ايماقتار • 19 اقپان، 2020

جامبىل وڭىرىندە جۇيەلى جۇمىستار جۇرگىزىلەدى

26 رەتكورسەتىلدى

جامبىل وبلىسىنىڭ اكىمى بەردىبەك ساپارباەۆ «كونە تاراز» تاريحي-ەتنومادەني كەشەنىنىڭ «كورمە» پاۆيلونىندا جامبىلدىق تۇرعىندارمەن كەزدەسىپ، ەسەپ بەردى. وتكەن جىلدى قورىتىندىلاپ، وڭىردە الداعى ۋاقىتتا اتقارىلاتىن جۇمىستاردىڭ جوسپارلارىمەن ءبولىستى.

بەردىبەك ساپارباەۆ 2020 جىلى جامبىل وبلىسىندا جالپى قۇنى 114 ميلليارد تەڭگە بولاتىن 18 ينۆەستيتسيالىق جوبانى ىسكە اسىرۋ جوسپارلانۋدا ەكەنىن ايتتى. سونىمەن قاتار، ءتيىمدى ينۆەستيتسيالىق ساياسات اعىمداعى جىلدىڭ قورىتىندىسى بويىنشا ونەركاسىپتىڭ 5 پايىزدىق ءوسىمىن قامتاماسىز ەتۋگە مۇمكىندىك بەرەتىنىن جەتكىزدى. ەڭ ۇلكەن قۋاتتى جوبالاردى «ەۆروحيم مينەرالدى تىڭايتقىشتار»، «قازفوسفات»، «Qazaq soda»، «KORSEM» جانە «TALAS INVESTMENT COMPANY» كومپانيالارى جۇزەگە اسىرادى. «2025 جىلعا دەيىن جالپى قۇنى 2،7 تريلليون تەڭگە بولاتىن 66 جوبا ىسكە اسىرىلادى، سول ارقىلى 11،4 مىڭ جاڭا جۇمىس ورنىن قۇرۋ كوزدەلۋدە»، دەدى اكىم.

جيىندا اكىم جەرگىلىكتى بيلىكتىڭ كۇن تارتىبىندە «تاراز «حيمپارك» ارنايى ەكونوميكالىق ايماعىن دامىتۋ مىندەتى تۇرعانىن، ونى شەشۋ ءۇشىن جەتى جوبانى ىسكە اسىرۋعا 648،3 ميلليارد تەڭگە كولەمىندە ينۆەستيتسيا تارتىلاتىنىن، بۇل ناتيجەسىندە ەكى مىڭنان استام جاڭا جۇمىس ورنىن اشۋعا مۇمكىندىك بەرەتىنىن جەتكىزدى. «وڭدەۋشى ونەركاسىپتى دامىتۋ ماقساتىندا 12 كاسىپورىن جاڭعىرتىلادى، تاعى تورتەۋى زاماناۋي يننوۆاتسيالىق تەحنولوگيالاردى ەنگىزەدى. وبلىس تۇرعىندارىنىڭ 60 پايىزدان استامى اۋىلدىق جەرلەردە تۇراتىن ايماقتىڭ ەرەكشەلىگىن ەسكەرسەك، اگرارلىق سەكتوردى دامىتۋعا بارىنشا كوڭىل ءبولۋدىڭ ماڭىزدىلىعى جوعارى. جوسپارلانعان ينۆەستيتسيادان باسقا، سالانىڭ مۇقتاجدىقتارى ءۇشىن 21 ميلليارد تەڭگە كولەمىندە سۋبسيديا بولىنەدى. اعىمداعى جىلدىڭ باستى مىندەتتەرىنىڭ ءبىرى – ەگىستىك القاپتارىن 705 مىڭ گەكتارعا، ال سۋارمالى جەر كولەمىن 8 000 گەكتارعا كەڭەيتۋ»، دەدى بەردىبەك ساپارباەۆ.

ءوز سوزىندە اكىم ەگىس القاپتارىن رەنتابەلدى، مايلى جانە بۇرشاقتى داقىلدارمەن ءارتاراپتاندىرۋ، جەرگىلىكتى قانت زاۋىتتارىن بارىنشا جۇمىلدىرۋ ءۇشىن قىزىلشا شارۋاشىلىعىن دامىتۋعا كوڭىل ءبولۋ قاجەتتىگىن دە ايتتى. تاعى ءبىر ماسەلە، نەگىزگى باعىتتاردىڭ ءبىرى رەتىندە پايدالانۋسىز جاتقان 70 مىڭ گەكتار جەردى ەگىستىك جەر رەتىندە اينالىمعا ەنگىزۋدى، مەحانيكالاندىرىلعان جاساقتىڭ كومەگىمەن القاپتاردى سۋلاندىرۋ جەلىلەرى مەن كانالدارىن، 5 سۋ قويماسىن رەتكە كەلتىرۋدى، 5 000 گەكتارعا جاڭا سۋ ۇنەمدەۋ تەحنولوگيالارىن ەنگىزۋ كەرەكتىگىن دە جەتكىزدى. مۇنداعى نەگىزگى ماقسات – يمپورتتى تومەندەتۋ جانە ءوڭىردى جەرگىلىكتى ازىق-ت ۇلىكپەن قامتاماسىز ەتۋ.

وسى ماقساتتا جامبىل وبلىسىندا ىسكە اسىرىلىپ جاتقان اۋىل تۇرعىندارىنىڭ تابىسىن ارتتىرۋ ماقساتىنداعى پيلوتتىق جوبانىڭ بەرەرى مول. ول تەك جامبىل ءوڭىرى ءۇشىن عانا ەمەس، بۇكىل رەسپۋبليكا ءۇشىن دە ماڭىزدى. جوبانىڭ العاشقى قادامدارى جاسالىپ، 7886 اۋلا نەسيەگە قول جەتكىزسە، 194 اۋىلعا شارۋاشىلىعى تەحنيكاسى الىنعان. اكىم بۇل جۇمىستاردىڭ ارى قاراي جالعاساتىنىن ايتتى. جيىندا اۋىل تۇرعىندارىنىڭ ورتاشا تابىسىن 41،6 مىڭ تەڭگەدەن 104 مىڭ تەڭگەگە دەيىن ارتتىرۋ، ال 2،2 مىڭ شارۋانى ءوزىن-ءوزى جۇمىسپەن قامتىعاندار ساناتىنان جەكە كاسىپكەرلەر ساناتىنا اۋىستىرۋ ماسەلەسى دە ايتىلدى.

1

جامبىل وبلىسىندا جول ماسەلەسى دە كۇردەلى. دەگەنمەن، اعىمداعى جىلى جامبىل وبلىسى اۋماعىنداعى 692 شاقىرىم اۆتوموبيل جولدارىن جوندەۋ جوسپارلانۋدا ەكەن. بەردىبەك ساپارباەۆتىڭ ايتۋىنشا، 668 شاقىرىم اۆتوجول ورتاشا جوندەۋدەن ءوتىپ، 6،1 شاقىرىمدىق جول قايتا جاڭارتىلسا، 18 شاقىرىمدىق جاڭا جول سالىنادى. سونداي-اق، جولاۋشىلار تاسىمالىنىڭ ساپاسىن ارتتىرۋ ماقساتىندا 100 جاڭا اۆتوبۋس ساتىپ الۋ، ەلەكتروندى بيلەتتەۋ جۇيەسىن ەنگىزۋ دە جوسپارلانعان.

وسى ۋاقىتقا دەيىن تۇرعىندار ءۇشىن اۋىزسۋ ۇلكەن ماسەلە بولىپ كەلدى دەسەك، ەندى بيىلعى جىلى 70-تەن استام اۋىل اۋىزسۋمەن قامتاماسىز ەتىلەتىن بولدى. بۇل تۇرعىنداردى تازا اۋىزسۋمەن قامتاماسىز ەتۋ كورسەتكىشىن 57،3 پايىزدان 77 پايىزعا دەيىن جەتكىزۋگە مۇمكىندىك بەرەدى. سونداي-اق، وبلىس اكىمى 48 مىڭ تۇرعىنى بار 35 ەلدى مەكەندى گازداندىرۋ جۇمىستارىنىڭ جۇرگىزىلەتىنىن دە جەتكىزدى. سونىمەن قاتار، بيىل وبلىس اۋماعىندا بالامالى ەنەرگيا كوزدەرىن وندىرەتىن ءتورت ستانتسيانى ىسكە قوسۋ جوسپارلانىپ وتىر. تاعى ءبىر جاعىمدى جاڭالىق، اعىمداعى جىلى جامبىل وبلىسىندا 14 جاڭا مەكتەپ سالىنىپ، 3 ورىن تاپشىلىعى بار، 1 اپاتتى جانە 1 ءۇش اۋىسىمدى مەكتەپتىڭ ماسەلەلەرىن شەشۋ جوسپارلانۋدا. بيىل 285 مەكتەپ جىلى سانيتارلىق جۇيەلەرمەن  جابدىقتالاتىن بولادى. ناتيجەسىندە بۇل ماسەلە وبلىس مەكتەپتەرىنىڭ بارىندە دە شەشىلەدى. سونداي-اق، بارلىق مەكتەپتەر بەينەباقىلاۋ جۇيەسىمەن قامتىلادى. سونىمەن قاتار، دەنساۋلىق ساقتاۋ سالاسىندا 18 جەدەل جاردەم كولىگىن ساتىپ الۋ، مەديتسينالىق جابدىقتاۋ دەڭگەيىن 92 پايىزعا جەتكىزۋ، مىندەتتى الەۋمەتتىك مەديتسينالىق ساقتاندىرۋدى ەنگىزۋ بويىنشا بەلسەندى جۇمىستاردى جالعاستىرۋ جوسپارلانۋدا. جانە وڭىردە 91 سپورت الاڭشاسى سالىنادى. 1200-دەن استام جاسقا گرانت بەرىلىپ، جەڭىل اتلەتيكالىق جانە گيمناستيكالىق مانەجدەرىنىڭ قۇرىلىسى باستالادى.

جامبىل وبلىسىنىڭ اكىمى بەردىبەك ساپارباەۆ جاڭا قىزمەتىنە كىرىسكەن العاشقى كۇندەردە-اق اكىمدىك عيماراتىندا اپپارات جيىنىن وتكىزىپ، جيىندا اكىمدەردىڭ ەسەبىنە مەملەكەتتىك قىزمەتشىلەردىڭ ەمەس، قاراپايىم حالىقتىڭ قاتىسۋى كەرەكتىگىن ايتقان بولاتىن. اكىمنىڭ العاشقى ەسەپتى كەزدەسۋىنە مىڭعا تارتا ادام جينالدى. بۇدان كەيىن كوپشىلىك بەردىبەك ساپارباەۆقا ساۋالدارىن جولداپ، بىرقاتار ماسەلەلەردى كوتەردى. تۇرعىنداردىڭ دەنى نەگىزىنەن تۇرعىن ءۇي، جول سالۋ، اۋىزسۋ، گاز تارتۋ ماسەلەلەرىن ايتتى. شۋ اۋدانىنىڭ تۇرعىنى تۇرسىنباي ابدۋللاەۆ شۋ ۆوكزالىنان كۇنىنە 40 شاقتى پويىزدىڭ وتەتىنىن، الايدا كەلەسى جولعا جەتۋ اسىرەسە قارت كىسىلەر ءۇشىن قيىن ەكەنىن ايتىپ، اكىمنەن وسى ماسەلەنى شەشىپ بەرۋىن سۇرادى. جامبىل اۋدانىنىڭ تۇرعىنى جامبىل بايماحانوۆ جەرلەردى جەكەمەنشىكتەن قايتارىپ الۋ ماسەلەسىن كوتەرسە، مويىنقۇم اۋدانىنان كەلگەن جامبىل اعىباەۆ تالاس گازىنىڭ مويىنقۇم مەن تالاس اۋداندارىنىڭ ورتالىعىنان شىعىپ جاتقانىن، الايدا ءالى كۇنگە دەيىن مويىنقۇم اۋدانىندا كوگىلدىر وتىن جوق ەكەنىن جەتكىزدى. ال، بايزاق اۋدانىنىڭ تۇرعىنى ساحا ماناتوۆ بايزاق، مەركى، شۋ اۋداندارىنان 102 شارۋانىڭ قانت قىزىلشاسىنىڭ ماسەلەسىمەن قالاعا كەلگەنىن ايتىپ، قانت قىزىلشاسىن ەگۋشىلەرگە قولداۋ بولسا دەگەن  نيەتىن جەتكىزدى. سونىمەن قاتار، تاراز قالاسىنىڭ تۇرعىنى دوسجان ناربەكوۆ «كوكتەم» تۇرعىن القابىندا وسىدان 5 جىل بۇرىن ءوز اقشامىزبەن جارىق تارتتىق. ەندى ولاردىڭ باعانالارى قۇلاپ جاتىر. القاپتا سۋ دا جوق»، دەپ بەردىبەك ساپارباەۆتان وسى ماسەلەلەرگە نازار اۋدارۋىن سۇرادى.

تۇرعىنداردى تىڭداعان بەردىبەك ساپارباەۆ كوپشىلىكتىڭ كوتەرگەن ماسەلەسىنە زەردەلەۋ جۇمىستارى جۇرگىزىلەتىنىن، ەشقانداي ماسەلە نازاردان تىس قالمايتىنىن ايتىپ، جامبىل وڭىرىندە الداعى ۋاقىتتاردا دا جۇيەلى جۇمىستاردىڭ جۇرگىزىلەتىنىن جەتكىزدى. ال، كوپشىلىكتىڭ «كوپبالالى انالارعا باسپانا سالىپ بەرۋ ماسەلەسى جالعاسىن تابادى ما؟» دەگەن ساۋالىنا اكىم «كوپبالالى انالاردى قولداۋ ءۇشىن بۇل جۇمىستاردى جالعاستىرامىز»، دەپ جاۋاپ بەردى.

 

جامبىل وبلىسى

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار