بۇل تۋرالى G20 تەلەكونفەرەنتسياسىندا حالىقارالىق ۆاليۋتا قورىنىڭ باسشىسى كريستالينا گەورگيەۆا مالىمدەدى. «كوروناۆيرۋس پاندەمياسىنا بايلانىستى قازىرگى تاڭدا كوپتەگەن ەلدىڭ بانكتەرى ساياساتىن وزگەرتىپ, ەل جاعدايىنا وراي ارەكەت ەتىپ وتىر. ۆيرۋستىڭ تارالۋىنا بايلانىستى ادام شىعىنى كوپ. ەكونوميكا دا قۇلدىراي باستادى. وسىعان بايلانىستى الەم ەلدەرى كۇش جىگەرىن ىندەتتى جەڭۋگە جۇمىلدىرىپ, نەعۇرلىم ەكنوميكالىق شىعىندى شەكتەۋگە ۇمتىلۋى ءتيىس» دەدى ول.
الەمدىك ەكونوميستەردىڭ بولجامىنشا, COVID-19 ۆيرۋسىنىڭ زاردابىن ەكونوميكا سالاسى ءالى دە تارتادى. ۆيرۋس نەعۇرلىم جىلدام اۋىزدىقتالسا, سوعۇرلىم ەكونوميكا تەز قالپىنا كەلمەك. قازىردىڭ وزىندە الەمنىڭ 80-گە جۋىق ەلى حالىقارالىق ۆاليۋتا قورىنان كومەك سۇراعان. ولاردىڭ ماسەلەسىن وڭتايلى شەشۋ ءۇشىن قور بىرقاتار حالىقارالىق قارجى ينستيتۋتتارىمەن بىرلەسىپ, جۇمىستار جۇرگىزۋدە.
مامانداردىڭ پىكىرىنشە, دۇنيەجۇزىن دۇربەلەڭگە سالعان پاندەميا ەكونوميكاسى قارقىندى دامىعان ەلدەردەن گورى دامۋشى ەلدەردىڭ ەكونوميكاسىنا وراسان شىعىن اكەلمەك. دەگەنمەن دە قۇلدىراعان ەكونوميكا 2021 جىلى قايتادان قالپىنا كەلەدى, دەيدى ەكونوميستەر.
قىمبات نۇرعالي
