىق تالاپتار ساقتالاتىنىنا سەندىرىپ وتىر.

«الماتى وبلىسىنىڭ اكىمى اماندىق باتتالوۆپەن تەلەفون ارقىلى سويلەسكەندە نۇرسۇلتان نازارباەۆ الماتىلىق اپورت المانى جاڭعىرتۋ ءۇردىسى مەن وسى جىلى قانت قىزىلشاسىن جيناۋدىڭ ىشكى ءوسىمى تۋرالى سۇرادى. سونداي-اق باتتالوۆ ايماقتا تاعى دا 23 مىڭ جۇمىس ورنىن اشۋ مەن تالدىقورگان-ءۇشارال-دوستىق باعىتى بويىنشا اۆتوكولىك جولىنىڭ قۇرىلىسى تۋرالى باياندادى. ايماق باسشىلارىمەن سويلەسكەن كەزدە نۇرسۇلتان نازارباەۆ مەملەكەت ءوز ازاماتتارىن جان-جاقتى قورعايتىنىن جانە قازاقستاننىڭ بارلىق قيىندىقتى ەڭسەرەتىنىنە سەنىم ءبىلدىردى» دەيدى ايدوس ۇكىباي.

سوڭعى جاڭالىقتار

ۇقساس جاڭالىقتار