ايماقتار • 24 ناۋرىز، 2020

الماتى وبلىسى: توتەنشە جاعداي ءتارتىبىن بۇزعان 4 ادام 5 تاۋلىككە قامالدى

51 رەتكورسەتىلدى

الماتىنىڭ تولىقتاي وقشاۋلانۋىنا بايلانىستى قالادان شىعاتىن جولدار جابىق. قازىر پوليتسيا مەن اسكەر بولىمدەرى مەگاپوليستىڭ ءتورت قۇبىلاسىن تولىقتاي باقىلاۋعا العان. اسىرەسە، قالا ىرگەسىندەگى اۋدانداردان شىعاتىن ىشكى جولدارعا كۇزەت كۇشەيتىلدى.

بىراق، ەسكەرتۋ مەن تيىمعا قاراماستان قالاعا زاڭسىز جولمەن كىرۋگە ارەكەت جاساۋشىلار قاتارى ازايماي تۇر. سوڭعى 4 كۇن ىشىندە وبلىس اۋماعىنداعى توسقاۋىل بەكەتتەرىن اينالىپ وتۋگە تىرىسقان ازاماتتار 5 تاۋلىككە قاماققا الىندى. مىسالى، ءتورت ازامات الماتى قالاسىمەن شەكاراداعى توسقاۋىلبەكەتتەرىن زاڭسىز اينالىپ وتۋگە ارەكەت ەتكەن.

- 1986 جىلى تۋعان تۇركىستان قالاسىنىڭ تۇرعىنى توتەنشە جاعداي ءتارتىبىن بۇزىپ، الماتى قالاسىنىڭ اۋماعىنا «اقساي» وزەنى ارقىلى جاسىرىن وتۋگە تىرىسقان. 1968 جىلى تۋعان الماتى وبلىسىنىڭ تۇرعىنى دا وسى جولمەن كارانتين جاريالانعان اۋماققا وتۋگە ارەكەتتەندى. تاعى ءبىر وبلىس تۇرعىنى ىلە اۋدانىنىڭ المەرەك ەلدى مەكەنىنىڭ ماڭىنداعى №22 توسقاۋىل بەكەتى جانىندا ۇستالدى. ءتورتىنشى قۇقىق بۇزۋشى، 2000 جىلى دۇنيەگە كەلگەن قىرعىز ەلىنىڭ ازاماتشاسى بولىپ شىقتى. شەتەل ازاماتىنىڭ جەكە باسىن كۋالەندىرەتىن ەشقانداي قۇجاتتارى جوق ەكەن. قازىرگى جاعدايدا اتالعان ازاماتتاردىڭ ارەكەتتەرى قولدانىستاعى زاڭناماعا سايكەس قاتاڭ جازالاناتىن بولادى،- دەپ حابارلادى جۋرناليستەرگە قاراساي اۋدانى پوليتسيا باسقارماسىنىڭ باستىعى، پوليتسيا پولكوۆنيگى اسحات دانيار.

ۇستالعان ءتارتىپ بۇزۋشىلارعا اكىمشىلىق كودەكستىڭ 476-بابىنا سايكەس حاتتاما تولتىرىلدى. ولار مامانداندىرىلعان اۋدانارالىق سوتتىڭ شەشىمىمەن 5 تاۋلىك مەرزىمگە قاماۋعا الىندى. ال، قىرعىز ەلىنىڭ ازاماتى جەكە باسى تۋرالى دەرەكتەر انىقتالعانعا دەيىن قاماۋعا الىنىپ، ول قابىلداۋ-تاراتۋ مەكەمەسىنە ورنالاستىرىلعان.

سوڭعى جاڭالىقتار

ۇقساس جاڭالىقتار