2018 جىلدىڭ قورىتىندىسى بويىنشا سالىق تولەۋشىلەر جالپى سوماسى 4,5 ترلن تەڭگە سالىقتان بوساتىلعان. وتكەن جىلدىڭ قورىتىندىسى بويىنشا دا وسىنداي مولشەردە سالىقتىق جەڭىلدىكتەر قاراستىرىلعانى بەلگىلى. بيىلعى جىلدان باستاپ ارنايى سالىق رەجيمى بويىنشا ەسەپ ايىرىساتىن ميكرو جانە شاعىن كاسىپكەرلىك سۋبەكتىلەرى 3 جىلعا سالىق تولەۋدەن بوساتىلدى. بۇل سۋبەكتىلەردى تەكسەرۋگە موراتوري جاريالاندى.
بۇعان قوسا ەلىمىزدە توتەنشە جاعدايدىڭ ەنگىزىلۋىنە بايلانىستى, قارىم-قاتىناستى ازايتۋ ءۇشىن زاڭدى جانە جەكە تۇلعالارعا دەكلاراتسيا تاپسىرۋ مەرزىمى توتەنشە جاعدايدىڭ ۋاقىتىنا سايكەس كەلگەندىكتەن, ونى 30 كۇنتىزبەلىك كۇنگە كەيىنگە شەگەرۋ تۋرالى شەشىم قابىلدانىپ وتىر.
سونداي-اق سالىق كودەكسىندە توتەنشە جاعداي كەزىندە قارىز كەيىنگە شەگەرىلسە, وعان ءوسىمپۇل ەسەپتەلمەيدى. الايدا ونداي جەڭىلدىكتى الۋ ءۇشىن ازاماتتارعا كەپىلزات نەمەسە بانكتىك كەپىلدىك قاجەت. وسىعان وراي توتەنشە جاعداي كەزىندە سالىقتىق مىندەتتەمەلەر بويىنشا قارىز بەن ءوسىمپۇلدى كەيىنگە شەگەرۋدى وڭتايلاندىراتىن تەتىكتەر قاراستىرىلۋدا.
جاۋاپتى ماماندار توتەنشە جاعداي كەزىندە قامەرالدى باقىلاۋ قورىتىندىسى بويىنشا حابارلامالار جىبەرۋ توقتاتىلاتىنىن مالىمدەدى. نىساندارعا بارىپ, كەدەندىك جانە سالىقتىق تەكسەرىستەر جۇرگىزۋ ازايتىلادى. اكىمشىلىك جاۋاپكەرشىلىككە تارتۋ ماسەلەسى توتەنشە جاعداي مەرزىمى اياقتالعاننان كەيىن قاراستىرىلادى. بۇدان وزگە قولداۋ كورسەتۋ شارالارى قولعا الىنباق. جۇمىس بەرۋشىلەر ناۋرىز ايىندا تولەگەن جالاقىنىڭ سالىعىن 25 ساۋىرگە دەيىن تولەۋى كەرەك.
ال ەگەر ەڭبەكاقى ەسەپتەلمەگەن نەمەسە تولەنبەگەن بولسا, سالىقتىق مىندەتتەمەلەر قاراستىرىلمايدى.
