وتىز مىڭنان استام تۇرعىنى بار تۇزدىباستاۋ اۋىلىندا بالالاردى بىلىمگە باۋلىپ, وتانسۇيگىشتىككە تاربيەلەيتىن ءتۇرلى ۇيىرمەلەر جۇمىس ىستەيدى. سولاردىڭ ءبىرى اۋىل مەشىتى جانىنان اشىلعان ارنايى ساۋات اشۋ كۋرسى. مۇندا شاكىرتتەر ءتىل ۇيرەنىپ, تەگىن ءبىلىم الادى. يماندىلىق دارىستەرىن بويعا سىڭىرگەن ورىمدەي وسكىندەردى ىنتالاندىرۋ ماقساتىندا وتكەن شارا العاش رەت ۇيىمداستىرىلىپ وتىر. بولاشاق قاريلەر قاسيەتتى كىتاپتىڭ 16 سۇرەسىن جانە 20 سۇرەسىن جاتقا وقيتىندار بولىپ ەكى توپقا ءبولىنىپ, ءوزارا سىنعا ءتۇستى.
– شاكىرتتەرىمىزدىڭ بەتالىسى كوڭىل قۋانتادى. قۇران سۇرەلىن جاتتاپ, ماعىناسىنا تەرەڭ بويلاعان بالا جاعىمسىز قاسيەتتەردەن بويىن اۋلاق ۇستاپ, تۇلا بويى ىزگىلىك پەن ادامگەرشىلىككە تۇنادى. اينالاسىنا قامقورلىق كورسەتىپ, اتا-اناسىنا مەيىرىم-شاپاعاتتى بولىپ وسەدى. ءبىر جاعى اراب ءتىلىن مەڭگەرەدى. اتالعان بايقاۋدىڭ ماقساتى – وقۋشىلارىمىزدى ىنتالاندىرىپ, زەيىندەرىن اشۋ. جارىسقا اۋدان يمامى مۇسابەك قاجى تاعان ۇلى ارنايى كەلىپ, بۇلدىرشىندەرىمىزگە ءسات-ساپار تىلەدى. مۇنداي يگى شارا داستۇرگە اينالسا دەگەن تىلەگىمىز بار, – دەيدى تۇزدىباستاۋ مەشىتى جانىنداعى ساۋات اشۋ ۇيىرمەسىنىڭ ۇستازى سەيدازىم ابدۋاليەۆ.
قۇران جارىسىندا دارا شىققان نۇربولات اۋەزحان, ساليح ناديروۆ, يسمايل ءاشىموۆ, ابدۋلازيز ءابدىماناپ, مەيىرلان ءابدىماناپ, مەيىرمان ورازالى ەسىمدى قاتىسۋشىلارعا مەشىت قاراجاتى ەسەبىنەن ۆەلوسيپەد, سوماكات سىندى باعالى سىيلىقتار مەن ديپلومدار تابىستالدى. نەبارى ءتورتىنشى سىنىپتا وقيتىن نۇرجاقىپ نۇرداۋلەتكە دە ىنتالاندىرۋ سىيلىعى تابىس ەتىلدى. بايقاۋعا كورەرمەن رەتىندە كۋا بولعان اتا-انالار مەشىت ۇجىمىنا ءوز العىستارىن ءبىلدىردى.
