قازاق ەلى ءوزىنىڭ اتا زاڭىنا 18 جىل تولۋ مەرەكەسىن بەيبىتشىلىك جانە كەلىسىم سارايىندا سالتاناتتى جاعدايدا اتاپ ءوتىپ, ەلدىڭ باس قۇجاتى قۇرمەتىنە قازاقستاندىق ونەر شەبەرلەرى ءان مەن جىردان شاشۋ شاشتى. ەڭ باستى بايلىق – ادام مەن ونىڭ ءومىرى, قۇقىعى مەن بوستاندىعى, تاڭداۋ-تاعىلىمى انىق ايشىقتالعان ەل كونستيتۋتسياسى كۇنىنە ارنالعان مەرەكەلىك شارانى مەملەكەتتىك حاتشى مارات ءتاجين, مادەنيەت جانە اقپارات ءمينيسترى مۇحتار قۇل-مۇحاممەد جانە باسقا دا مەملەكەتتىك ورگانداردىڭ جاۋاپتى قىزمەتكەرلەرى, مادەنيەت پەن ونەر قايراتكەرلەرى, ەلورداداعى ديپلوماتيالىق كورپۋستىڭ وكىلدەرى مەن قوناقتار كەلىپ تاماشالادى.
قازاق ەلى ءوزىنىڭ اتا زاڭىنا 18 جىل تولۋ مەرەكەسىن بەيبىتشىلىك جانە كەلىسىم سارايىندا سالتاناتتى جاعدايدا اتاپ ءوتىپ, ەلدىڭ باس قۇجاتى قۇرمەتىنە قازاقستاندىق ونەر شەبەرلەرى ءان مەن جىردان شاشۋ شاشتى. ەڭ باستى بايلىق – ادام مەن ونىڭ ءومىرى, قۇقىعى مەن بوستاندىعى, تاڭداۋ-تاعىلىمى انىق ايشىقتالعان ەل كونستيتۋتسياسى كۇنىنە ارنالعان مەرەكەلىك شارانى مەملەكەتتىك حاتشى مارات ءتاجين, مادەنيەت جانە اقپارات ءمينيسترى مۇحتار قۇل-مۇحاممەد جانە باسقا دا مەملەكەتتىك ورگانداردىڭ جاۋاپتى قىزمەتكەرلەرى, مادەنيەت پەن ونەر قايراتكەرلەرى, ەلورداداعى ديپلوماتيالىق كورپۋستىڭ وكىلدەرى مەن قوناقتار كەلىپ تاماشالادى.
كۇنتىزبەدەگى قىزىلمەن ەرەكشە بەدەرلەنگەن ءار مەرەكەنىڭ ومىرىمىزدەن ويىپ تۇرىپ الاتىن وزىندىك ورنى بار. سونىڭ ىشىندە جۇرتتىڭ ءبارى وتە ءبىر جاۋاپكەرشىلىكپەن اتاپ وتۋگە ءتيىستى وسى كۇننىڭ ءباسى مەن رۋحى باسقالارىنا قاراعاندا ەرەكشەلەۋ بولىپ كورىنۋىندە ۇلكەن ءبىر سىر بارداي تۇيىلەدى. وتىزىنشى تامىز. جادىراعان جازدىڭ جامالى از ۋاقىتتا التىن جالقىنعا ورانىپ شىعا كەلمەك. ەلدىك پەن تەڭدىكتى جىرلايتىن مەرەيلى مەرەكە تابيعات-انانىڭ تامىلجىعان تاپ وسى مەزەتىنە ءدوپ كەلۋى كەزدەيسوق سايكەستىك ەمەس سياقتى. ەگىن ورىلىپ, ەل ىرزىعى ەسەلەنىپ, دالا جاڭعىرىعىنا بالا جاڭعىرىعى قوسىلاتىن قىركۇيەگىڭ يەك استىندا تۇر. قامبا دا, قازان دا قايناعان شاق. ءتول مەرەكەگە جۇرتتىڭ ەرەكشە ىقىلاستانۋىنان تىرشىلىك بازارىن اڭعارعاندايسىز.
...دالانىڭ ابىز كۇيشىسى قۇرمانعازىنىڭ «سارىارقا» كۇيىمەن تاماشا تاعىلىم باستالعانىنا تامسانعان قاۋىم «سازگەن سازى» فولكلورلىق-ەتنوگرافيالىق انسامبلىنە, « ۇلىتاۋ» توبىنا, «سەرپەر» دومبىراشىلار انسامبلىنە, وزگە ۇلتتىڭ ۇل-قىزدارى بولعانمەن جانىنا قازاقتىڭ قارا دومبىراسىن سەرىك ەتكەن ولگا جەلتۋحينا, گەورگي يۋگاي, اندرەي فەندريكوۆ پەن ميحايل گلازىرين سىندى ورىنداۋشىلارعا ريزاشىلىقپەن قول سوقتى. جەكەلەگەن دومبىراشىلار مەن فولكلورلىق ءانسامبلدىڭ, ەسترادالىق توپتىڭ قوسىلىپ ونەر كورسەتۋى نەكەن-ساياق قۇبىلىس بولىپ سانالادى. بىراق ءۇش ءتۇرلى ءۇننىڭ ۇزىلمەي, ءوزارا ۇيلەسىمدى جاراسىپ, ورتاق ماقساتقا توعىسۋىنان «سارىارقا» كۇيى ومىرشەڭدىگىن تاعى دا تانىتا تۇسپەسە, اتىنا نۇقسان تيگەن جوق.
قازاقتىڭ حالىق ءانى «بۇلدىرگەندى» قر ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى مايرا مۇحامەدقىزىنىڭ جۇرتتى داۋىسىنا ۇيىتىپ, جۇرەگىمەن بەرىلە سالۋىنان قازاق ۇلتتىق ءان مەكتەبىنىڭ تاعىلىمدى جالعاسى سەزىلدى. حالىق تاعى ءبىر توسىن سىيدى توسىرقاماي قارسى الدى. ۇكىلى ىبىرايدىڭ اتاقتى «گاككۋ» ءانىن بىلمەيتىن قازاق كەم دە كەم. عاجايىپ شىعارما سوڭعى ۋاقىتتا كلاسسيكالىق ۇلگىمەن دە, ەسترادالىق جانرمەن دە شىرقالىپ ءجۇر. ال بىراق وسى ەكەۋىن بىرىكتىرە بىلسە, بۇل ءبىر كەلەشەكتە دامىتا تۇسۋگە بولاتىن, قولداۋعا تۇراتىن ۇلگى ەكەن. قازىرگى قازاق ەستراداسىنىڭ بەلگىلى وكىلى مەدەۋ ارىنباەۆ پەن وپەرا جۇلدىزى مايرا مۇحامەدقىزىنىڭ قوسىلىپ ورىنداعان ءانى حالىقتىق ءىنجۋ-مارجانداردىڭ كەرەمەتتىگىنە كوز جەتكىزدى.
قاراعاندىلىق «اققۋ» بي ءانسامبلىنىڭ ورىنداعان «بي كۇيى», «ىڭعاي توك» بيلەرى سۇيىسپەنشىلىكپەن قابىلداندى. كۇمىس بازارباەۆا, ايدوس جاباعين, تولقىن زابيروۆا, يگور بلاگودارنىي, ت. ب. ونەر شەبەرلەرى مەرەكەلىك كەشتى اسەم جىرمەن كوركەمدەسە, «مۇزارت» توبىنىڭ ورىنداۋىندا شىرقالعان ن.ايت ۇلى مەن ج.داۋلەتتىڭ «قازاق ەلى» ءانى جاس وركەننىڭ جۇرەگىندەگى پاتريوتيزم شوعىن ۇرلەدى. قازاقستاننىڭ حالىق ءارتىسى ەسكەندىر حاسانعاليەۆ پەن حالىقارالىق بايقاۋلاردىڭ لاۋرەاتى ءبىرجان حاسانعاليەۆ سالعان «اتامەكەن» ءانى كەڭ سارايدى اسقاق رۋحپەن ەڭسەلەندىرىپ, ءار ادامنىڭ جانىنا سەزىم قاناتىن سەلكەۋسىز قوندىرعانداي.
قاراشاش توقسانباي,
«ەگەمەن قازاقستان.
________________________
سۋرەتتەردى تۇسىرگەن ەرلان وماروۆ.
