«مەملەكەت باسشىسى قاسىم-جومارت توقاەۆ ۇكىمەتكە حالىقتى كوروناۆيرۋس ينفەكتسياسىنان قورعاۋ شارالارىن كۇشەيتۋدى تاپسىردى. الەمدەگى جاعداي كۇردەلى. وزدەرىڭىز جاقسى بىلەتىندەي, قازىرگى ۋاقىتتا ۆيرۋس ەلۋدەن استام ەلدە انىقتالىپ, وتە جىلدام تارالۋدا. قازىر قازاقستاندا كوروناۆيرۋسپەن اۋىرعان ادامدار جوق. سوندىقتان بارلىق الدىن الۋ شارالارىن جالعاستىرۋ كەرەك», - دەدى اسقار مامين ۇكىمەت وتىرىسىندا.
ۇكىمەت باسشىسى اسقار ءماميننىڭ سوزىنشە كوروناۆيرۋس الەمدىك ەكونوميكاعا ۇلكەن اسەرىن تيگىزىپ وتىر.
«وسى رەتتە قازاقستان ەكونوميكاسىنىڭ تۇراقتىلىعىن قامتاماسىز ەتۋ ماقساتىندا ءتيىستى شارالار قابىلداۋ كەرەك. مينيسترلىكتەردىڭ اتاپ وتكەن ۇسىنىستارىن قولدايمىن. بىرىنشىدەن, دەنساۋلىق ساقتاۋ مينيسترلىگى بارلىق مەملەكەتتىك شەكارالىق وتكىزۋ پۋنكتەرىندە سانيتارلىق-ەپيدەميولوگيالىق باقىلاۋدى كۇشەيتىپ, ازىرلەنگەن ءىس-قيمىل الگوريتمىن ىسكە اسىرۋعا دايىن بولۋىن قامتاماسىز ەتسىن. ەكىنشىدەن, سىرتقى ىستەر مينيسترلىگى بۇعان دەيىن جوسپارلانعان ءىرى حالىقارالىق شارالاردى اۋىستىرۋ بويىنشا ۇسىنىستاردى ەنگىزسىن. كوروناۆيرۋس ينفەكتسياسى تارالعان ەلدەر ءۇشىن ءترانزيتتى, ەلەكتروندى, تۋريستىك ۆيزالاردى توقتاتۋ قاجەت», - دەدى ول.
