اكىم ورىنباسارىنىڭ ايتۋىنشا, قالا پەريمەترى بويىنشا تۇرعىنداردىڭ قوزعالىسى مەن كولىكتەردىڭ كىرىپ-شىعۋىن رەتتەۋ ءۇشىن قالا شەڭبەرىندە 7 بلوك-بەكەت ورناتىلعان. قورعانىس مينيسترلىگىنىڭ ءتيىستى قىزمەتكەرلەرى جانە سانيتارلىق-ەپيدەميالىق قىزمەتتىڭ وكىلدەرى, سونداي-اق ىشكى اسكەر قىزمەتكەرلەرى بلوك-بەكەتتەردە قىزمەت اتقارادى. «قالا باسشىلىعى تالاپكەر, قاراوتكەل (يلينكا), قوياندى, قوسشى, جىبەك جولى, شۇبار اۋىلدارى تۇرعىندارىنىڭ قوزعالىس ماسەلەسىن رەتتەدى. بۇل ەلدى مەكەن تۇرعىندارىنىڭ قالا شەڭبەرىندەگى قوزعالىس ەرەجەلەرى, قالا تۇرعىندارىمەن تەڭبە-تەڭ. سانيتارلىق-ەپيدەميالىق تالاپتارعا ساي, كارانتين اۋماعى قالا سىرتىنداعى ەلدى مەكەندەردىڭ شەكاراسىنا دەيىن بارىنشا كەڭەيتىلدى. ياعني, بلوك-بەكەتتەر بۇل اۋىلداردىڭ سىرتىندا ورنالاستىرىلدى», دەدى ب.ماكەن.
22 ناۋرىزعا دەيىن مۇمكىندىك بەرىلدى
قالاعا كىرىپ-شىعۋعا ۋاقىتشا مۇمكىندىك بەرىلىپ وتىر. ياعني 22 ناۋرىزدان باستاپ بارلىق ساناتتاعى ادامداردىڭ كىرىپ-شىعۋىنا توسقاۋىل قويىلادى. «تۇرعىندار ءۇشىن ماڭىزدى اقپارات, ەلورداعا كىرۋگە جانە قالادان شىعۋعا ازىرشە ۋاقىتتارى بار. الداعى 72 ساعات اۋە جانە تەمىر جول قاتىناستارى ارقىلى قالادان كەتۋ نەمەسە كەلۋ ءۇشىن مۇمكىندىك بەرىلىپ وتىر. 22 ناۋرىزدان باستاپ بارلىق ساناتتاعى تۇرعىندارعا قالا اۋماعىنا كىرۋگە جانە شىعۋعا تولىق شەكتەۋ قويىلادى. كەز كەلگەن قاتىناستاردىڭ ترانزيتتىك تاسىمالداۋلارى, نۇر-سۇلتان قالاسىنىڭ اۋماعىندا توقتاتىلماي جۇرگىزىلەدى. ياعني, جولاۋشى پويىزدارى قالا ارقىلى وتەدى, بىراق توقتامايدى. ال 22 ناۋرىزدان باستاپ نۇر-سۇلتان قالاسىنان ەشقانداي «جولاۋشى پويىزى» جولعا شىقپايدى. قالا اۋماعىن باسىپ وتەتىن نە بولماسا ازىق-ت ۇلىك تاسىمالدايتىن كولىكتەر ارنايى جاسىل دالىزبەن عانا قاتىناسادى. بۇل قالاعا كەرەكتى تاۋارلارعا بايلانىستى», دەدى ب.ماكەن.
باس قالادا قانداي تالاپتار كۇشەيتىلدى؟
قالا باسشىسىنىڭ ورىنباسارى ىندەتتى ەسكەرتۋ جانە الدىن الۋ بويىنشا بىرقاتار تالاپتار كۇشەيتىلگەنىن جەتكىزدى.
اتاپ ايتقاندا, ءبىرىنشى, ينفەكتسيانىڭ تارالۋىنا جول بەرمەۋ ءۇشىن ارنايى وڭىرلىك جەدەل شتاب قۇرىلىپ, تاۋلىك بويى قىزمەت ەتەدى. ەكىنشى, حالىق پەن شارۋاشىلىق سۋبەكتىلەرىنىڭ قىزمەتىن رەتتەۋ ءۇشىن قالالىق شتابتىڭ ارنايى شەشىمى قابىلداندى. ءۇشىنشى, قالانىڭ ازىق-ت ۇلىك قاۋىپسىزدىگىن قامتاماسىز ەتۋ ءۇشىن ارنايى ءىس-شارالار جوسپارى ىسكە اسۋدا. قوسىمشا ازىق-ت ۇلىك تاۋارلارىن جەتكىزۋ ماسەلەسى, وڭىرلەرمەن بىرلەسە وتىرىپ شەشىلدى. قازىر حالىققا ەڭ ءبىرىنشى قاجەتتى الەۋمەتتىك جانە تۇتىنۋشىلىق تاۋارلار قورى جەتكىلىكتى. ساۋدا ۇيلەرى مەن قويمالاردا ارتىق كولەمدە قور جيناقتالعان. ءتورتىنشى, دەنساۋلىق ساقتاۋ مينيسترلىگىنىڭ «ا» جانە «ۆ» جوسپارىنداعى ءىس-قيمىل الگوريتمىنە سايكەس, كوروناۆيرۋس ينفەكتسياسىن جۇقتىرعان ادامدارمەن بايلانىسى بولعان تۇلعالارعا ارنالعان الدىن الۋ جاتىن ورىندارى مەن كارانتين ستاتسيونارلارى كەڭەيتىلدى. «س» جوسپارىنا سايكەس قوسىمشا جاتىن ورىندار جاساقتالدى. بەسىنشى, فارماتسەۆتيكا قاۋىمداستىعى مەن تاۋارلاردىڭ قاۋىپسىزدىگىن, ساپاسىن جانە قىزمەتىن باقىلاۋ دەپارتامەنتى اراسىندا باعانى رەتتەۋ, سونداي-اق دارىلىك جانە مەديتسينالىق تاۋارلاردى جەتكىزۋ بويىنشا ءوزارا ىنتىماقتاستىق مەموراندۋمىنا قول قويىلدى.
ءىس-شارالار كەشەنى ىسكە اسۋدا
ب.ماكەن ەلوردادا سانيتارلىق-ەپيدەمياعا قارسى كەڭەيتىلگەن ءىس-شارالار كەشەنى ىسكە اسىرىلىپ جاتقانىن دا باياندادى. ياعني ايالدامالاردى, قوعامدىق كولىكتەردى, كوشە بويلارىن جانە وزگە دە الەۋمەتتىك ماڭىزدى نىسانداردى سانيتارلىق رەتتەۋ جانە دەزينفەكتسيالاۋ جۇمىستارى ۇيىمداستىرىلۋدا. ازىق-ت ۇلىك ونىمدەرىن ساتاتىن ساۋدا ۇيلەرى مەن دۇكەندەردىڭ ءۇزىلىسسىز قىزمەت ەتۋ مۇمكىندىگى قامتاماسىز ەتىلۋدە. قوعامدىق تاماقتانۋ ورىندارىندا ونلاين تاپسىرىس بەرۋ جانە تاماقتى ۇيگە جەتكىزۋ فورماتى جۇيەسى ۇيىمداستىرىلدى. بيزنەس ورتالىقتار, ستوماتولوگيا, شاشتاراز جانە تاعى باسقا حالىققا جەكەلەي قىزمەت كورسەتۋ ورىندارى ساعات 10.00-دەن 17.00-گە دەيىن قىزمەت ەتەدى. ال قۇرىلىس جانە ولاردىڭ مەردىگەر كومپانيالارى سانيتارلىق نورمالاردى كۇشەيتە وتىرىپ, شتاتتىق رەجىمدە جۇمىستارىن جالعاستىرادى. «تۇرعىندار جانە زاڭدى تۇلعالار, مەنشىك نىسانىنا قاراماستان, شەكتەۋ شارالارىن, سونىڭ ىشىندە كارانتيندىك رەجىمدى ورىنداۋعا مىندەتتى», دەدى قالا باسشىسىنىڭ ورىنباسارى.
سونداي-اق ول ازاماتتارعا مەملەكەتتىك رەسمي دەرەككوزدەردە جاريالانعان اقپاراتتارعا عانا سۇيەنىپ, جاناسپايتىن مالىمەتتەرگە سەنبەۋدى جانە ارانداتۋشىلىققا بارماۋدى ەسكەرتتى. بارشا ەلوردالىقتاردى سابىرعا شاقىرعان اكىمنىڭ ورىنباسارى اتقارىلىپ جاتقان شارالارعا تۇسىنىستىكپەن قاراپ, كارانتين تالاپتارىن تولىق ساقتاۋدى ءوتىندى.
