ايتپەسە ورداباسى اۋدانى بادام ەلدى مەكەنى جانىنداعى 10 216 اسكەري بولىمىنەن 30 اۆتومات, 27 پيستولەت, 2 پمت, 420 دانا 5,45 كاليبرلى, 24 دانا 9 مم كاليبرلى پاتروندار ۇرلانباس ەدى. ەرەجە, اسكەري ءتارتىپ ساقتالسا, قاڭتار ايىنىڭ سوڭىنان, اقپاننىڭ جيىرماسىنا دەيىن قارۋ مەن وق-دارىلەر قولدى بولماس ەدى. ءيا اقپاننىڭ 20-سىندا جاريا بولعان ۇرلىقتىڭ سوڭعىسى 19 كۇنگى تۇنگى 23-تەر شاماسىندا بولعان. ال تاڭعى ساعات 7.30-دا كەزەكشى شۇعىل وقيعا جايىندا اقپارات العان. اسكەري قىزمەتشى ابىلاي بالعىنبايدىڭ قىزمەت ورنىن تاستاپ, قارۋ-جاراق الىپ كەتكەنى بەلگىلى بولادى. اعا لەيتەنانت شوراسۋلوۆتىڭ ورنىنا كەزەكشىلىك اتقارعان سارباز وفيتسەردىڭ قالتاسىنان قارۋ-جاراق قويماسىنىڭ كىلتىن بايقاتپاي العان.
كۇزەت دابىلىن ءوشىرىپ, قارۋ-جاراقتاردى كوتەرگەنىنشە الىپ شىققان. كىلتتى قايتادان كەزەكشىنىڭ قالتاسىنا سالۋدى دا ۇمىتپاعان كورىنەدى. قارۋ-جاراق بۇعان دەيىن دە ۇرلانعان. «قاڭتاردىڭ سوڭىنان باستاپ اقپان ايىنىڭ ورتاسىنا دەيىن قارۋ-جاراق قويماسىنا وزدىگىنەن كىرۋگە رۇقسات العان سارباز كۇنىنە ءبىر-ەكى قارۋدان ۇرلاپ كەتىپ جۇرگەن. كەيىن بۇل قىلمىسقا دوستارىن تارتقان. قارۋلاردىڭ باسىم بولىگى 20 اقپانعا قاراعان ءتۇنى ۇرلانعان», دەدى ىشكى ىستەر مينيسترلىگى تەرگەۋ باسقارماسىنىڭ باستىعى سانجار ءادىلوۆ جۋرناليستەرگە بەرگەن سۇحباتىندا.
ۇقك مەن ءىىم بىرلەسكەن جەدەل-تەرگەۋ توبى ۇرلىققا قاتىسى بارلاردىڭ بارلىعىن ءىزىن سۋىتپاي ۇستاپ, قارۋلاردى تاركىلەدى. ساتىلعان ەكى تاپانشا دا تابىلعان. قازىرگى ۋاقىتتا قورعانىس مينيسترلىگى تۇركىستان وبلىسىندا ورنالاسقان اسكەري بولىمدە قارۋ-جاراقتاردى قوسىمشا تۇگەندەۋ جۇمىستارىن جۇرگىزىپ جاتىر. «سونىمەن قاتار ءۇش لاۋازىمدى تۇلعا, اتاپ ايتقاندا ديۆيزيا كومانديرى, جەدەل كەزەكشى, سونداي-اق كەلىسىمشارت بويىنشا قىزمەت ەتكەن قاتارداعى سارباز اسكەري قىزمەت ەرەجەلەرىن بۇزعان جانە قارۋدىڭ ۇرلانۋىنا اكەلىپ سوققان نەمقۇرايدىلىقتارى ءۇشىن قازىرگى ۋاقىتتا ۇستالىپ, قاماۋعا الىندى», دەدى سانجار ءادىلوۆ. تەرگەۋ مالىمەتتەرى بويىنشا كەلىسىمشارتپەن اسكەري قىزمەت اتقارعان سەرجانت ا.بالعىنباي 1995 جانە 1996 جىلعى سىرتتاعى ەكى دوسىمەن 29 اۆتومات, 24 تاپانشا الىپ قاشقان. ىشكى ىستەر مينيسترلىگى 291 (قارۋدى, وق-دارىلەردى, جارىلعىش زاتتار مەن جارىلىس قۇرىلعىلارىن جىمقىرۋ نە قورقىتىپ الۋ) جانە 453-باپتار (قىزمەتكە سالعىرت قاراۋ) بويىنشا قىلمىستىق ىستەردى تىركەگەن. تەرگەۋ سوتىنىڭ سانكتسياسىمەن ۇستالعان ادامدار قاماۋعا الىنعان. «سونىمەن قاتار جەكەلەگەن لاۋازىمدى ادامداردىڭ, ونىڭ ىشىندە اسكەري ءبولىم باسشىلىعىنىڭ قىزمەتتىك مىندەتتەرگە نەمقۇرايدى قاراعانى ءۇشىن جاۋاپكەرشىلىككە تارتۋ تۋرالى ماسەلەسى قاراستىرىلۋدا. تەرگەۋ جالعاسىپ جاتىر», دەدى تەرگەۋ باسقارماسىنىڭ باستىعى.
بۇل وقيعاعا قاتىستى كۇدىكتىلەر ءتيىستى جازاسىن الار. ال كوپشىلىك بۇگىندە تۇراقتى جۇمىس ورنى, جالاقىسى بار 25 جاستاعى جىگىتتىڭ قىلمىسقا بارعانىن تۇرلىشە جورۋدا. اسكەري قىزمەتكە ورنالاسۋدىڭ ءوزى وڭاي ەمەس, بىرنەشە تەكسەرۋدەن وتەدى. ونىمەن قويماي جاس جىگىت جاماناتتى بولماعان. اۋىلداستارى دا جاس جىگىتتى جاماندىققا قيمايدى. قاراپايىم, تاربيەلى ازامات ەكەنىن ايتادى. كوپ بالالى وتباسىندا وسكەن. ال ونىڭ اكەسى اۋىلداعى سىيلى ازاماتتاردىڭ ءبىرى. ابىلاي ۇلدان ءۇيدىڭ ۇلكەنى, ونىڭ مەكتەپتە وقيتىن ىنىلەرى مەن ستۋدەنت اپكەسى بار ەكەن. اسكەرگە دەيىن شىمكەنتتە ارنايى ورتا ءبىلىم العان. وسىنداي ازاماتتىڭ تەرىس جولعا تۇسۋىنە, انتتان اتتاۋىنا قانداي ورتا نەمەسە قانداي جاعداي سەبەپ بولعانى ازىرگە بەلگىسىز.
تۇركىستان وبلىسى
