وتىرىس بارىسىندا قوعامدىق كەڭەستەر قىزمەتى جونىندەگى زاڭ جوباسى تالقىلاندى. ءىس-شاراعا قوعامدىق كەڭەستەر, ۇكىمەتتىك ەمەس ۇيىمدار, ساراپشىلار قاۋىمداستىعىنىڭ وكىلدەرى, مەملەكەتتىك ورگاندار مەن حالىقارالىق ۇيىمداردىڭ باسشىلارى قاتىستى.
جيىندى اشقان ن.ءابدىروۆ قوعامدىق كەڭەستەردىڭ ەل دامۋىنداعى ماڭىزىنا توقتالا كەلە, وسى سالاداعى بىرقاتار كەمشىلىكتى اتاپ ءوتتى. دەپۋتاتتىڭ ايتۋىنشا, قوعامدىق كەڭەستەر ەشقانداي مەملەكەتتىك مەكەمەنىڭ قۇزىرىنا كىرمەي, دەربەس جۇمىس ىستەۋى ءتيىس.
«قوعامدىق كەڭەستەر «جانىنداعى» بولماۋى ءتيىس. بۇگىندا اۋماقتىق بارلىق قوعامدىق كەڭەستەر دۇرىس اتالادى. ولار – وبلىستىڭ, اۋداننىڭ, الماتى, نۇر-سۇلتان قالاسىنىڭ قوعامدىق كەڭەستەرى», دەدى ن.ءابدىروۆ.
بۇعان مىسال رەتىندە دەپۋتات دەنساۋلىق ساقتاۋ مينيسترلىگىنىڭ قوعامدىق كەڭەسىن مىسالعا كەلتىردى.
«ەگەر قوعامدىق كەڭەس اتاۋىندا دەنساۋلىق ساقتاۋ مينيسترلىگى كورسەتىلسە, وندا بۇل – دۇرىس ەمەس. ول مينيسترلىكتىڭ قوعامدىق كەڭەسى بولا المايدى. اتالعان زاڭ جوباسىمەن جۇمىس ىستەگەن باستاپقى كەزەڭدە-اق قوعامدىق كەڭەستەردىڭ قانداي دا ءبىر مەملەكەتتىك ورگاننىڭ, اكىمدىكتىڭ, مينيسترلىكتىڭ جانىنداعى بولماۋىنا ءمان بەرگەن ەدىك. ۇيىم اۋماقتىڭ قوعامدىق كەڭەسى نەمەسە قانداي دا ءبىر باعىتتىڭ قوعامدىق كەڭەسى بولۋى ءتيىس. ايتالىق, ىشكى ىستەر مينيسترلىگىندە ءىىم جانىنداعى قوعامدىق كەڭەس ەمەس, ىشكى ىستەر ورگاندارىنىڭ قىزمەت ماسەلەلەرى جونىندەگى قوعامدىق كەڭەس بولۋى قاجەت», دەپ ءتۇسىندىردى ن.ءابدىروۆ.
بۇدان كەيىن ءسوز العان اقپارات جانە قوعامدىق دامۋ ۆيتسە-ءمينيسترى دانيار ەسين «قوعامدىق كەڭەستەر قىزمەتىنىڭ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭ جوباسىنىڭ نەگىزگى ەرەجەلەرىن تانىستىردى.
«قوعامدىق كەڭەستەر كونسۋلتاتيۆتىك-كەڭەسشى ورگان سانالاتىندىعىن جانە ءوز قىزمەتىن تاۋەلسىز ۇستانىم نەگىزىندە جۇزەگە اسىراتىنىن نازارعا الا وتىرىپ, قوعامدىق كەڭەستەردىڭ قۇرامىن قۇرۋدى جەرگىلىكتى وكىلەتتى اتقارۋشى ورگاندارعا, ال قوعامدىق كەڭەستەردىڭ قۇرامىن بەكىتۋدى جەرگىلىكتى ورگاندارعا بەرۋ ۇسىنىلدى», دەدى ۆيتسە-مينيستر.
د.ەسيننىڭ ايتۋىنشا, زاڭ جوباسىنا سايكەس, ءماسليحات اكىمدىك ۇسىنعان قاتىسۋشىلار قۇرامىن قابىلداۋعا نەمەسە قابىلداماۋعا قۇقىعى بار.
«زاڭ جوباسىندا كەڭەستەر قىزمەتىنىڭ كەيبىر اسپەكتىلەرىن قارجىلاندىرۋ تۋرالى شەشىم دە ۇسىنىلادى. قوعامدىق كەڭەس مۇشەلەرى قوعامدىق باستامامەن قىزمەت اتقارادى. قوعامدىق كەڭەس قىزمەتىنە تولەم جاساۋ ماسەلەسى شەشىلگەن. بۇعان قوسا, قازىرگى ۋاقىتتا قولدانىستاعى لاۋازىمدار تىزىلىمىنە قوعامدىق كەڭەس حاتشىسى لاۋازىمىن ەنگىزۋ جۇمىسى جۇرگىزىلىپ جاتىر. سونداي-اق كەڭسە تاۋارلارىن ساتىپ الۋعا, جەرگىلىكتى دەڭگەيدە قوعامدىق باقىلاۋ جۇرگىزۋ ءۇشىن كاسىبي ساراپشىلار قىزمەتىنە تولەم جاساۋعا جانە ءوڭىر ىشىندەگى ءىسساپارلار شىعىندارىنا قاراجات قاراستىرىلعان», دەدى د.ەسين.
ايتا كەتۋ كەرەك, قازىرگى تاڭدا ەلىمىزدە ءتۇرلى دەڭگەيدەگى 234 قوعامدىق كەڭەس جۇمىس ىستەيدى. سونىڭ 18-ءى – رەسپۋبليكالىق دەڭگەيدە. وسى كەڭەستەردەگى مۇشەلەردىڭ سانى 3564 ادامعا جەتكەن.
