تارازدىقتار باۋىرجان مومىش ۇلى اتىنداعى «جەڭىس» ساياباعىنا جينالىپ, كونە شاھاردا باستاۋ العان كوگالداندىرۋ جۇمىستارىنا قاتىستى. ەكى ايلىق جۇمىسقا قاتىسقاندار اراسىندا وبلىس اكىمى بەردىبەك ساپارباەۆ, وبلىستىق جانە قالالىق ارداگەرلەر كەڭەسىنىڭ مۇشەلەرى, قوعامدىق كەڭەستەردىڭ, جاستار جانە ۆولونتەرلىك ۇيىمداردىڭ باسشىلارى مەن وكىلدەرى بولدى. ءوز سوزىندە ب.ساپارباەۆ اركىم ءوز اۋلاسىن, كوشەنى, قالانى, اۋداندى تازا ۇستاۋعا تىرىسۋى كەرەكتىگىن, تەك اۋماقتى تازالاۋ جانە اعاش وتىرعىزۋمەن شەكتەلمەي, وتىرعىزىلعان جاسىل جەلەكتەردى كۇتىپ-باپتاۋ جۇمىستارىن دا جۇيەلى تۇردە جۇرگىزىپ وتىرۋدىڭ دۇرىس ەكەنىن جەتكىزدى.
قالانى كوگالداندىرۋ جۇمىستارى وبلىس اكىمدىگى عيماراتىنىڭ جانە قازاق حاندىعىنىڭ 550 جىلدىعىنا وراي بوي كوتەرگەن مونۋمەنت ماڭىندا, «اۋليە-اتا» اۋەجايى اۋماعىندا, تاراز قالاسىنداعى ە.نيەتقاليەۆ, ى.سۇلەيمەنوۆ اتىنداعى جانە باسقا دا كوشەلەر بويىندا جالعاسىن تاپتى. بۇل كۇنى وبلىس ورتالىعىندا 225 قايىڭ كوشەتى, 2900 ۇيەڭكى, 150 اكاتسيا, 800 شاعان اعاشى, سونداي-اق بىرنەشە قاراعاي, ماگنوليا كوشەتتەرى, جالپى العاندا ءتورت مىڭنان استام اعاش وتىرعىزىلدى. ەكى ايلىق ءىس-شارالار مامىر ايىنا دەيىن جالعاسادى. بۇل ورايدا قالانىڭ ورتالىق بولىكتەرى, ماگيسترالدى كوشەلەر مەن ساياباقتار, وبلىس ورتالىعىنىڭ شاعىن اۋداندارى ءارتۇرلى جاۋاپتى مەكەمەلەرگە, كاسىپورىندار مەن كاسىپكەرلىك نىساندارىنا ارنايى بەكىتىلگەن. بۇگىندە مۇنداي جۇمىستار وبلىستىڭ بارلىق اۋدانىندا جۇرگىزىلۋدە.
جامبىل وبلىسى
