«بىرىنشىدەن, بارلىق كاسىپورىندار مەن مەكەمەلەر قاشىقتىقتان جۇمىس ىستەۋگە مۇمكىندىگى بولسا, قاشىقتىقتان جۇمىس ىستەۋ رەجىمىنە كوشۋگە مىندەتتى. بۇل ەڭبەك كودەكسىنىڭ 138-بابىمەن رەتتەلەدى. مۇنداي كەزدە جۇمىستىڭ ەڭبەكاقىسىن تولەۋ ءتارتىبى وزگەرمەيدى. بۇل جەردە ازامات ءوزىنىڭ جۇمىس ورنىندا ەمەس, ۇيدەن جۇمىستى اتقارۋ مۇمكىندىگى بولادى. ەڭبەك كودەكسى بويىنشا وعان جۇمىس بەرۋشى ءتيىستى جاعداي جاساۋىنا مىندەتتى جانە جالاقىسى اي سايىنعى الىپ جۇرگەن كولەمدە تولەنەدى», دەدى ب.نۇرىمبەتوۆ.
سونىمەن قاتار ول توتەنشە جاعدايعا قاتىستى جۇمىس كولەمى شەكتەلەتىن بولسا, قانداي شارالار اتقارىلاتىنىن اتاپ ءوتتى.
«ەكىنشىسى, ەگەر جۇمىس كولەمى شەكتەلەتىن بولسا, جۇمىس بەرۋشىلەر وزدەرىنىڭ بۇيرىعىمەن قىسقارتىلعان جۇمىس رەجىمىنە كوشۋگە قۇقىلى. بۇل دەگەنىمىز, اپتاداعى جۇمىس كۇندەرىنىڭ سانى ازايۋى مۇمكىن نەمەسە ءبىر كۇندە اتقاراتىن جۇمىس ساعاتى كەمۋى مۇمكىن. بۇل جاعدايدا جۇمىس ىستەپ جۇرگەن ازاماتتار جالاقىسىن سول اتقارىلعان جۇمىس ۋاقىتىنا الادى. مىسالى, اپتاداعى جۇمىس كۇنى 5 كۇننەن 3 كۇنگە قىسقاراتىن بولسا, 3 كۇندىك جالاقىنى الادى. ەگەر ءبىر كۇندە 8 ساعاتتىڭ ورنىنا 4 ساعات جۇمىس ىستەيتىن بولسا, 4 ساعاتتىڭ جالاقىسىن الادى. بۇل تولىق ەمەس ەڭبەك كۇنى ەڭبەك كودەكسىنىڭ 70-بابىمەن رەتتەلەدى. ال وسى توتەنشە جاعدايعا قاتىستى وزدەرىنىڭ جۇمىستارىن توقتاتۋعا ءماجبۇر بولعان مەكەمەلەر مەن ۇيىمدار ەڭبەك كودەكسىنىڭ 112-بابىن نازارعا الۋى كەرەك. ولار ءماجبۇرلى جۇمىستى توقتاتۋ رەجىمىنە كوشۋگە مىندەتتى. بۇل جەردە جۇمىس بەرۋشىنىڭ تاراپىنان جۇمىسشىلارعا كەمىندە ەلىمىزدە بەكىتىلگەن ەڭ تومەنگى جالاقىدان تومەن ەمەس جالاقى تولەۋى ءتيىس. قازىرگى ۋاقىتتا ەلىمىزدە تومەنگى جالاقىنىڭ مولشەرى 42 500 تەڭگە. ەگەر ەڭبەك شارتىندا, ءيا بولماسا ۇجىمدىق شارتتا بۇل تومەنگى جالاقىدان جوعارى جالاقى قاراستىرىلعان بولسا, وندا سول جالاقى تولەنەدى. بىراق ول ەڭ تومەنگى جالاقىدان كەم بولماۋى كەرەك.
بۇدان بولەك, مەملەكەت باسشىسى بارلىق جۇمىس بەرۋشىلەرگە بالالارىمەن ۇيىندە وتىرۋعا ءماجبۇر اتا-انالارعا اقىلى دەمالىس بەرۋ تۋرالى تاپسىرما بەرگەن بولاتىن. بۇل ءتارتىپ قالاي ىسكە اسادى؟ بىزدە ەڭبەك كودەكسى بويىنشا كەز كەلگەن جۇمىس ىستەپ جۇرگەن ازامات جىلىنا ءبىر مارتە اقىلى ەڭبەك دەمالىسىنا شىعۋعا مۇمكىندىگى بار. ول ءۇشىن ءار مەكەمەدە كەستە جاسالادى. سول دەمالىس كەستە بويىنشا نەمەسە كەستەدەن تىس بەرىلۋى مۇمكىن. وسى جاعدايدا, ءبىز جۇمىس بەرۋشىلەردەن بالاسىنا قاراۋعا ءماجبۇر بولعان جۇمىسشىلارعا جىلىنا بەرىلەتىن اقىسى تولەنەتىن ەڭبەك دەمالىسىن وسى كۇندەرى بەرۋدى سۇرايمىز. بۇل جەردە ورتاشا جالاقى تولەنەتىن بولادى», دەدى مينيستر.
