ارينە, سالادا جەتىستىكتەر دە بار. جامبىل وبلىستىق ءبىلىم باسقارماسى باسشىسىنىڭ مىندەتىن اتقارۋشى ءجاميلا بەكباتىروۆانىڭ ايتۋىنشا 1891 مۇعالىم رەسپۋبليكالىق جانە حالىقارالىق كونكۋرستاردىڭ جەڭىمپازى اتانعان. سونىمەن قاتار وبلىس وقۋشىلارى پاندىك وليمپيادالاردا 132 مەدالعا قول جەتكىزىپ, ءوڭىردىڭ 10 مەكتەبى رەسپۋبليكا بويىنشا 100 ۇزدىك مەكتەپ قاتارىنا ەنىپ وتىر. بىراق بەردىبەك ساپارباەۆ قورداي اۋدانى, ماسانشى اۋىلىنداعى مەكتەپتەردىڭ بىرىنەن ون جىل بويى بىردە-ءبىر «التىن بەلگى» نەمەسە «ۇزدىك اتتەستات» يەگەرىنىڭ شىقپاعانىن, تەك ءبىر عانا تۇلەكتىڭ جوعارى وقۋ ورنىنا گرانتقا تۇسكەنىن اتاپ ءوتتى. سونىمەن قاتار ءجاميلا بەكباتىروۆا نەگىزگى ماسەلە رەتىندە پەداگوگتاردىڭ بىلىكتىلىگىنىڭ تومەندىگىن اتاپ ءوتىپ, سىرتتاي بولىمدە وقىپ, ديپلوم الاتىنداردىڭ جايىنا نازار اۋدارتتى.
اكىمنىڭ «كەيبىر مەكتەپ ديرەكتورلارى وزدەرىن كنياز سەكىلدى سەزىنەدى» دەگەن ءسوزىنىڭ سوڭىن الا-اق تاراز قالاسىنداعى №43 ورتا مەكتەپتىڭ ۇجىمى ديرەكتوردىڭ ۇستىنەن ارىزداندى. ديرەكتور قىزمەتتىك بابىن اسىرا پايدالانىپ مەكتەپتە اقشا جيناۋدى ادەتكە اينالدىرعان كورىنەدى. اتالعان مەكتەپتىڭ مۇعالىمى كۇنسۇلۋ بورىمبەكوۆا ديرەكتورعا كىم اقشا بەرمەيدى, سونىڭ جۇمىسى نولگە تەڭ بولاتىنىن ايتتى. ءتىپتى ول الەۋمەتتىك جەلى ارقىلى جۇمىستان ورىنسىز بوساتىلعانىن ايتىپ شاعىمدانعان ەدى. سونىمەن قاتار مۇعالىمدەردىڭ ايتۋىنشا, ولاردى كەز-كەلگەن ساباقتىڭ ۇستىنەن شاقىرتىپ, جينالىس جاسايدى ەكەن. زاڭسىز اقشا جيناعانى ءوز الدىنا, باسشىنىڭ مىنەزى دورەكى دەيدى ولار. الايدا, مەكتەپ ديرەكتورى ەلميرا ومىربەكوۆا مۇعالىمدەردىڭ بۇل پىكىرىنە كەلىسپەيدى. ءتىپتى ول سوتقا جۇگىنۋگە ءماجبۇر بولعانىن ايتادى. ەلميرا ومىربەكوۆا مۇنىڭ الدىندا تۋرا وسىنداي جاعدايمەن №25 مەكتەپتەن جۇمىستان كەتكەن ەكەن.
بەردىبەك ساپارباەۆتىڭ تاپسىرماسى بويىنشا, اتالعان مەكتەپ ديرەكتورىنىڭ ماسەلەسىنە بايلانىستى ارنايى كوميسسيا قۇرىلدى. كوميسسيا قۇرامىندا وبلىستىق ءبىلىم باسقارماسىنىڭ, سالالىق كاسىپوداقتىڭ جانە ۇكىمەتتىك ەمەس ۇيىمنىڭ وكىلدەرى بار. كوميسسيانىڭ العاشقى وتىرىسى ءوتىپ, بۇگىندە ءبىلىم وشاعىنداعى زاڭبۇزۋشىلىقتار بويىنشا تەكسەرۋ جۇرگىزىلۋدە. تاراز قالالىق ءبىلىم ءبولىمى باسشىسىنىڭ مىندەتىن اتقارۋشى ءۋاليحان بايدۋانوۆتىڭ ايتۋىنشا, جۇمىستان زاڭسىز بوساتىلعانىن ايتىپ شاعىنعان كۇنسۇلۋ بورىمبەكوۆا كەلىسىم كوميسسياسىنىڭ شەشىمىمەن جۇمىسىنا قايتا الىنىپتى. ال, ەندى مەكتەپ ديرەكتورىنا قانداي جازا قولدانىلاتىنىن تەكسەرۋ جۇمىستارى كورسەتەدى.
جامبىل وبلىسى
