ايماقتار • 26 اقپان، 2020

الماتى اكىمى قۇرىلىسشىلارمەن كەزدەستى

22 رەتكورسەتىلدى

الماتى قالاسىنىڭ اكىمى باقىتجان ساعىنتاەۆ قالانى دامىتۋعا قاتىستى پروبلەمالىق ماسەلەلەردى تالقىلاۋ ءۇشىن قۇرىلىس كومپانيالارىنىڭ باسشىلارىمەن كەزدەستى.

مەگاپوليستە تۇرعىن ءۇي قۇرىلىسىنىڭ قارقىنى جوعارى. ەگەر وتكەن جىلى 2،1 ملن شارشى مەترگە جۋىق ءۇي پايدالانۋعا بەرىلسە، بيىلعى جىلى شامامەن 2،2 ملن شارشى مەتر تۇرعىن ءۇي نەمەسە 19،5 مىڭ پاتەر سالۋ جوسپارلانعان. ونىڭ ىشىندە، 1553 مىڭ شارشى مەتر كوممەرتسيالىق قۇرىلىس نەمەسە 16029 پاتەر، 593 مىڭ شارشى مەتر جەكە تۇرعىن ءۇي نەمەسە 2374 تۇرعىن ءۇي. مەملەكەتتىك بيۋدجەت ەسەبىنەن 64،5 مىڭ شارشى مەتر تۇرعىن ءۇي نەمەسە 1130 پاتەر سالۋ جوسپارلانۋدا.

قالا اكىمى اتاپ وتكەندەي، سالىنعان ءاربىر جاڭا ءۇي ءومىر ءسۇرۋدى قامتاماسىز ەتۋ جۇيەسىنە جۇكتەمە تۇسىرەدى. مىسالى، تەك ناۋرىزباي اۋدانىنىڭ وزىندە عانا شامامەن 500 مىڭ شارشى مەتر تۇرعىن ءۇي پايدالانۋعا بەرىلدى. وسىعان وراي، قالانىڭ جول-كولىك ينفراقۇرىلىمىنىڭ جۇكتەمەسى ارتۋدا. سوندىقتان اكىمنىڭ ايتۋىنشا، اباي داڭعىلىن ۇڭگىلەۋ جۇمىستارىنىڭ قارقىنىن تومەندەتپەۋ  ماڭىزدى.

ايتا كەتەرلىگى، ەكونوم-سىنىپتى ۇيلەرگە ينجەنەرلىك كوممۋنيكاتسيالاردى جۇرگىزگەن كەزدە پاتەرلەردىڭ قولجەتىمدىلىگىنە ءمان بەرىلەتىن بولادى.

اسا ماڭىزدى ماسەلەنىڭ ءبىرى - قالالىقتار سانىنىڭ ارتۋىنا وراي الەۋمەتتىك نىساندارعا  تۇسەتىن جۇكتەمەنىڭ ۇلعايۋى. قۇرىلىس كومپانيالارىنىڭ باسشىلارى بۇل پروبلەمانى بىرگە شەشۋگە دايىن ەكەندىكتەرىن ءبىلدىردى. كەشەندى قۇرىلىس بارىسىندا مەكتەپتەرگە، بالا باقشالارعا، ەمحانالارعا تۇسەتىن جۇكتەمەنى الدىن الا بولجاپ، الەۋمەتتىك نىسانداردى سالۋدىڭ تەتىكتەرى انىقتالاتىن بولادى.

بوس الاڭداردىڭ تاپشىلىعىنان  قۇرىلىس نارىعىنا قاتىسۋشىلارمەن بىرگە «ەسكى ءۇي» باعدارلاماسىنىڭ ماڭىزى  ارتادى. بۇگىنگى كۇنى قالادا 1440 ءۇي وسى ساناتقا جاتادى.

سالىناتىن ءار شارشى مەتردىڭ قولجەتىمدىلىگى ءۇشىن قۇرىلىستى جۇرگىزۋشىلەر وتاندىق وندىرۋشىلەردەن قۇرىلىس جانە  ارلەۋ ماتەريالدارىن ساتىپ الۋ كولەمىن ۇلعايتۋعا دايىن ەكەندىكتەرىن مالىمدەدى. مۇندا اڭگىمە سانفايانس، كافەل، كابەل، سانتەحنيكا جانە باسقا ونىمدەر تۋرالى بولۋدا. باستى شارت – ساپانىڭ حالىقارالىق ستاندارتتارىنا ساي بولۋ. سوندىقتان قالا اكىمى ب. ساعىنتاەۆتىڭ تاپسىرماسى بويىنشا الماتىنىڭ يندۋستريالدى ايماعىنداعى  «قاراپايىم زاتتار ەكونوميكاسى» باعدارلاماسى اياسىنداعى جوبالاردى جۇزەگە اسىرۋ جونىندەگى جۇمىستار جانداندىرىلادى.

كەزدەسۋ بارىسىندا قۇرىلىستى  سالۋشىلارعا اكىمدىكتىڭ قالانىڭ تاريحي ورتالىعىندا جانە اۋلالاردا ورنالاسقان ۋچاسكەلەردە ءۇي سالۋعا تىيىم سالاتىن پوزيتسياسىنىڭ ەش وزگەرمەيتىنى تاعى ءبىر رەت ەسكەرتىلدى.

«قالا وسۋدە، سوندىقتان قۇرىلىس مەگاپوليستىڭ جەتەكشى درايۆەرى بولىپ قالا بەرەدى. مۇندا بارلىق تاراپتاردىڭ – اكىمدىكتىڭ، قۇرىلىسشىلاردىڭ جانە تۇرعىنداردىڭ مۇددەلەرىن ساقتاۋ ماڭىزدى. بۇعان اشىق ديالوگ ارقىلى قولجەتكىزۋگە بولادى. ونى تۇراقتى جۇرگىزەتىن بولامىز»،- دەپ اتاپ ءوتتى كەزدەسۋدى قورىتىندىلاعان  ب. ساعىنتاەۆ.

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار