جۇزدەسۋگە سەنات دەپۋتاتتارى, ەنەرگەتيكا ءمينيسترى نۇرلان نوعاەۆ, يندۋستريا جانە ينفراقۇرىلىمدىق دامۋ مينيسترلىگىنىڭ وكىلدەرى, سونداي-اق «KEGOC», «سامۇرىق-ەنەرگو» جانە «استانا اەك» اكتسيونەرلىك قوعامدارىنىڭ باسشىلارى قاتىستى.
سەنات توراعاسى كەزدەسۋدىڭ ماڭىزىنا توقتالا كەلىپ, وتكەن جىلدىڭ قاراشا ايىندا نۇر-سۇلتان قالاسىندا ەلەكتر ەنەرگياسى بىرنەشە مارتە ءوشىپ قالعانىن ەسكە سالدى.
«قالانىڭ ءبىر بولىگى ەلەكتر جارىعىنسىز قالدى, ونىڭ سەبەبىن ءبىلۋ ءارى ءتۇسىنۋ ءۇشىن مەملەكەتتىك ۋاكىلەتتى ورگانداردى تىڭداعىمىز كەلەدى. سول جاعالاۋدىڭ كوممۋنيكاتسيالارى مەن ينفراقۇرىلىمى جاقىندا سالىنعان, ولاردى كونەردى نەمەسە اپاتتى جاعدايدا دەپ ايتۋعا بولمايدى», - دەدى ول.
«استانا اەك» باسقارما توراعاسى سەرىك بالقىشەۆ ءوز بايانداماسىندا تۇتىنۋشىلاردى ەلەكترمەن جابدىقتاۋداعى ۇزاق ۇزىلىستەرگە دۋشار ەتكەن اقاۋلارعا مونيتورينگ ناتيجەلەرى يەسىز جەلىلەر مەن قوسالقى ترانسفورماتورلىق ستانتسيالار نەگىزگى سەبەپ ەكەنىن ايتتى. «استانا اەك» باسشىسىنىڭ اقپاراتى بويىنشا, قۇرىلىس كومپانيالارى كوپ پاتەرلى تۇرعىن ءۇي كەشەندەرىن پايدالانۋعا بەرگەننەن كەيىن ءۇي ىشىندەگى ينجەنەرلىك كوممۋنيكاتسيالاردى قىزمەت كورسەتەتىن كومپانيالارعا تاپسىرادى.
«سىرتقى ەلەكتر جەلىلەرى يەسىز قالادى, ولارعا ءتيىستى قىزمەت كورسەتىلمەيدى ءارى كۇزەتىلمەيدى, سونىڭ ناتيجەسىندە قوسالقى ستانتسيالاردىڭ جابدىقتارى بۇزىلادى ءارى ىستەن شىعادى. مۇنداي جەلىلەردەگى اپاتتار تۇرعىن ءۇي كەشەندەرىنە ەلەكتر بەرۋدە ۇزىلىستەرگە دۋشار ەتەدى, ول تىرشىلىكتى قامتاماسىز ەتۋ جۇيەلەرىنە, اسىرەسە جىلىتۋ كەزەڭىندە وتە قولايسىز اسەر ەتەدى. قازىرگى ۋاقىتتا سىرتقى ينجەنەرلىك جەلىلەردى مامانداندىرىلعان قىزمەت كورسەتەتىن ۇيىمدارعا بەرۋ ماسەلەسى نورماتيۆتىك-قۇقىقتىق اكتىلەرمەن رەتتەلمەي كەلەدى», دەدى ول.
سەنات دەپۋتاتتارى تالقىعا بەلسەندى قاتىستى. سەناتور سەرىك جاقسىبەكوۆ تەحنيكالىق شارتتاردى بەرۋ راسىمدەرى مەن سالالىق ەرەجەدە ءبىر جەلىدە اپاتتى جاعداي بولعاندا باسقا جەلىگە اۋىستىرۋ شارالارىنىڭ بولۋى تۋرالى سۇراق قويدى.
داريعا نازارباەۆا تالقىلاۋ بارىسىندا يەسىز جاڭا جەلىلەردىڭ پايدا بولۋىنىڭ الدىن الۋ ماسەلەسىنە ەرەكشە نازار اۋداردى. «قازىر بۇل باستى مىندەت, ايتپەسە ول جۇمىس ەشقاشان اياقتالمايدى. كاسىپكەرلىك كودەكستى قاراۋعا اسا مۇقيات ورالۋىمىز كەرەك, ويتكەنى ءبىز قانداي ماسەلەلەردى قاراستىرساق تا, باقىلاۋدىڭ جوقتىعى پروبلەماسىنا ۇدايى تاپ بولامىز, تيىسىنشە مەملەكەت ساپاعا جاۋاپ بەرە الماي وتىر. جالپى العاندا, تەحنولوگيالىق تىزبەكتىڭ ءبارى ءتيىمسىز بولىپ شىعادى, ول كەز كەلگەن ۋاقىتتا ادامداردىڭ دەنساۋلىعى مەن ومىرىنە زيان كەلتىرۋى مۇمكىن», دەپ اتاپ ءوتتى د.نازارباەۆا.
سالاداعى جاعدايعا دەپۋتات مۇحتار قۇل-مۇحاممەد تە تۇسىنىكتەمە بەردى. «ايماقتاردا جۇمىس ىستەگەندەر بۇل ماسەلەلەردىڭ قالاي پايدا بولعانىن جاقسى بىلەدى. ينۆەستور كەلەدى-داعى بۇكىل ايماقتىق جەلىنى مەنشىككە ساتىپ الادى, ايتسە دە وعان اقشا سالۋعا ءوزىنىڭ مۇمكىندىگى بولمايدى, اكىمدىكتەردىڭ دە قولىنان كەلمەيدى, ويتكەنى ولاردىڭ مەنشىگى ەمەس, وسىنداي جاعدايدا يەسىز جەلىلەر پايدا بولادى», - دەدى م.قۇل-مۇحاممەد.
د.نازارباەۆا ءوز كەزەگىندە ەلەكتر ەنەرگەتيكاسى سالاسىن اكىمشىلەندىرۋدەگى ساپانىڭ تومەندىگىنە نازار اۋداردى. «باقىلاۋ جوق, كاسىپورىن زاڭ مەن نورماتيۆتىك-قۇقىقتىق اكتىلەردى ادال ورىنداۋى ءۇشىن مونيتورينگ جاساۋ كەرەك. رەتتەۋ قۇرامى دا جوق. شىعىندار ءبارىمىزدىڭ قالتامىزدان تولەنەدى, ەسەپ-شوت كەلگەن كەزدە ويلانباستان تولەي سالامىز. ءار ءۇي, ءار وتباسى وسى ەسەپ-شوتتاردى تولەپ كەلەدى. ينۆەستيتسيالىق تاريفتەردى كوتەرۋگە دە كەلىسىپ وتىرمىز, دەگەنمەن ينۆەستيتسيالارعا جۇيەلى باقىلاۋ دا, ولاردىڭ قايتىمى مەن تيىمدىلىگى دە جوق», دەپ اتاپ ءوتتى د.نازارباەۆا.
سەنات باسشىسى سونىمەن قاتار ءبىزدىڭ ەلىمىزدەگى كومىر مەن گازدى پايدالانۋ ماسەلەسىن دە كوتەردى. ء«بىزدىڭ ماڭىزدى ساۋالىمىز – كومىر شاحتالارى نە بولادى؟ مەملەكەت قازىرگى كەزدە ەكسپورتقا شىعاتىن گازدان جاقسى ديۆيدەندتەر تاۋىپ وتىر. ىشكى نارىقتا پايدالانۋ كەزىندە كومىر مەن گاز اراسىندا تەپە-تەڭدىك بولۋى ءتيىس جانە كومىرگە نەگىزدەلگەن ەنەرگەتيكا ەكولوگيالىق تازا بولۋى ءارى قاراي دا پايدا اكەلۋى, ال كومىر شاحتالارىنداعى جۇمىسشىلار جۇمىسىن جوعالتپاۋى ءۇشىن كومىر بار جەردە قازىرگى زامانعى جاڭا تەحنولوگيالاردى ەنگىزۋ قاجەت. بۇل ۇلكەن ماسەلە, بىراق ول ەش جەردە كوتەرىلمەي كەلەدى», دەدى د.نازارباەۆا.
سەنات توراعاسى كەزدەسۋدى قورىتىندىلاي كەلىپ, ايتىلعان بارلىق ۇسىنىستاردىڭ جيناقتالاتىنىن جانە ولار بويىنشا ۇنەمى جۇمىس جۇرگىزىلەتىنىن اتاپ ءوتتى.
