اتاپ ايتقاندا, رەسەي, ءباا, نيدەرلاند جانە بەلارۋس مەملەكەتتەرىنىڭ وڭتايلى اۋە جولدارى ارقىلى ترانزيتپەن جەتۋلەرىنە ءوز سەپتىگىن تيگىزدى.
ماسەلەن, 19 ناۋرىزدا قازاقستاننىڭ ءتورت ازاماتى ريو-دە-جانەيرودان لوندونعا, ودان كەيىن حەلسينكي ارقىلى قازاقستانعا ۇشۋلارى كەرەك بولاتىن. رەيستىڭ توقتاتىلۋىنا جانە بريتانيالىق ۆيزالارىنىڭ بولماۋىنا بايلانىستى ولار لوندوندىق اۋەجايدىڭ ترانزيتتىك ايماعىندا ءماجبۇرلى تۇردە قالىپ قويدى. ەلشىلىك ترانزيتتىك مارشرۋت ايماقتارىندا ورنالاسقان كونسۋلدارمەن اقىلداسا وتىرىپ, ولاردىڭ لوندوننان قازاقستانعا تەزىرەك جەتۋلەرىنە قول ۇشىن سوزدى.
20 ناۋرىزدا قازاقستاننىڭ ءۇش ازاماتى لوندوننان قازاقستانعا رەسەي ارقىلى ترانزيتپەن ۇشا المادى. ءدال سول كۇنى ولارعا «اەروفلوت» اۋە كومپانياسىنىڭ رەيسى ارقىلى ەلگە ورالۋلارىنا جاعداي جاسالدى.
21 ناۋرىزدا ەلشىلىكتەن كومەك سۇراعان يسلاندياداعى قازاقستان ازاماتشاسىنا دا جاردەم بەرىلدى. ول دا ترانزيتتىك ايماقتارداعى كونسۋلداردىڭ كومەگىمەن تۋعان جەرگە جەتتى.
22 ناۋرىزدا قازاقستاننىڭ 11 ازاماتى لوندوننان قازاقستانعا امان-ەسەن ورالدى. رەيستەردىڭ بولماۋىنا بايلانىستى ەكى ەرەسەك جانە توعىز كامەلەتكە جاسى تولماعان وتانداستارىمىزعا لوندوننان قازاقستانعا ابۋ-دابي جانە دۋبايداعى اۋەجايلار ارقىلى جەتۋگە جاعداي جاسالدى. اتا-اناسىز جۇرگەن كامەلەتكە جاسى تولماعان قازاقستاندىقتارعا ەركىن ءجۇرىپ-تۇرۋلارى ءۇشىن ىلەسپە قۇجاتتار رەسىمدەۋگە كومەك بەرىلدى.
23 ناۋرىزدا كامەلەتكە جاسى تولماعان وتانداسىمىز لوندوننان قازاقستانعا امان-ەسەن جەتتى. وعان دا لوندون-دۋباي-نۇر-سۇلتان باعىتى بويىنشا ەركىن ءجۇرىپ-تۇرۋى ءۇشىن ىلەسپە قۇجاتتار دايىندالىپ بەرىلدى.
قر ۇلىبريتانياداعى ەلشىلىگىنىڭ كونسۋلدىق قىزمەتكەرلەرى اككرەديتاتسيا ەلدەرىنەن قازاقستانعا بارۋ ءۇشىن رەيستەردىڭ قولجەتىمدىلىگىن ۇدايى زەردەلەپ وتىرادى. سونىمەن قاتار لوندون قالاسى اۋەجايلارىنداعى رەيستەرگە تىركەۋ راسىمدەرىنىڭ قامتاماسىز ەتىلۋىنە جاعداي جاسايدى.
بۇعان قوسا قازاقستان ازاماتتارى ءۇشىن ەلشىلىكتە تاۋلىك بويى جۇمىس ىستەيتىن «جەدەل جۇيە» قىزمەت ەتەدى: +44 (0) 7717 609987, +44 (0) 7570 654654, +44 (0) 7928 389693.
