ايماقتار • 11 ناۋرىز، 2020

وتاندىق ماقتانى قايتا وڭدەۋ ۇلەسى 3 ەسەگە ۇلعايادى

38 رەتكورسەتىلدى

بيىلعى اقپاندا ەلىمىزدىڭ جەڭىل ونەركاسىبى سالاسىندا ءوندىرىس كولەمى 12،4% ءوستى. ونىڭ ىشىندە توقىما بۇيىمدارى 11،9%، كيىم-كەشەك 9،7%، بىلعارى جانە وعان جاتاتىن ونىمدەر وندىرىسىندە 11،8% ءوسىم بايقالدى. بۇل تۋرالى يدم ءباسپاسوز قىزمەتى حابارلادى.

جەڭىل ونەركاسىپ كەز-كەلگەن ەلدىڭ ەكونوميكاسى ءۇشىن ماڭىزدى ءرول اتقاراتىندىقتان، الەمدە بۇل سالانى دامىتۋعا ەرەكشە كوڭىل ءبولىنىپ، ۇلكەن قولداۋ كورسەتىلەدى. 

قازاقستاندا دا بۇل باعىتتا اۋقىمدى جۇمىستار جۇرگىزىلۋدە. ۇكىمەت وتكەن جىلدىڭ ناۋرىز ايىندا 2019-2021 جىلدارعا ارنالعان جەڭىل ونەركاسىپتى دامىتۋ جونىندەگى جول كارتاسىن ماقۇلدادى. وندا كاسىپورىنداردى شيكىزاتپەن قامتاماسىز ەتۋ، تاۋارلاردىڭ زاڭسىز اينالىمىنا قارسى كۇرەس جۇرگىزۋ، قازاقستاندىق قامتۋ ۇلەسىن ارتتىرۋ، ەكونوميكالىق ىنتالاندىرۋ جانە جۇيەلى قولداۋ بويىنشا شارالار كوزدەلگەن.

قازىرگى ەلىمىزدە كيىم مەن اياق كيىم وندىرۋگە ارنالعان ماتالاردىڭ كوپتەگەن تۇرلەرى، دايىن تەرى، فۋرنيتۋرا، سونداي-اق قولدانبالى ماتەريالدار وندىرىسىندە پايدالانىلاتىن حيميالىق رەاگەنتتەر مەن بوياعىشتار ءوندىرىسى جوق. بۇل جاعداي تيىسىنشە دايىن ءونىمنىڭ وزىندىك قۇنىنا اسەر ەتەدى.

قازاقستاندا بۇگىنگى تاڭدا قۋاتتىلىعى 31 مىڭ تونناعا دەيىن ماقتا تالشىعىن وڭدەۋگە مۇمكىندىك بەرەتىن 4 توقىما ماقتا وڭدەۋ كاسىپورنى بار. الايدا، ولاردىڭ ەكەۋى عانا - «Azala Textile» جشس جانە «Azala Cotton» جشس تۇراقتى جۇمىس ىستەپ تۇر. «اليانس» سوك قازاقستان-وزبەكستان بىرلەسكەن كاسىپورنى 2019 جىلدىڭ جەلتوقسانىندا «يۋتەكس» اق توقتاپ تۇرعان ءوندىرىسىن ىسكە قوستى. 

سالاداعى وزەكتى پروبلەمالاردى شەشۋ ماقساتىندا پرەمەر-ءمينيستردىڭ وكىمىمەن ەلىمىزدە ماقتا-توقىما كلاستەرىن دامىتۋ جونىندەگى جول كارتاسى بەكىتىلدى. سونىڭ شەڭبەرىندە «يۋتەكس» فابريكاسىنىڭ تولىق قۋاتقا شىعۋى، سونداي-اق تىگىن ءوندىرىسىن جانە توقتاپ تۇرعان ەكىنشى فابريكا – «مەلانج»-دى ىسكە قوسۋ جونىندەگى شارالار كوزدەلگەن.

بۇدان باسقا، تاياۋدا «وڭتۇستىك» اەا-نان تىس ورنالاسقان ماقتانى قايتا وڭدەۋ جونىندەگى قولدانىستاعى توقىما فابريكالارىنا ارنايى ەكونوميكالىق ايماق پرەفەرەنتسيالارىن بەرۋدى قاراستىراتىن قاۋلى قابىلداۋ جوسپارلانىپ وتىر.

بۇل شارالار وتاندىق ماقتانى قايتا وڭدەۋ ۇلەسىن 3 ەسەگە ۇلعايتىپ، قوسىمشا 1 مىڭ جۇمىس ورنىن قۇرۋدى قامتاماسىز ەتەدى.

سونداي-اق، مينيسترلىك تەرى شيكىزاتىن وڭدەۋ بويىنشا كاسىپورىنداردى قولداۋ شارالارىن جۇزەگە اسىرۋدا. بۇگىندە الىناتىن ءىرى قارا مال تەرىسىنىڭ بارلىق كولەمىنەن (شامامەن 3 ملن.تەرى) بىلعارى كاسىپورىندارى تەرىنىڭ 16%-ىن وڭدەيدى.

بىلعارى كاسىپورىندارىنىڭ جۇكتەمەسىن، سونداي-اق بىلعارى جانە وعان جاتاتىن ءونىم ءوندىرىسىنىڭ كولەمىن ۇلعايتۋ ماقساتىندا ەل اۋماعىنان وڭدەلمەگەن ءىرى قارا مال تەرىسىن شىعارۋعا ۋاقىتشا تىيىم سالىندى. سونداي-اق نەگىزگى كووپەراتسيانى ەسكەرە وتىرىپ، ءسۇت، تەرى، ءجۇن قابىلداۋ پۋنكتتەرىن قۇرۋ مەن دامىتۋدى قارجىلاندىرۋدى كوزدەيتىن «بىرلىك» نەسيەلەۋ باعدارلاماسىنا وزگەرىستەر ەنگىزىلدى. وسى باعدارلاما اياسىندا قاراعاندى وبلىسىندا 13 ملن. تەڭگەگە ءبىر قارىز بەرىلدى، ونىڭ ىشىندە 8،7 ملن. تەڭگە ءجۇن وڭدەۋ بويىنشا جابدىقتار ساتىپ الۋعا جانە 4،3 ملن. تەڭگە اينالىم قاراجاتىن تولىقتىرۋعا جۇمسالۋى ءتيىس.

جەڭىل ونەركاسىپ سالاسىنىڭ وتاندىق كاسىپورىندارىن، سونداي-اق fashion-يندۋستريانى قولداۋعا باعىتتالعان وسى شارالاردىڭ بارلىعى وندىرۋشىلەرگە وندىرەتىن تاۋارلار نومەنكلاتۋراسىن كەڭەيتۋگە، جاڭا نارىقتارعا شىعۋعا، ەل ىشىندە وتاندىق ءونىم ءيميدجىن ارتتىرۋعا جانە ناتيجەسىندە جەرگىلىكتى قامتۋ ۇلەسىن ارتتىرۋعا، جاڭا جۇمىس ورىندارىن قۇرۋعا مۇمكىندىك بەرەدى.

سوڭعى جاڭالىقتار

ۇقساس جاڭالىقتار