ءوڭىردىڭ ينۆەستيتسيالىق احۋالىن جاقسارتۋعا باعىتتالعان كەزدەسۋدە «Protecting Business and Investments» جوباسىنىڭ كۋراتورى, اقتوبە وبلىسى اكىمىنىڭ ورىنباسارى قايرات بەكەنوۆ, اقتوبە وبلىسىنىڭ سىبايلاس جەمقورلىققا قارسى قىزمەت دەپارتامەنتىنىڭ باسشىسى ميرلان مۇحامبەتوۆ, سونداي-اق وبلىستىق يندۋستريالىق-يننوۆاتسيالىق دامۋ باسقارماسى, «اتامەكەن» وكپ جانە «Kazakh Invest « ۇك اق وڭىرلىك وكىلدىگىنىڭ باسشىلىعى قاتىستى.
ەستەرىڭىزگە سالا كەتسەك, 2018 جىلدان باستاپ ەلىمىزدە قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن «Protecting Business and Investments» جوباسى جۇمىس ىستەۋدە. وسى ۋاقىت ىشىندە ينۆەستيتسيالىق جوبالاردى سىبايلاس جەمقورلىققا قارسى سۇيەمەلدەۋ جونىندەگى ونداعان كەلىسىمگە قول قويىلدى.
رەسەي, قىتاي حالىق رەسپۋبليكاسى, تۇركيا, گەرمانيا, بەلارۋس, نيدەرلاند, شۆەيتساريا, سلوۆاكيا سەكىلدى مەملەكەتتەردەن كەلگەن ينۆەستورلار, سونىمەن قاتار جەرگىلىكتى كاسىپكەرلەر اقتوبە وبلىسىنىڭ سىبايلاس جەمقورلىققا قارسى قىزمەتىنە سەنىم ءبىلدىردى.
جوبانىڭ تيىمدىلىگىن زاڭسىز قوسىمشا سالىق ەسەپتەۋ, جەر قاتىناستارى مەن مەملەكەتتىك ساتىپ الۋ سالاسىنداعى اكىمشىلىك كەدەرگىلەردى قامتيتىن ماسەلەلەردىڭ شەشىلۋى راستاپ وتىر.
وتكىزىلگەن كەڭەس شەڭبەرىندە نەيروحيرۋرگيا جانە تراۆماتولوگيا سالاسىندا جوعارى تەحنولوگيالىق يمپلانت بۇيىمداردى ءوندىرۋدى جۇزەگە اسىراتىن بەلارۋس رەسپۋبليكاسىنىڭ ينۆەستورى «قازمەدبيوتەح» جشس, سونداي-اق گاز تولتىرۋ ستانسالارىن سالۋمەن اينالىساتىن «Port Impex» جشس جەرگىلىكتى ينۆەستورىمەن سىبايلاس جەمقورلىققا قارسى كەلىسىمگە قول قويىلدى.
م.مۇحامبەتوۆتىڭ ايتۋىنشا, الداعى ۋاقىتتا دا ينۆەستورلاردىڭ قىزمەتىنە كەدەرگى كەلتىرۋدىڭ ءاربىر فاكتىسىنە جەدەل جانە ءپرينتسيپتى تۇردە ارەكەت ەتۋ كوزدەلىپ وتىر. الدىن الۋ شارالارىنا نازار اۋدارا وتىرىپ, سىبايلاس جەمقورلىققا قارسى قىزمەت ينۆەستيتسيالىق جوبالارعا ءوزىنىڭ قاتىسۋىن بىردەن بەلگىلەيتىن بولادى, بۇل شەنەۋنىكتەر ءۇشىن تەجەۋشى فاكتور بولۋى ءتيىس.
اقتوبە
