اقتوبە • 27 اقپان، 2020

قازاق حالقىمەن بىرگە بولۋىمىز - باقىتىمىز

379 رەتكورسەتىلدى

قازاق جەرىن ءوز وتانى دەپ سانايتىن دياسپورالار قازاقستانعا تاعدىردىڭ تەپەرىشىنە تاپ كەلگەن ءتۇرلى كەزەڭدەردە كەلگەنى حاق. سولاردىڭ ءبىرى – پولياك ۇلتىنىڭ وكىلدەرى. بۇگىنگى كۇنى ولار وسىناۋ قاسيەتتى دە كيەلى توپىراققا تاستاي باتىپ، سۋداي ءسىڭىپ، قازاق حالقىمەن بىرگە تاتۋ-ءتاتتى تىرلىكتە ءومىر ءسۇرىپ، ەڭبەك ەتىپ كەلەدى. ءبىزدىڭ اتا-بابالارىمىزدىڭ ۇلى دالاعا العاش رەت اياق باسۋى – سوناۋ  ءحىىى عاسىردا تىركەلگەن ەكەن. ياعني ارال ماڭى ارقىلى سىرداريا مەن ىلە القابىنا تۇياق ىلىكتىرىپ، سودان سوڭ بالحاش كولىنىڭ تۇسىنان وتكەن پولياكتار – بۇگىندە تاۋەلسىز ەلىمىزدىڭ اجىراماس ءبىر بولىگىنە اينالدى.

ولار ورتاق وتانىمىز قازاقستاننىڭ دامۋى مەن ءوسىپ-وركەندەۋىنە ءوز ۇلەستەرىن قوسۋدا. 1992 جىلدىڭ 6 ءساۋىرى كۇنى قازاقستان مەن پولياك رەسپۋبليكالارى اراسىندا ديپلوماتيالىق قارىم-قاتىناس ورناتىلدى. ءبىز قازاقستاندىق پولياك ەتنوسىنىڭ وكىلدەرى سول كەزەڭنەن بەرى قوس مەملەكەتتىڭ سەنىمدى ارىپتەستەرى رەتىندە تىعىز قارىم-قاتىناستار مەن ءوزارا بايلانىستار جاساپ كەلە جاتقانىنا سۇيسىنەمىز. بۇل جاعىمدى ءجايت مەرەيىمىزدىڭ ءوسىرىپ، جانىمىزدى جادىراتادى.

سونداي-اق 1994 جىلدىڭ 20 ناۋرىزىندا پولشانىڭ ەلشىلىگى قازاقستاندا اشىلسا، 2000 جىلدىڭ قازانىنان باستاپ پولشادا قازاقستاننىڭ ەلشىلىگى ءوز جۇمىسىن باستادى. قازاق توپىراعىندا قازاقستاندىق پولياكتاردىڭ العاشقى بىرلەستىگى سوناۋ سەكسەنىنشى جىلدارى قۇرىلا باستاسا، اقتوبە وبلىسىندا مۇنداي قوعامدىق ۇيىمنىڭ قاز باسىپ، قىزمەت جاساي باستاعانىنا بيىل 20 جىل تولىپ وتىر. بۇدان شىعاتىن ءتۇيىن - ءبىزدىڭ جانىمىزعا اركەز جىلى نۇر قۇيادى. تاعدىردىڭ قازاق حالقىمىمەن بىرگە بولۋدى جازعانى – ءبىزدىڭ باقىتىمىز جانە الاڭسىز عۇمىرىمىز بەن ەسەلى ەڭبەگىمىز دەپ سەنىممەن ايتا الامىز. ۇزاق جىلداردان بەرى قوس حالىق وكىلدەرىنىڭ اراسىندا تيتتەي بولسا دا جارىقشاق، سىزات تۇسپەگەنى اتاپ ايتۋعا تۇرارلىق ماسەلە دەپ سانايمىز.

ءبىزدىڭ بىلۋىمىزشە، الەم حالىقتارى اراسىندا قازاق حالقىن ەرەكشەلەندىرىپ تۇراتىن جايت – ولاردىڭ بويىنداعى سوزبەن ايتىپ جەتكىزگىسىز باي ادامگەرشىلىك قاسيەتتەرى. مەملەكەت قۇراۋشى ۇلتتىڭ ەشكىمدى جاتسىنبايتىن ءمارت مىنەز-قۇلقى، ءوزىنىڭ بالاسىنداي كەڭ ايقارا قۇشاعى ەلىمىزدەگى تاتۋلىق پەن كەلىسىمنىڭ باستى كەپىلى بولىپ وتىر. قازاق حالقىنىڭ بويىنا و باستان ورنىققان قوناقجايلىق پەن قاراپايىمدىلىق تا وزگە وتانداستارعا شۋاعىن شاشىپ كەلەدى.

مىنە، وسىنداي كەك، دىق ساقتامايتىن، مەيىرىمى مەن كەشىرىمى مول، شىنايى، ادال دوستىقتى تۋ ەتىپ كوتەرىپ، ونى باعالاي بىلەتىن حالىققا ايتار العىسىمىز شەكسىز. مەملەكەت قۇراۋشى ۇلتتى وزگەلەردەن دارالاپ تۇراتىن تاعى ءبىر قايسەتى – جاساعان جاقسىلىعى مەن قايىرىمدىلىعى ءۇشىن ەشكىمنەن ەشقاشان ەشتەڭە سۇرامايتىندىعى، ونى بۇلدامايتىندىعى. سوندىقتان دا بۇگىنگى العىس ايتۋ كۇنى وسى ايتۋلى داتانى بەلگىلەگەن جانە قازاق مەملەكەتتىگىن ءوز قولىمەن قۇرىپ، بارشا الەمدىك قاۋىمداستىققا تانىتا العان قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆقا جانە ساباقتاستىق سالتىن ساقتاي بىلگەن بۇگىنگى مەملەكەت باسشىسى قاسىم-جومارت توقاەۆقا پولياك ەتنومادەني بىرلەستىگى اتىنان شەكسىز ريزاشىلىعىمىز بەن العىسىمىزدى جەتكىزگىمىز كەلەدى.

ءبىز ءۇشىن العىس ايتۋ كۇنى - تاتۋلىق پەن ءوزارا كەلىسىمدى پاش ەتەتىن ەرەكشە كۇن. ەندەشە، وسىنداي مەرەيلى ساتتە زامانا زاپىرانى قازاق جەرىنە تاپ كەلتىرۋگە ماجبۇرلەگەن مىڭداعان جاندى جاتسىنباي قارسى الىپ ءارى قولىنداعى ريزىق-نەسىبەسىن ولارمەن بولىسكەن ۇلى دالانىڭ بۇگىنگى مۇراگەرلەرىنە تاعى ءبىر مارتە باسىمىزدى ءيىپ، العىسىمىزدى ايتۋ ارتىقتىق ەتپەيدى.

 

ەلەنا تسيبۋلسكايا،

اقتوبە وبلىسى پولياكتارىنىڭ

«سۆياتلو» ەتنومادەني بىرلەستىگىنىڭ ءتورايىمى

اقتوبە 

 

سوڭعى جاڭالىقتار

ۇقساس جاڭالىقتار