كەشە تاڭەرتەڭ دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ الماتىعا 15 ناۋرىزدا ماسكەۋدەن كەلگەن رەسەي ازاماتىنىڭ جۇقپالى دەرتپەن تىركەلگەنىن حابارلادى. 1979 جىلعى ناۋقاس كارانتينگە جاتقىزىلدى.
تۇستەن كەيىن د.احمەتشارىپ نۇر-سۇلتان قالاسىندا تاعى 7 ناۋقاستىڭ انىقتالعانىن ايتتى. رەسمي وكىلدىڭ حابارلاۋىنشا, ولاردىڭ بارلىعى 25-52 جاس ارالىعىنداعى قازاقستان ازاماتتارى. بۇلار بۇرىن اۋىرعان ادامدارمەن بايلانىستا بولعان. «قازىر ولار ستاتسيوناردا. كارانتيندە ەمدەلىپ جاتىر. جاعدايلارى جاقسى», دەدى ول.
نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا باس قالادا كوروناۆيرۋس جۇقتىرعاندارمەن جاقىن بايلانىستا بولعان ادامداردىڭ ءبارى انىقتالعانىن ايتتى. «نۇر-سۇلتاندا كوروناۆيرۋس جۇقتىرعاندارمەن جاقىن بايلانىستا بولعان ادامداردى, ياعني وتباسى مۇشەلەرىن جانە ۇشاق بورتىندا ەكى ورىندىق بويىنشا قاشىقتىقتا بولعانداردى انىقتاۋ جۇمىسى اياقتالدى. قازىرگە دەيىن نۇر-سۇلتان قالاسىنىڭ ستاتسيونارلارىنا 138 ادام اۋرۋحاناعا جاتقىزىلدى. ەلوردادان شىعىپ كەتكەندەر وڭىرلەردەگى اۋرۋحانالار مەن ينفەكتسيالىق ستاتسيونارلارعا جاتقىزىلدى. 323 ادام ءۇي كارانتينىندە. سوڭعى تىركەلگەن ناۋقاستار بۇرىن كوروناۆيرۋس انىقتالعان ادامدارمەن بايلانىستا بولعان ادامدار. ولار بىردەن ءۇي كارانتينىنە وقشاۋلانىپ, ولارعا لابوراتوريالىق زەرتتەۋ جۇرگىزىلدى», دەدى ول.
سونىمەن كەشە كەشتەگى اقپارات بويىنشا ەلىمىزدە ىندەت جۇقتىرعانداردىڭ سانى الماتى قالاسىندا – 19 ادام, نۇر-سۇلتان قالاسىندا 25 ادام بولىپ, ەل بويىنشا جالپى سانى 44-كە جەتتى.
