اڭگىمەلەسۋ بارىسىندا يزرايل ساياساتكەرى كوروناۆيرۋس ىندەتىنىڭ تارالۋىنا قارسى كۇرەستە قازاقستان حالقى مەن ۇكىمەتىنە قولداۋ كورسەتەتىنىن ايتتى.
ونىڭ ايتۋىنشا, يزرايل قازاقستان پرەزيدەنتىنىڭ COVID-19 ۆيرۋسىنىڭ ودان ءارى تارالۋىنا جول بەرمەۋ, شاعىن جانە ورتا بيزنەستى قولداۋ, سونداي-اق, حالىق الدىنداعى الەۋمەتتىك مىندەتتەمەلەردى ورىنداۋ جونىندەگى ناقتى ءىس-قيمىلدارى مەن شەشىمدەرىن مۇقيات باقىلاپ وتىر. رەۋۆەن ءريۆليننىڭ پىكىرىنشە, قازاقستان داعدارىسقا قارسى بارلىق شارالاردى دەر كەزىندە قابىلدادى جانە ونىڭ ءبارى پاندەميا جاعدايىندا ەلدىڭ قاۋىپسىزدىگىن قامتاماسىز ەتۋگە باعىتتالعان.
يزرايل پرەزيدەنتى قازىرگى ۋاقىتتا بۇكىل الەم ميلليونداعان ادامنىڭ جاپپاي ىندەت جۇقتىرۋىن بولدىرماۋ ءۇشىن قاتاڭ قادامدارعا بارىپ, ءتىپتى, وقشاۋلاۋعا جانە توتەنشە جاعداي جاريالاۋعا ءماجبۇر بولىپ وتىرعانىن ايتتى.
قاسىم-جومارت توقاەۆ كوروناۆيرۋس ىندەتىنىڭ ەكىنشى دۇنيەجۇزىلىك سوعىستان كەيىنگى ادامزاتقا تونگەن اسا قاۋىپتى قاتەر ەكەنىن اتاپ ءوتتى.
- بۇگىندە بۇكىل الەم پاندەميامەن ونىڭ سالدارىنا ءتيىستى جاۋاپ بەرۋ ماقساتىندا كۇش بىرىكتىرىپ, جۇمىلۋى قاجەت. وسىعان وراي قازاقستان اتالعان قاتەرگە قارسى تۇرۋ ءۇشىن وڭىرلىك جانە حالىقارالىق دەڭگەيدەگى ىنتىماقتاستىقتى جالعاستىرۋعا نيەتتى, - دەدى مەملەكەت باسشىسى.
رەۋۆەن ريۆلين ەكىجاقتى قارىم-قاتىناستاردى تالقىلاي وتىرىپ, قازاقستانمەن ساياسي, ەكونوميكالىق جانە مادەني-گۋمانيتارلىق ىنتىماقتاستىقتى ودان ءارى نىعايتۋعا قىزىعۋشىلىق ءبىلدىردى. وسىعان بايلانىستى ول قازاقستان پرەزيدەنتىن 2020 جىلى كۇزدە يزرايلگە ساپار جاساۋعا شاقىردى.
قازاقستان پرەزيدەنتى شاقىرۋدى ىلتيپاتپەن قابىل الدى جانە جاھاندىق پاندەميانىڭ سالدارىن جويعاننان كەيىن يزرايلمەن اراداعى ەكىجاقتى بايلانىستاردىڭ دامۋ قارقىنى تولىق قالپىنا كەلەتىنىنە سەنىم ءبىلدىردى.
