اتاپ ايتقاندا, وقۋ ورنىنىڭ پەداگوگيكا جانە پسيحولوگيا فاكۋلتەتىنىڭ ۇجىمى الماتى قالاسىنىڭ پودەزدەرى مەن اۋلالارىن دەزينفەكتسيالاۋ جۇمىستارىنىڭ كۇشەيۋىنە بايلانىستى تۋىنداعان جاعدايعا وراي مەديتسينالىق قىزمەتكەرلەر ءۇشىن ۋنيۆەرسيتەت جاتاقحانالارىندا ارنايى جاتىن ورىندار دايىندالدى.
فاكۋلتەت دەكانى سايرا جيەنباەۆانىڭ ايتۋىنشا, بۇل ىسكە وقىتۋشىلاردىڭ وزدەرى ىنتالى بولىپ, باستاما تانىتقان.
«الماتىداعى كارانتين رەجيمىنىڭ كۇشەيۋىنە بايلانىستى وبلىس اۋماعىندا تۇراتىن مەديتسينالىق قىزمەتكەرلەردىڭ قالاعا كىرىپ-شىعۋىنا شەكتەۋ قويىلماق. مالىمەتتەرگە سۇيەنەر بولساق, ولاردىڭ باسىم بولىگى كىشى مەديتسينالىق پەرسونالدار مەن مەدبيكەلەر. اق حالاتتىلاردىڭ قالىپتى جۇمىس ىستەۋىنە قولايلى جاعداي جاساۋ ماقساتىمەن وسىنداي ىسكە ۇيىتقى بولۋدى ۇيعاردىق. بۇل شارا - ۋنيۆەرسيتەت وقىتۋشىلارىنىڭ ەلىمىزدە قالىپتاسىپ وتىرعان جاعدايعا بەيجاي قاراي المايتىنىن كورسەتەدى» دەيدى س. جيەنباەۆا.
قازىرگى كۇندە 400-گە جۋىق توسەك-ورىن دايىندالعان. سونىمەن قاتار ءاربىر بولمەدە ارنايى دەزيفەكتسيالىق جۇمىستار دا جۇرگىزىلدى. الداعى كۇندەرى وعان دەنساۋلىق ساقتاۋ سالاسىنىڭ قىزمەتكەرلەرى ورنالاسا باستاماق.
«وسى ورايدا ايتا كەتەيىن, قازاقستان پرەزيدەنتى قاسىم-جومارت توقاەۆ 16 ناۋرىز كۇنى ەل حالقىنا ۇندەۋ جولدادى. مەملەكەت باسشىسى ءوز ۇندەۋىندە بۇكىل حالىقتى جۇدىرىقتاي جۇمىلۋعا شاقىرىپ, قالىپتاسقان كۇردەلى جاعدايدى وتانداستارىمىزبەن بىرگە ەڭسەرەتىنىمىزگە سەنىم بىلدىرگەن بولاتىن. بارشاڭىزعا بەلگىلى, بۇگىندە ەلىمىزدە ء"بىز بىرگەمىز!" جالپىۇلتتىق اكتسياسى وتۋدە. وعان ەلجاندى ازاماتتاردىڭ بارلىعى دا وزىندىك ۇلەستەرىن قوسۋدا. ازاماتتىعىمىز بەن ەلدىگىمىز سىنالار ساتتە قولعا الىنعان وسىناۋ يگىلىكتى ءىس پاراسات پەن تاعىلىم ورداسى قازاق ۇلتتىق قىزدار پەداگوگيكالىق ۋنيۆەرسيتەتىندە وسىلاي جالعاسىن تاپتى» دەپ اتاپ ءوتتى وقۋ ورنىنىڭ ءباسپاسوز قىزمەتىنىڭ جەتەكشىسى جاندار اسان.
