قوعام • 20 اقپان، 2020

«سۋپەرمەن» تىكەنەكتىدە تۇرادى

73 رەتكورسەتىلدى

ۆولونتەر دەگەندە كوز الدىمىزعا بىردەن كىلەڭ جاستاردىڭ كەلە قالاتىنى بار. بۇل تۇسىنىكتى دە: بويىندا كۇش-قۋاتى بار جاستىڭ كارى-قۇرتاڭعا، بالا-شاعاعا كو­مەك قولىن سوزۋىن مىندەتتى شارۋا سانايمىز، زاڭدى دەپ تە قابىل­دايمىز. ايتسە دە، ۆولونتەرلىك دەگەنىڭىز جاس تال­عامايدى ەكەن. كەۋدەدە ىزگىلىك پەن مەيىرىمگە تولى ۇلكەن جۇرەك سوعىپ تۇرسا، ول ءوز دەگەنىن ىستەمەي قوي­مايتىن كورىنەدى. بۇعان مىسالدى الىس­تان ىزدەپ كەرەگى جوق.

قاراعاندى وبلىسىنداعى نۇرا اۋدانىنىڭ سارىوزەن اۋىلدىق وكرۋگىندە تۇراتىن ميننياگزام اۆلياروۆتى ەلىمىزدەگى ەرىكتىلەردىڭ اتاسى دەپ سەنىمدى تۇردە اتاۋعا بولادى. سەكسەننىڭ سەڭگىرىنە شىققان قاريا شىنجىر تاباندى «دت-75» تراكتورىمەن، مىنە، ءبىرتالاي جىل بولعان، اۋىلداستارىنىڭ مۇقتاجىن وتەپ ءجۇر: قىستىگۇنى كوشەلەردى قاردان ارشىسا، كوكتەم شىعا كومىر سۋاعارلارىن تازارتادى. مۇنىمەن دە تىنباي، جازدا الەۋمەتتىك تۇرعىدا ءالجۋاز سانالاتىن وتباسىلار مەن جوق-جىتىك جانداردىڭ ءشوبىن شاۋىپ، ءتۇسىرىپ بەرەتىن كورىنەدى. وسىنىڭ ءبارىن ول جۇرەك قالاۋىمەن ەرىكتى تۇردە جانە سۋ تەگىن ىستەيدى. جۇرت «ەڭ قۇرىعاندا جاعارمايىن قۇيىپ بەرەيىك» دەسە، اقساقال رەنجيتىن كورىنەدى. جاقسىنىڭ ىسىنە ابدەن ءتانتى بولعان جەرلەستەرى بۇل كىسىنى «سارىوزەندىك سۋپەرمەن» دەپ اسپەتتەپ، قۇرمەت تۇتادى ەكەن.

ميننياگزام اۆلياروۆ باشقۇرت ۇلتىنىڭ وكىلى. قازاقستانعا تىڭ يگەرەمىن دەپ كەلگەن ونىڭ پەشەنەسىنە سارىوزەن اۋىلدىق وكرۋگىنە قاراستى تىكەنەكتىنى مەكەن ەتىپ قالۋ جازىلىپتى. وسى جەردە زەينەت جاسىنا جەتكەنگە دەيىن مەحانيزاتور بولىپ تەر توككەن. ادال ەڭبەگىمەن اينالاسىنا سىيلى بولعانى عوي، ارداگەردىڭ كەۋدەسىندە «قۇرمەت بەلگىسى» وردەنى مەن «ەرەن ەڭبەگى ءۇشىن» مەدالى جارقىرايدى. ال وتكەن جىلى ميننياگزام اۆلياروۆ «شاپاعات» مەدالىمەن ماراپاتتالعان.

«سارىوزەندىك سۋپەرمەننىڭ» باۋىرىنان بەس بالا وربىگەن. ءوزى دە، بالالارى دا قازاقشاعا سۋداي. ۇلتىمىزدىڭ سالت-داستۇرىنە قۇرمەتپەن قاراپ، قازاقتىڭ ىشىنە تاستاي باتىپ، سۋداي ءسىڭىپ كەتكەن. ونى ايتاسىز، بۇل كىسىنىڭ كەلىندەرى مەن كۇيەۋ بالالارى تۇگەلدەي قازاقتان ەكەن.

ءوزى ءۇشىنشى توپتاعى مۇگەدەك بولسا دا، وزگەلەرگە، ونىڭ ىشىندە ون ەكى مۇشەسى تۇگەل ساۋ جاستارعا ونەگە تۇتار ءىستىڭ ۇلگىسىن كورسەتىپ جۇرگەن قاريانىڭ عۇمىر جاسى ۇزاق بولسا ەكەن دەپ تىلەيسىڭ!

 

قاراعاندى وبلىسى

 

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ەكى قىلمىستىق توپ ۇستالدى

ايماقتار • 05 ماۋسىم، 2020

ۇقساس جاڭالىقتار