الەۋمەتتىك جەلىدە تاراعان ۆيدەو اقساي قالاسىنداعى جانار-جاعار ماي قۇيۋ ستانساسىندا تۇسىرىلگەن. بەينەجازبا اۆتورى مۇندا ءبىر ادامنان ۆيرۋس انىقتالعانىن جانە جەدەل جاردەمنىڭ كەلگەنىن ايتادى.
بقو پوليتسيا دەپارتامەنتىنىڭ رەسمي وكىلى بولاتبەك بەلگىبەكوۆتىڭ مالىمەتىنشە, ۆيدەو 18 ناۋرىز كۇنى تۇسىرىلگەن. ونىڭ اۆتورى - اقساي قالاسىنىڭ 32 جاستاعى تۇرعىنى حالىقتان كەشىرىم سۇرادى.
«روليك ءتۇسىرىپ, وندا كەنىش قىزمەتكەرلەرىنىڭ ءبىرى ۆيرۋس جۇقتىرعانى جونىندە ايتقانىم ءۇشىن كەشىرىم سۇرايمىن. بۇل - جالعان. انىق اقپاراتتى تەك رەسمي كوزدەردەن الۋعا بولادى», دەدى ول.
«بۇل ادامعا وسىنداي ارەكەتى ءۇشىن ەسكەرتۋ جاسالدى. سەبەبى ول تەك ۆيرۋس دەپ ايتقان, اۋزىنان كوروناۆيرۋس دەگەن ءسوز شىقپاعان. وعان قوسا, ىستەگەن ىسىنە وكىنىپ, جۇرتشىلىقتان كەشىرىم سۇراعاندىقتان, جاۋاپكەرشىلىككە تارتىلعان جوق», دەدى قازاقپارات تىلشىسىنە ب.بەلگىبەكوۆ.
بۇعان دەيىن حابارلاعانىمىزداي, بقو-دا يتاليا, يسپانيا, گەرمانيادان كەلگەن 16 ادام كارانتيندە جاتىر.
توتەنشە جاعداي كەزىندە ورالدىق ۆولونتەرلەر كوپبالالى انالارعا ماسكا مەن انتيسەپتيكتەر تاراتۋدا.
الايدا, قازىرگى جاعدايدا مەديتسينالىق بەتپەردەلەرگە تاپشىلىقتى پايدالانىپ, ولاردى قىمبات باعاعا ساتقاندار دا انىقتالۋدا.
