ەلىمىزدە 12 جىلدىق ءبىلىم بەرۋگە كوشۋ باستاماسى اياسىندا باستاۋىش, ورتا جانە جالپى ءبىلىم بەرۋدىڭ مىندەتتى مەملەكەتتىك ستاندارتتارىنىڭ جوباسى دايارلاندى. بۇل تۋرالى «قازاقستان» تەلەارناسى حابارلادى.
جوعارىدا اتالعان جوبانى ازىرلەۋشى مامانداردىڭ ءبىرى ى. التىنسارين اتىنداعى ۇلتتىق ءبىلىم اكادەمياسىنىڭ ۆيتسە-پرەزيدەنتى ءادىلحان دۇيسەبەكتىڭ ايتۋىنشا, جاڭا ستاندارت نەگىزىندە بالا مەكتەپكە 6 جاستان قابىلدانادى ەكەن. بەسكۇندىك وقۋ باعدارلاماسىنا سايكەس, وقۋشىعا باعا قويۋ قاراستىرىلماعان. ساباقتىڭ ۇزاقتىعى-35 مينۋت. سونىمەن بىرگە, 2-3 سىنىپتا شەت تىلدەرى وقىتىلا باستايدى. 5 سىنىپ «وتپەلى سىنىپ» رەتىندە سانالادى. ويتكەنى, بۇل كەزدە بالانىڭ كاسىبي بەيىمى انىقتالادى دەيدى ماماندار. ال «قازاق ەلى» ءپانى وسى سىنىپتان باستاپ ەنگىزىلىپ, ول 8 سىنىپقا دەيىن وقىتىلادى. 9-10 سىنىپتاردا «ماماندىق الەمىنە كىرىسپە» اتتى جاڭا ءپاننىڭ نەگىزىندە بەيىندىك ءبىلىم بەرۋ جۇرگىزىلەدى. 11-12 سىنىپتاردا بۇرىنعى وقۋ-وندىرىستىك كومبيناتتاردىڭ تاجىريبەسى بويىنشا وقۋشىلارعا ناقتى ءبىر ماماننىڭ كۋالىگى بەرىلەدى.
دانيار تۇيمەباي.
