جاس مەملەكەتتىڭ جاڭا جۇيەسىندە پايدا بولعان نارىق قاتىناسىن دامىتىپ, ەل ساناسىن سوعان قاراي باعىتتاپ, وركەندەۋدىڭ ءتيىمدى ناتيجەلەرىنە قول جەتكىزۋ ءۇشىن بالكىم تالاپشىل بولۋىنا تۋرا كەلگەن كەزى بولعان شىعار, بىراق ونىڭ ءبارى قادامىن قالتىلداي باسىپ, ىرگەسىن ەندى كوتەرىپ كەلە جاتقان ەلدى اياعىنان نىق تۇرعىزۋعا ارنالعانى بەلگىلى.
ن.نازارباەۆ الەمنىڭ قالاي وزگەرگەنىن, ال ونىمەن بىرگە قازاقستاننىڭ دا كەلبەتى وزگەرۋى ءتيىس ەكەنىن, باسقارۋ جۇيەسىنە جاڭا كوزقاراس پەن باسقا دا تاسىلدەر قاجەت ەكەنىن جاقسى باعامداعاندىقتان, قوعامدى جاڭعىرتۋ جولىنداعى جاسامپاز ءىسىن جالعاستىرۋ مۇراتىن ساياسي ءىزباسارلارىنا تابىستاپ, وكىلەتتىگىن توقتاتاتىنىن جاريالاۋى ارقىلى تۇلعالىق تۇعىرىن بيىكتەتە ءتۇستى. بۇل – ىزگىلىككە تولى شەشىم.
حالىقتىڭ تاڭداۋى مەن قالاۋى نەگىزىندە ەل پرەزيدەنتى بولىپ سايلانعان قاسىم-جومارت توقاەۆقا اماناتتالعان بيلىكتىڭ تۇراقتىلىقتىڭ كەپىلى ىسپەتتى تىنىشتىقپەن جالعاسۋى ەل كوڭىلىندەگى كۇدىكتى لەزدە سەيىلتە الدى. ەل اراسىنا ىرىتكى سالمادى. جۇرت الاڭدى بەتكە الىپ, دۇربەلەڭ تۋدىرىپ, سويقاندى سالعان جوق, الدەقانداي تالاپتار قويىپ, اكىمدىك الدىندا تابانداپ جاتىپ الاتىن جات مىنەز كورسەتكەن جوق. كەرىسىنشە, قازاقستاندىقتار بىرنەشە ءتىل بىلەتىن پوليگلوت, تاجىريبەلى ديپلومات, ساياسات پەن رۋحانياتتى تەڭ يگەرگەن ينتەللەكتۋال ق.توقاەۆتىڭ ەسىمىن جاڭا باسشىسى رەتىندە ەستىگەندە تەرەڭ تىنىس الىپ, كوڭىلى تىنشىدى. قاسىم-جومارت كەمەل ۇلىنىڭ ادالدىعىنا, تازالىعىنا سەندى. ءوز زامانىنداعى زيالىلاردىڭ الدىڭعى قاتارىندا بولعان جازۋشى كەمەل توقاەۆتىڭ بالاسىنىڭ باسقاشا بولۋى مۇمكىن دە ەمەس. ساياسي ساۋاتى جوعارى وركەنيەتتى ەلدەگى ساراپشىلاردىڭ ءبارى دە ەلباسىنىڭ ەل ءۇشىن جاساعان شەشىمىن, مەملەكەت باسقارۋداعى بۇل دانالىعىن بيىك باعالادى. سودان بەرى دە جىل تولعان ۋاقىت ىشىندە قاسىم-جومارت كەمەل ۇلى ەل باسقارۋ ىسىندەگى وزىندىك ونەرى مەن تاجىريبەسىن تولىقتاي تانىتىپ, دامۋدىڭ جاڭا كەزەڭى ءۇشىن ءتيىمدى جۇيە قالىپتاستىرا الاتىنىن دالەلدەپ ۇلگەردى دەپ نىق سەنىممەن ايتا الامىز.
ەل بيلىگىندەگى ەلەۋلى وزگەرىستىڭ حالىق ءۇشىن جاعىمدى, جايلى بولۋىندا ەلباسىنىڭ ەڭبەگى زور ەكەنىن كوزىقاراقتى قازاقستان جۇرتى جوققا شىعارا المايدى. ەلباسى مارتەبەسىندەگى ءرولىن جوعارى ۇستاپ كەلە جاتقان ن.نازارباەۆ حالىقارالىق قوعامداستىق الدىندا قازاقستان بەدەلىن بيىكتەتىپ جۇرەتىن قىزمەتىنە ءالى دە قىلاۋ تۇسىرگەن جوق. جىل اياسىندا بىرنەشە رەت ساياسي ماقساتتاعى شەتەلدىك ساپارلارعا شىعۋى سونىڭ ايعاعى بولسا كەرەك.
وكىلەتتىگىن توقتاتىپ, ەل قىزمەتىنەن قولى بوساعان سوڭ نۇرەكەڭ بىردەن تۋعان جەرىنە بارىپ, قاراپايىم اۋىل تۇرعىندارىمەن, اعايىن-تۋىسىمەن كەزدەستى. قانشاما شاقىرىمدارعا قاشىقتاپ, بيىكتەرگە سامعاپ كەتسە دە, جۇمىر باستى پەندەنىڭ ءاربىرىنىڭ تۋعان جەرىمەن كىندىگىنىڭ بايلاۋلى ەكەنىن تۇسىنسەك, اۋىلىمەن جىلى قارىم-قاتىناسىن ەشقاشان جوعالتپاعان ەلباسى ساعىنىش پەن ىڭكار كوڭىلدىڭ قانداي بولاتىنىن كوپكە ۇلگى ەتۋدەن جالىققان ەمەس. سول قاۋىشۋ مەن كەزدەسۋلەردە قانشاما ادامگەرشىلىك, كىشىپەيىلدىك, كەڭ مىنەز كورىنىس تاۋىپ جاتادى. ادامدى ادام ەتىپ ۇستاپ تۇرعان دا وسىنداي تابيعي تازا مىنەز. دۇرمەككە تولى دۇنيە وزگەرەدى, پىشاقتىڭ جۇزىندەگى ساياسات الماسادى, بىراق مۇنداي مىنەز ادامدى بيىككە جەتەلەيتىن ماڭگىلىك قۇندىلىقتاردىڭ قاتارىندا بولعاندىقتان, مۇقالمايتىنىن دالەلدەگەن.
ءاسانالى ءاشىموۆ,
قازاقستاننىڭ ەڭبەك ەرى,
كسرو حالىق ءارتىسى
