ايماقتار • 22 ناۋرىز، 2020

الماتى وبلىسى: جىلقىنى GPS باعادى

86 رەتكورسەتىلدى

بىلتىر «Zhersu» ينۆەستيتسيالىق-وندىرىستىك كورپوراتسياسى الماتى وبلىسىنىڭ الاكول اۋدانىڭ اۋماعىنان اسىل تۇقىمدى جىلقى فەرماسىن اشقان بولاتىن. وڭىردەگى قىلقۇيرىقتىڭ سانىن ارتتىرىپ، تۇقىمىن جانداندىرۋعا وراي باستالعان ءىس ناتيجەلى ءجۇرىپ جاتىر. قازىر قىستان شىققان 10 000 باس جىلقى جايىلىمدا ءجۇر.

«الاكول اسىل جىلقىسى» سەرىكتەستىگىنىڭ جۇمىسى زامانعا ساي تەحنولوگيا جەتىستىكتەرىمەن جابدىقتالعان ەكەن. اۋەلى فەرماداعى تۇرعىندارعا قولايلى جاعداي جاسالعان. 56 ادام جۇمىس ىستەيدى ەكەن. تۇرعىن ءۇي، جاتاقحانا بار. مۇندا مونشا، دۇكەن، اسحانا سياقتى قاجەتتى نىسانداردان بولەك مادەني كوپشىلىك دەمالىس شاراسىن وتكىزۋگە بولادى. ياعني، قۇرىلتاتسيشىلار جىلقىشىلار ءۇشىن كينوتەاتر مەن كىتاپحانا اشىپ بەرىپتى.

فەرمادا مال باعۋدىڭ دا جاڭاشا ءتاسىلى جۇزەگە اسىپ وتىر. ەندىگى جىلقىنى بۇىنعىداي قۇرىققا سۇيەنىپ، ىزىنەن اڭدىپ باعاتىن كەزەڭ كەلمەسكە كەتىپتى. قازىر قامبار اتا بالاسىنىڭ ءجۇرىس-تۇرىسىن، جايىلىمداعى ءجۇرىسىن مونيتوردان باقىلاپ وتىرۋعا مۇمكىندىك بار. مۇنداعى اسىل تۇقىمدى ءار باسقا GPS بايلانعان. ياعني، جىلقىنى قۇرىق ۇستاعان جىلقىشى ەمەس، جۇدىرىقتاي قۇرىلعى باعادى.

- فەرما وتكەن جىلدىڭ قاراشا ايىندا ىسكە قوسىلدى. بۇل جوبانى جىلقى تۇقىمىن اسىلداندىرۋ ماقساتىنداعى قولعا الىپ، 1 ميلليارد تەڭگەگە جۋىق ينۆەستيتسيا سالدىق. قازىر ماقساتىمىزدىڭ ءبىرىنشى كەزەڭىن اياقتادىق دەۋگە بولادى. ازىرگە اسىل تۇقىمدى جىلقى سانىن 10 000 باسقا جەتكىزدىك. بيىل، بۇيىرسا، تاعى 10 000 باس جىلقى اكەلسەك دەگەن جوسپار بار. قىلقۇيرىقتى ماڭعىستاۋ، قاراعاندى، شىعىس قازاقستان وبلىستارىنان ساتىپ الدىق. رەسەيدەن اكەلىنگەنى دە بار. جىلقىعا قوسىمشا تۇيە شارۋاشلىعىن دامىتۋدى قولعا الۋدامىز، - دەيدى «Zhersu» ينۆەستيتسيالىق-وندىرىستىك كورپوراتسياسى باقىلاۋ كەڭەسىنىڭ توراعاسى باۋىرجان وسپانوۆ.

ايتپاقشى، بۇل «Zhersu» كورپوراتسياسىنىڭ الاكول اۋدانىنداعى جالعىز مال فەرماسى ەمەس. ءبىراز جىل بۇرىن ىسكە قوسىلعان «قايىڭدى» مال بورداقىلاۋ الاڭى مەن ەت وڭدەۋ زاۋىتى قازىر نارىقتاعى ءوز ورىنىن تاپقان كاسىپورىن ساناتىنا كىرەدى. 5 000 باسقا ارنالعان بورداقىلاۋ الاڭى بار. جەمدەۋدەگى سيىردىڭ دەنى اسىل تۇقىمدى ەكەن. ءاۋ باستا گەرەفورد جانە انگۋس تۇقىمدى 4500 باس سيىر اكەلىنىپتى. ال زاۋىتتىڭ مال سويۋ تسەحىندا كۇنىنە 60 باسقا دەيىن مال سويىلادى. ال «قايىڭدىنىڭ» شۇجىق تسەحىندا جاسالعان ءونىم قازىر قازاقستان نارىعىن جاۋلاپ العان. تسەح تاۋلىگىنە 6 تونناعا دەيىن دايىن ءونىم شىعارادى. نارىققا 18 ءتۇرلى شۇجىق جونەلتىپ وتىر.

جالپى، سالىستىرمالى تۇردە العاندا الماتى وبلىسىندا مال باسىنىڭ ءوسۋى مەن ءونىمى ورتا ەسەپپەن 4،5 پايىزعا وسكەن ەكەن. ايماقتا 102 اسىل تۇقىمدى مال بورداقىلاۋ الاڭى قۇرىلعان. الىس-جاقىن شەتەلدەن 10 مىڭ باسقا  جۋىق ءىرى قارا اكەلىنىپتى. جۇيەلى جۇمىستىڭ ناتيجەسى تۇتاس اگروونەركاسىپ كەشەننىڭ دامۋىنا الماتى وبلىسىنىڭ قوسقان ۇلەسىن ارتتىرىپ وتىر. بىلتىر بۇل كورسەتكىش 20 پايىزعا جەتتى. بيىل دا قازان اۋىزى جوعارى دەپ وتىرمىز. ويتكەنى، وڭىردەگى 1 ميلليوننان باس ءىرى قارا مالى مەن 4 ميلليوننان استام ۇساق مال باسى بار. مۇندا اگروونەركاسىپ كەشەنىنىڭ كەلەشەگىن انىقتايتىن سالماق جاتىر...

 

الماتى وبلىسى

سوڭعى جاڭالىقتار

بەنزين باعاسى ارزاندادى

ەكونوميكا • كەشە

14 وتباسىعا قول ۇشىن سوزدى

قازاقستان • كەشە

ۇقساس جاڭالىقتار