ەستەرىڭىزدە بولسا, 2014 جىلى ۋكراينانىڭ وڭتۇستىك-شىعىسىنداعى بىرقاتار ايماقتا سەپاراتيستەر باس كوتەرىپ, اكىمشىلىك عيماراتتاردى باسىپ العان-تۇعىن. شەتەلدەن كەلگەن قارۋ-جاراقپەن ولار كەيىنىرەك رەفەرەندۋم وتكىزگەنىن جەلەۋ ەتىپ, لۋگانسك حالىقتىق رەسپۋبليكاسىن (لنر) جانە دونەتسك حالىقتىق رەسپۋبليكاسىن (دنر) جاريالادى. مەملەكەت ىشىنەن مەملەكەت جاريالاعاندارعا ۋكراينا قارۋلى قارسىلىق كورسەتكەن. الايدا قايدان كەلگەنى بەلگىسىز اسكەري تەحنيكامەن جاراقتانعان سەپاراتيستەر بوي بەرمەدى. وسىلايشا, وڭىردەگى جاعداي شيەلەنىسىپ, ءالى كۇنگە دەيىن جالعاسىپ كەلەدى.
حاركوۆتا, دونەتسكتە, لۋگانسكىدەگى بولعان سوعىس سالدارىنان 13 مىڭعا جۋىق ادام قازا تاۋىپ, 30 مىڭنان استامى جاراقاتتاندى. ەكى ميلليونعا جۋىق تۇرعىن ءۇيىن تاستاپ, بوسقىن اتاندى.
حالىقارالىق قوعامداستىق تا, ۋكراينا دا دونەتسك پەن لۋگانسكىدەگى قاقتىعىسقا رەسەيدى كىنالاپ, وزگە ەلدىڭ ىشكى تىرلىگىنە ارالاسىپ, قارۋلى كومەك كورسەتتى دەپ ەسەپتەيدى. الايدا كرەمل اتالعان ايىپتاۋلاردىڭ بارىنەن باس تارتىپ, سەپاراتيستەرگە قولۇشىن سوزباعانىن مالىمدەدى.
جوعارىداعى جاعدايعا قايتا ورالساق. وتكەن اپتادا بولعان قاقتىعىستان ۋكراينا شەكارا قىزمەتىنىڭ ءبىر ساربازى قازا تاۋىپ, بىرنەشەۋى جارالاندى. قارۋلى كۇشتەردىڭ ءباسپاسوز قىزمەتى كيەۆتىڭ قاراماعىنداعى ايماقتا ورنالاسقان شەكتەسۋ پۋنكتىنە بىرنەشە سەپاراتيست شابۋىل جاساپ, كەرى شەگىنگەنىن حابارلادى. سونداي-اق اۋىر ارتيللەريا قولدانىلعانىن جەتكىزدى.
ۋكراينا قارۋلى كۇشتەرىنىڭ باسشىسى, گەنەرال-پولكوۆنيك رۋسلان حومچاكتىڭ ايتۋىنشا, قاقتىعىس كەزىندە 4 سەپاراتيست وققا ۇشىپ, 6-ۋى جارالانعانىن مالىمدەدى. قولباسشىنىڭ سوزىنە سۇيەنسەك, شابۋىل جاساماستان بۇرىن ارتيللەريالىق سوققى جاسالعان. «قارسىلاستار ەڭ اۋەلى كامەرالاردى جويىپ جىبەردى. نە بولىپ جاتقانىن تىركەپ وتىرۋ ءۇشىن بارلىق جاققا كامەرا ورناتىلعان. ولار ەڭ اۋەلى سولاردى جويىپ جىبەردى», دەدى ر.حومچاك.
الايدا لۋگانسك ايماعىنداعى سەپاراتيستەر بيلىگى قاقتىعىسقا ۋكراينانى كىنالاپ وتىر. ولاردىڭ ايتۋىنشا, بىرنەشە ۋكراينالىق سارباز شەكتەسۋ پۋنكتىن كەسىپ وتپەك بولعان. ۋكراينا پرەزيدەنتى ۆلاديمير زەلەنسكي وسى وقيعاعا بايلانىستى پىكىر ءبىلدىرىپ, قاقتىعىستى بەيبىتشىلىك جونىندەگى كەلىسىمگە كەدەرگى كەلتىرۋ دەپ ەسەپتەيتىنىن جەتكىزدى. ايتسە دە مەملەكەت باسشىسى شابۋىلدى كىم ۇيىمداستىرعانى جونىندە ءتىس جارعان جوق.
«اسكەرىمىزدىڭ الەۋەتى مىقتى ەكەنىن ايتقىم كەلەدى. ارانداتۋ بولادى. اسكەرىمىز لايىقتى جاۋاپ بەردى. وقيعا تولىقتاي باقىلاۋىمىزدا», دەدى ول. ۋكراينانىڭ سىرتقى ىستەر ءمينيسترى ۆاديم پريستايكو بۇۇ باس اسسامبلەياسىنا دونەتسك جانە لۋگانسك وبلىستارىنا بىتىمگەرلەر اسكەرىن ەنگىزۋدىڭ ۋاقىتى كەلگەنىن ايتىپ, ءوتىنىش جاسادى.
شەكتەسۋ پۋنكتىندەگى قاقتىعىستان كەيىن رەسەي مەن ۋكراينا بۇقارالىق اقپارات قۇرالدارى اراسىندا اقپاراتتىق شابۋىل بۇرق ەتە ءتۇستى. ماسەلەن, رەسەيلىك «ۆزگلياد» گازەتى «كيەۆ ماسكەۋدى دونباستا سوعىسۋعا شاقىرادى» دەپ ماقالا جازسا, liga.net پورتالى دونباستاعى قاقتىعىسقا كرەمل تاپسىرىس بەرگەنىن جازادى.
اقش مەملەكەتتىك دەپارتامەنتىنىڭ ءباسپاسوز حاتشىسى مورگان ورتاگۋس تۋيتتەردەگى پاراقشاسىندا «اقش تاراپى ۋكرايناعا قارسى رەسەيدىڭ كەيىنگى اگرەسسياسىن ايىپتاپ, ارىپتەستەرى مەن وداقتاستارىن قولدايدى. ءبىز پرەزيدەنت زەلەنسكيدىڭ بەيبىتشىلىك ورناتۋ ارەكەتىن قولدايمىز جانە مينسك كەلىسىمىنە سايكەس وق اتۋدى دەرەۋ توقتاتۋعا شاقىرامىز», دەپ جازدى.
ەقىۇ-نىڭ ۋكرايناداعى ارنايى ميسسياسى وقيعا ورنىنا بارىپ, جاعدايدى باقىلاپ قايتتى. ولاردىڭ كۇندەلىكتى قورىتىندىسىنا سۇيەنسەك, ايماقتا 2500-دەن استام بومبا جارىلعان. سونداي-اق قاقتىعىس بولعان جەردەن ەكى تاراپتان دا بىرنەشە اسكەري تەحنيكانى بايقاعان.
