الەمنىڭ ادام ءولىمى مەن ءومىرىن زەرتتەۋشى ءبىر توپ دارىگەرلەرى ەندى ءولىپ بارا جاتقان ادامنىڭ ءتانى ۇستىنە جانىنىڭ قالاي شىعىپ تۇراتىنىن وزدەرىنشە دالەلدەپ شىقتى. بۇل تۋرالى The Sunday Times گازەتىنىڭ سىلتەمەسىنە سۇيەنگەن Inopressa.ru حابارلادى.

دارىگەرلەر مۇنى «و دۇنيەدەن ورالعان ادامداردىڭ» كوڭىل تولقۋىنان پايدا بولاتىن قۇبىلىس دەپ ەسەپتەپ وتىر.

«ءولىپ بارا جاتقان پاتسيەنتتەردىڭ ەلەكتروەنتسوفالوگرامماسىن زەرتتەۋ ونىڭ ولەر الدىنجا ەلەكترلىك بەلسەندىلىگىنىڭ ارتا تۇسەتىنىن كورسەتتى», - دەيدى وسى ورايدا ماقالا اۆتورى دجوناتان ليك.

عالىمدار بۇل كوتەرىلۋدى كلينيكالىق ءولىمدى باستان كەشكەن كىسىلەردىڭ تەسكەنتاۋ اسىپ, جارىققا كەزىگەتىن, ءوز دەنەسىنىڭ ۇستىندە قالىقتاپ تۇراتىن قالىپتارى ولاردىڭ ولىمگە بايلانىستى قاتتى تولقۋعا تۇسۋىنەن تۋىندايتىن جۇمباق مەديتسينالىق قۇبىلىستان پايدا بولادى دەپ پايىمدايدى.

«مۇنداي سەزىم مەن كوڭىل-كۇيدى ءدىني نانىم-سەنىمدەرمەن بايلانىستىرا قارايتىن جۇرتتىڭ كوپشىلىگى وسىدان الداعى شىن دۇنيە تۋرالى تەوريانىڭ راسقا اينالعانى رەتىندە قابىلدايدى», دەلىنگەن بۇدان ارى ماقالادا.

«ءبىز ءولىم حالىندەگى مۇنداي احۋالداردى ميعا اۋا جەتپەي جاتقان كەزدە سۋىرىلىپ شىعاتىن ەلەكتر قۋاتىنىڭ كوتەرىلۋىمەن تۇسىندىرۋگە بولادى دەپ ويلايمىز», دەيدى ۆاشينگتونداعى دجوردج ۆاشينگتون ۋنيۆەرسيتەتى مەديتسينالىق ورتالىعى جانساقتاۋ ءبولىمىنىڭ دارىگەرى لاكحمير چاۆلا.

«قان اينالىمى باياۋلاعان كەزدە وتتەگىنىڭ دە دەڭگەيى تۇسەدى, سونىڭ سوڭىندا ميدىڭ كلەتكالارى سوڭعى ەلەكتر ءدۇمپۋىن بەرىپ قالادى. ول ميدىڭ ءبىر بولىگىنەن باستالىپ, قالعان جاعىنا كوشكىن تارىزدەنىپ تاراي باستايدى. وسى ءسات ادامدارعا ءتىرى جاننىڭ مەنتالدى سەزىنۋىن بەرە الادى», دەپ تۇسىندىرەدى ول مۇنى.

چاۆلانىڭ Journal of Palliative Medicine جۋرنالىندا جارىق كورگەن زەرتتەۋ جۇمىسى ءولىم توڭىرەگىندە ناقتى فيزيولوگيالىق تۇسىندىرمە بەرگەن ءبىرىنشى ىرگەلى ەڭبەك بولىپ تابىلادى.
 مۇرات ايتقوجا.