اباي قۇنانباي ۇلىنىڭ 175 جىلدىق مەرەيتويى اياسىندا وتكىزىلىپ وتىرعان بۇل كورمەنىڭ ماقساتى – رەسپۋبليكامىزداعى بۇكىل كوركەم ەڭبەك ءپانى مۇعالىمدەرىنىڭ باسىن قوسۋ, بولاشاقتا وسكەلەڭ ۇرپاقتىڭ ءتالىم تاربيەسىمەن ءبىلىم نەگىزىن ۇشتاستىرۋ, سونداي-اق ءار قيلى جانرداعى تۋىندىلاردىڭ قىر-سىرىن تاريح تاعلىمىنا تەرەڭ بويلاتا وتىرىپ, وسى ۇستازداردىڭ ارقاسىندا كورەرمەنگە جەتكىزۋ.
كەسكىندەمە الەمىن بويىنا ءسىڭىرىپ, الۋان بوياۋلار ارقىلى جان-دۇنيەسىن بەينەلەگەن ۇستاز, پروفەسسور, قر سۋرەتشىلەر وداعىنىڭ مۇشەسى ەرزات راحيموۆ بالالارعا ءبىلىم بەرۋمەن قاتار «بابالار مۇراسى», «تۇركىستان» تاعى دا باسقا تىڭ تۋىندىلارىمەن كوپتەگەن كورمەلەرگە قاتىسۋ ارقىلى جاس بۋىندى تاربيەلەۋگە اتسالىسۋدا.
«پاراساتتى ۇستاز» ءتوس بەلگىسىنىڭ يەگەرى, ديزاينەرلەر وداعىنىڭ مۇشەسى, اباي اتىنداعى قازاق پەداگوگيكالىق ۋنيۆەرسيتەتىنىڭ تۇلەگى, ۇستاز ساپاروۆ قالدىبەك بالابەك ۇلى اعاش شەبەرى, زاماناۋي ۇلگىدەگى ءۇي ينتەرەرلەرىمەن اينالىسىپ, بەزەندىرۋ ىسىنە ءوز ۇلەسىن قوسىپ كەلەدى. ونىڭ «جانۇيا», «قوبىز» تۋىندىلارى كوركەم دە شەبەر ورىندالۋىمەن ەرەكشەلەنەدى.
ىبىراي التىنسارين مەدالىنىڭ يەگەرى, سۋرەتشىلەر وداعىنىڭ مۇشەسى پروفەسسور كودەكوۆ قاناعات قالي ۇلى 2014 جىلى ءا. قاستەەۆ اتىنداعى ونەر مۋزەيىندە «جاڭعىرىق» اتتى جەكە كورمەسىن وتكىزدى. ول وسى كورمەنى ۇيىمداستىرۋشىلاردىڭ ءبىرى. تۋىندىلارى تۇركيا, قىتاي, يتاليا جانە رەسپۋبليكامىزدىڭ كوپتەگەن قالالارىنداعى مۋزەيلەر مەن جەكە قورلاردا ساقتاۋلى.
توقاباەۆا گۇلناز قادىربايقىزى, باتيك الەمىندە ءوزىنىڭ شەبەرلىگىن مويىنداتا بىلگەن كوپ جىلعى ەڭبەك ءوتىلىمى بار قۇرمەتتى ۇستاز, «ۇلاعاتتى ۇستاز» مەدالىنىڭ يەگەرى. «تاڭبالى تاس», «بەيۋاق» تۋىندىلارىنىڭ اۆتورى. شاكىرتتەرى كوپتەگەن عىلىمي جوبالاردىڭ جەڭىمپازدارى. شوقپاروۆ بەردىبەك سۇيىندىك ۇلى قر ديزاينەرلەر وداعىنىڭ مۇشەسى», داركەنباي شوقپار ۇلىنىڭ شاكىرتى. ول اعاشتان كوپتەگەن ۇلتتىق جادىگەلەر جاساپ ساندىك-قولدانبالى جانە بابالار ونەرىنىڭ وركەندەۋىنە ات سالىسىپ كەلەدى. ەكسپو-2017 جىلى كورمەدە شەبەرلىك ساباعىن ۇسىندى.
«ونەر – ءومىر شىندىعىن كوركەم وبرازدار جۇيەسى ارقىلى بەينەلەيتىن, قوعامدىق سانا مەن ادام ءىس-ارەكەتىنىڭ وزىنە ءتان ەرەكشەلىكتەرىمەن دارالاناتىن فورما. ونەر ارقىلى بەرىلگەن ەستەتيكالىق تاربيە ادامنىڭ سانا-سەزىمىنىڭ بايلىعىن قالىپتاستىرىپ, ۇدايى سۇلۋلىق پەن ادەمىلىكتى دۇرىس ۇعىنۋعا جەتەلەيدى. ەلىمىزدىڭ تۇكپىر-تۇكپىرىنەن جينالعان ونەرلى ۇستازداردىڭ, ونەرى, ءبىلىمى تەڭ تارازىلانعان. اباي قۇنانباي ۇلى ايتقانداي «ەگەر مال كەرەك بولسا قول ونەر ۇيرەنبەك كەرەك, مال جۇتايدى, ونەر جۇتامايدى. الداۋ قوسپاي ادال ەڭبەگىن ساتقان قولونەرلى – قازاقتىڭ اۋليەسى سول» – دەگەن باعىتتى ۇستانعان ۇستازدار ۇجىمى قۇرىلىپ كورمە ۇسىنىپ وتىر»,- دەيدى كورمە جەتەكشىسى ايسۇلۋ ۇسەنتاەۆا.
كورمە 2020 جىلدىڭ 31 ناۋرىزىنا دەيىن جالعاسادى.
