قازاقستان • 24 اقپان، 2020

الماتىدا ۆولونتەرلەر فورۋمى ءوتتى

55 رەتكورسەتىلدى

مەملەكەت باسشىسى قاسىم-جومارت توقاەۆ «يگى ىسپەن اينالىسۋ، ادام­دارعا جاقسىلىق جاساۋ – حال­قى­مىزدىڭ كونە زاماننان كەلە جات­قان ءداستۇرى. ءبىز وسى ءداستۇردى ساقتاپ قالۋىمىز كەرەك. سەبەبى بىرەۋ­گە قول ۇشىن سوزىپ، قولداۋ كورسەتۋ – قانىمىزعا سىڭگەن قاسيەت. «جۇمىلا كوتەرگەن جۇك جەڭىل». ۆولون­تەرلىك قىزمەتتىڭ باستى ماقساتى دا – بىرگە جۇمىلىپ، حالىققا قىز­مەت ەتۋ» دەپ ەرىكتىلەر جىلى رەتىندە ايدار تاعىلعان بيىلعى جىل ىزگىلىكتى ىستەر سالتانات قۇرىپ، قايىرىمدىلىق قاسيەتتەردىڭ كەڭگە قانات جاياتىن  ايتۋلى ءساتى ەكەنىن ايشىقتاپ كورسەتتى.

قوعامدى ادامگەرشىلىككە ۇندەپ، جاستاردى قايىرىمدى ىسكە تاربيەلەۋ ماقساتىندا قۇرىلعان «ىزگىلىك ەلشىسى» جوباسى اشىلعانىنا كوپ ۋاقىت بولا قويماسا دا  كوپتەگەن يگى باستامالارعا مۇرىندىق بولىپ كەلەدى. ەلىمىزدىڭ جەتەكشى ۋنيۆەرسيتەتتەرى جاپپاي قولداعان جوبا الماتىدا ۆولونتەر جاستاردىڭ فورۋمىن وتكىزدى. باسقوسۋدا رەسپۋبليكانىڭ بارلىق ايماقتارىنان  كەلگەن ەرىكتىلەر ءوز پىكىرلەرىن ورتاعا سالىپ، پرەزيدەنت ايقىنداپ بەرگەن جەتى باعىت بويىنشا اعىمداعى جىلى اتقارىلاتىن جۇمىستار جونىندە ۇسىنىس-تىلەكتەرىن جەتكىزدى.

تۇڭعىش پرەزيدەنت - ەلباسى قورىنىڭ اتقارۋشى ديرەكتورىنىڭ ورىنباسارى يگور روگوۆ، الماتى قالاسى اكىمىنىڭ ورىنباسارى ەرجان باباقۇماروۆ، بەلگىلى كينورەجيسسەر ەرمەك تۇرسىنوۆ باستاعان قوناقتار ىزگىشۋاق ەڭبەكتەرى ءۇشىن جاستارعا ريزاشىلىقتارىن ءبىلدىرىپ، الداعى جۇمىستارىنا ساتتىلىك تىلەدى.

ەلىمىزدە ەرىكتىلەر قوزعالىسىنىڭ وتىز جىلعا جۋىق تاريحى بار. بۇگىندە قۇرامى جاستاردان تۇراتىن «ەرىكتىلەر ليگاسى» جۇمىس ىستەيدى. كوپتەگەن قوعامدىق ۇيىمداردىڭ وسى باعىتتاعى شارالارى ناتيجەلى ىستەرمەن ايشىقتالۋدا. «نۇر-وتان» پارتياسىنىڭ دا قابىلداۋ بولمەلەرى ازاماتتاردىڭ ۇسىنىس-پىكىرلەرىن دامىلسىز قابىلداپ كەلەدى. فورۋمعا قاتىسۋشىلار بۇل ىستە ناقتى ءبىر جۇيە كەرەكتىگىن ايتادى. ءار باستاعان جۇمىستىڭ ارنايى تۇجىرىمداماسى جاسالۋى شارت. الەۋمەتتىك كومەك كورسەتۋدىڭ استارىندا كوزگە كورىنبەيتىن، ەرىكتىلەر عانا بەتپە-بەت كەلەتىن جاعدايلار كەزدەسەدى. «ىزگىلىك ەلشىسى» ۆولونتەرلەر قوزعالىسىنىڭ جەتەكشىسى  اينۇر ءسابيتوۆا ەرىكتىلەردى ۇنەمى ىنتالاندىرىپ وتىرۋدىڭ ماڭىزى زور ەكەنىن ايتىپ، اتاۋلى جىلدا بارشا جاستاردى يگى ىستەردى بىرلەسە اتقارۋعا شاقىردى.

«ۆولونتەرلىك – ءاربىر ازاماتتىڭ  مىندەتى. كوپشىلىك ۆولونتەرلىكتى تەگىن قىزمەت كورسەتۋ نەمەسە بىرەۋگە جاردەم­دەسۋ دەپ بىلەدى. شىنىنا كەلسەك، ءار ازامات ۆولونتەر بولۋى كەرەك. سەبەبى اينالامىزدا كومەك­كە مۇقتاج ادامدار كوپ. اڭگىمە تەك ماتەريال­دىق كومەككە تىرەلمەيدى، جاي عانا جىلى ءسوز ايتىپ مۇڭايعانعا رۋحاني جاردەم جاساۋدىڭ ءوزى ناعىز ۆولونتەرلىك. ءارى ۇلكەن ساۋاپتى ءىس. ءار ازامات تۇرىپ جاتقان جەرىنىڭ تازالىعىن ساقتاپ، قوعامنىڭ بىرلىگىن نىعايتۋعا سوزىمەن دە ىسىمەن ۇلەس قوسۋى كەرەك. ماسەلەن جەردەگى قوقىستى كوتەرگەن­نەن ازاماتتاردىڭ ارلانباعانى دۇرىس. سايىپ كەلگەندە بۇل قوعامنىڭ ىزگىلەنۋىنە قوسىلعان ۇلەس. سوندىقتان ۆولونتەرلەر دەپ جاۋاپ­كەر­شىلىك پەن مىندەتتى شەكتەمەگەن ءجون. بۇل بارلىعىمىز جۇمىلا اتقاراتىن شارۋا»، دەيدى اينۇر ءسابيتوۆا.

ۆولونتەرلىك – ءوز ەركىڭمەن، شىنايى جۇرەك قالاۋىمەن اتقارىلاتىن جۇمىس. بۇل –يماندىلىق پەن پاراساتتىلىقتىڭ ايقىن كورىنىسى. بۇگىندە الەم بويىنشا ءجۇز ميلليوننان استام ادام وسىناۋ يگى ىسپەن اينالىسادى. ەلىمىزدە 600-گە جۋىق  ۆولونتەرلىك ۇيىم ءىرى قالالار مەن اۋىلداردا بەلسەندى جۇمىس اتقارۋدا.   

 

الماتى

سوڭعى جاڭالىقتار

عاسىر زۇلماتى

قوعام • كەشە

قۇردىم (تورتتاعان)

ادەبيەت • كەشە

جاڭا فورماتتاعى جىر كەشى

رۋحانيات • كەشە

ۇقساس جاڭالىقتار