پارلامەنت • 19 اقپان، 2020

ءماجىلىس جۇمىسىن كوپبالالى وتباسىلاردى الەۋمەتتىك قولداۋ تۋرالى قۇجاتپەن باستادى

309 رەتكورسەتىلدى

بۇگىن پالاتا سپيكەرى نۇرلان نىعماتۋليننىڭ توراعالىعىمەن ءماجىلىستىڭ جالپى وتىرىسى ءوتتى. وندا بىرقاتار راتيفيكاتسيالىق زاڭ جوبالارى ماقۇلداندى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.

ءماجىلىس كولىك قۇرالى پاسپورتىنىڭ جانە وزدىگىنەن جۇرەتىن ماشينا جانە تەحنيكانىڭ باسقا دا تۇرلەرى پاسپورتىنىڭ بىرىڭعاي نىساندارىن ەنگىزۋ جانە ەلەكتروندىق پاسپورتتار جۇيەلەرىن ۇيىمداستىرۋ تۋرالى كەلىسىمگە ارمەنيانىڭ قوسىلۋى تۋرالى حاتتامانى راتيفيكاتسيالاۋ تۋرالى زاڭ جوباسىن قاراۋ بارىسىندا وزەكتى ماسەلەلەردى كوتەردى.

كولىك قۇرالدارىنىڭ ەلەكتروندىق پاسپورتتارىن ەنگىزۋ تۋرالى قولدانىستاعى كەلىسىم 2014 جىلى قابىلدانعان جانە 2015 جىلى قازاقستان راتيفيكاتسيالاعان.

حاتتامامەن ارمەنيا كەلىسىمگە قوسىلىپ، ەلەكتروندىق پاسپورتتار جۇيەسىن ەنگىزۋ بويىنشا مىندەتتەمەلەردى وزىنە الادى. كەلىسىم ەۋرازيالىق ەكونوميكالىق وداق مەملەكەتتەرىنىڭ اۋماعىندا شىعارىلعان جانە تىركەۋگە جاتاتىن كولىك قۇرالدارىنا جانە تەحنيكانىڭ باسقا دا تۇرلەرىنە بەرىلەتىن پاسپورتتىڭ بىرىڭعاي نىساندارىن، ونىڭ ىشىندە ەلەكتروندىق نىساندارىن قولدانۋ ءۇشىن جاعداي جاساۋعا ىقپال ەتەدى.

ەۋرازيالىق ەكونوميكالىق كوميسسيا القاسى بۇل جۇيەنى 2019 جىلدىڭ 1 قاراشاسىنان باستاپ ەاەو اۋماعىندا ەنگىزۋگە شەشىم قابىلدادى. الايدا، 2015 جىلدان بەرى ءتورت جىل ۋاقىت وتسە دە، ەلەكتروندى كولىك قۇرالدارىنىڭ تولقۇجاتتار جۇيەسى ءالى ەنگىزىلگەن جوق.

وسىعان وراي، بۇل ەاەو-تا اۆتوكولىك ساتىپ الاتىن ءاربىر ازاماتقا قاتىستى ەكەنىن اتاپ وتكەن ءماجىلىس توراعاسى نۇرلان نىعماتۋلين ەاەو ەلدەرىمەن دەرەكتەر الماسۋدىڭ جەدەل ءارى تولىق بولۋى ءبىز ءۇشىن وتە ماڭىزدى ەكەنىن اتاپ ءوتتى.

پالاتا سپيكەرى بۇل ىشكى ىستەر ورگاندارى جۇرگىزەتىن ۋاقتىلى تىركەۋگە، مەملەكەتتىك كىرىستەر كوميتەتىنىڭ ورگاندارىنا سالىق سالۋعا مۇمكىندىكتەر بەرەتىنىن، اتالعان ماسەلەلەردى شەشۋگە ۋاكىلەتتىك بەرىلگەن مەملەكەتتىك قىزمەتشىلەردىڭ جۇمىسىنا نازار اۋداردى.

سونىمەن قاتار وتىرىستا دەپۋتاتتار تاراپىنان قولداۋ تاپقان قازاقستان مەن اقش اراسىنداعى كونسۋلدىق ارتىقشىلىقتار مەن يممۋنيتەتتەر تۋرالى كەلىسىمدى راتيفيكاتسيالاۋ تۋرالى زاڭ جوباسى. ونىڭ ماقساتى - كونسۋلدىق مەكەمەلەردى، لاۋازىمدى ادامدار مەن قىزمەتشىلەر جانە ولاردىڭ وتباسى مۇشەلەرىن قورعاۋدى كۇشەيتۋ بولىپ تابىلادى.

كەلىسىمگە سايكەس تاراپتار كونسۋلدىق لاۋازىمدى ادامدارى مەن ولاردىڭ وتباسى مۇشەلەرىنە ديپلوماتيالىق قاتىناستار تۋرالى ۆەنا كونۆەنتسياسىنا سايكەس ديپلوماتيالىق اگەنتتەرگە جانە ديپلوماتيالىق اگەنتتىڭ وتباسى مۇشەلەرىنە بەرىلەتىن ارتىقشىلىقتار مەن يممۋنيتەتتەرگە، بالامالى ارتىقشىلىقتار مەن يممۋنيتەتتەر بەرەدى.

سونداي-اق كونسۋلدىق مەكەمەلەردىڭ ءۇي-جايلارى مەن مۇلكى، ونىڭ ىشىندە كولىك قۇرالدارى دا ديپلوماتيالىق قاتىناستار تۋرالى ۆەنا كونۆەنتسياسىنىڭ 22-بابىنا سايكەس ديپلوماتيالىق وكىلدىكتەر سياقتى قورعالادى. جالپى وتىرىستا قازاقستان مەن وزبەكستان اراسىنداعى ەڭبەكشى كوشىپ-قونۋشىلاردىڭ قۇقىقتارىن قورعاۋ تۋرالى زاڭ جوباسى ماقۇلداندى.

كەلىسىم قازاقستاننىڭ ەڭبەك جانە حالىقتى الەۋمەتتىك قورعاۋ مەن وزبەكستاننىڭ جۇمىسپەن قامتۋ جانە ەڭبەك قاتىناستارى مينيسترلىكتەرى اراسىندا ازاماتتاردى جۇمىسقا ورنالاستىرۋ ماسەلەلەرى، ونىڭ ىشىندە ەكى ەل ازاماتتارى ءۇشىن بوس ورىندار بويىنشا ءوزارا ءىس-قيمىل جاساۋدى جانە وزەكتى اقپارات الماسۋدى كوزدەيدى.

سونىمەن قاتار بۇگىن ءماجىلىستىڭ سالالىق كوميتەتتەرى انا مەن بالانى قورعاۋ جانە اۋديتورلىق قىزمەت ماسەلەلەرى تۋرالى زاڭ جوبالارىن جۇمىسقا الدى.

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار