قاسىم-جومارت توقاەۆ دميتري مەدۆەدەۆتى جوعارى لاۋازىمعا تاعايىندالۋىمەن قۇتتىقتادى.
ء–سىزدىڭ مەملەكەتتىك قىزمەتتەگى باي تاجىريبەڭىز رەسەيدىڭ مەملەكەتتىلىگىن نىعايتۋ ىسىنە, اسىرەسە قازىر, ەلدەرىڭىز ءوز دامۋىنىڭ جاڭا كەزەڭىنە قادام باسقان كەزدە زور ۇلەس قوساتىنى ءسوزسىز. كونستيتۋتسيالىق رەفورمالاردىڭ ورنى ەرەكشە. ءبىز ونى مۇقيات زەرتتەپ جاتىرمىز. ارينە, ءبىز وداقتاس ءارى ستراتەگيالىق سەرىكتەس بولعاندىقتان, قازاقستان وعان ايرىقشا قىزىعۋشىلىق تانىتادى, – دەدى پرەزيدەنت.
دميتري مەدۆەدەۆ ءوزىنىڭ جاڭا لاۋازىمدا ەلىمىزگە جاساعان ساپارىنىڭ سيمۆولدىق ءمانى بار ەكەنىن ايتتى.
–مەن مۇنان دوستىعىمىزدىڭ, وداقتاستىعىمىزدىڭ سيمۆولىن كورىپ وتىرمىن. مەنىڭ سوڭعى جىلدارى اتقارعان قىزمەتتەرىمدەگى مەملەكەتتىك ساپارلارىم, ەڭ الدىمەن, ءسىزدىڭ ەلىڭىزگە جاسالدى. بۇل ءبىر-ءبىرىمىزدى جاقسى تۇسىنۋگە, ستراتەگيالىق سەرىكتەستىگىمىز بەن وداقتاستىق قاتىناستارىمىزدى نىعايتۋعا مۇمكىندىك بەرەدى دەپ ويلايمىن, – دەدى رەسەيدىڭ قاۋىپسىزدىك كەڭەسى توراعاسىنىڭ ورىنباسارى.
قاسىم-جومارت توقاەۆقا رەسەي پرەزيدەنتى ۆلاديمير ءپۋتيننىڭ جۇرەكجاردى سالەمىن جەتكىزدى.
دميتري مەدۆەدەۆ قازاقستان مەن رەسەي اراسىنداعى ىنتىماقتاستىق تۋرالى ايتا كەلە, ونىڭ مەيلىنشە ماڭىزدى دامۋ كەزەڭىندە تۇرعانىن اتاپ ءوتتى.
ء–سىز رەسەيدە جۇزەگە اسىرىلىپ جاتقان كونستيتۋتسيالىق رەفورمالارعا نازار اۋداردىڭىز. ءبىز دە قازاقستانداعى ۇدەرىستەردى مۇقيات باقىلاپ وتىرمىز. دوستاس, سەرىكتەس سانالعاندىقتان باسقاشا بولۋى مۇمكىن ەمەس. ءبىز ءبىر-ءبىرىمىزدىڭ دامۋىمىزعا كومەكتەسىپ قانا قويماي, سونداي-اق, بەلگىلى ءبىر دەڭگەيدە وتكەن كەزەڭنەن, دامۋىمىزدىڭ كەيبىر ساتتەرىنەن ساباق الۋىمىز كەرەك. رەسەيدىڭ قاۋىپسىزدىك كەڭەسى توراعاسىنىڭ ورىنباسارى رەتىندە مەنىڭ كەزدەسۋلەرىمنىڭ بۇعان سەپتىگى ءتيۋى ءۇشىن تىرىسامىن, – دەدى دميتري مەدۆەدەۆ.
سونىمەن قاتار تاراپتار وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە, سونىڭ ىشىندە كوروناۆيرۋس ىندەتىنىڭ تارالۋىنا قارسى كۇرەسۋ ءۇشىن قابىلدانىپ جاتقان شارالار تۋرالى پىكىر الماستى.
