قوعام • 19 اقپان، 2020

ينكليۋزيۆتى قوعام قۇرۋ ءۇشىن...

25 رەتكورسەتىلدى

قازىرگى كەزدە اقتوبە ايماعىندا ەستۋ مەن سويلەۋ قابىلەتتەرى قالىپتى دەڭگەيدەن تومەن بالالاردى ساۋىقتىرۋ مەن وڭالتۋعا قاتىستى كەشەندى شارالار شوعىرى جۇزەگە اسىپ كەلەدى.اقتوبە وبلىستىق ءبىلىم باسقارماسىنان الىنعان دەرەكتە  وڭىردە ەرەكشە ءبىلىم بەرۋدى قاجەت ەتەتىن 6370 بالا بار ەكەنى كورسەتىلگەن. سوندىقتان دا وسى ساناتتاعى قوعامنىڭ جاس مۇشەلەرى مەن اتا انالارىنا تەگىن كاسىبي كومەك كورسەتەتىن ارنايى ءبىلىم ماماندارىنا دەگەن سۇرانىس جىلدان-جىلعا وسە تۇسۋدە.

بۇل تۇرعىدا پەداگوگيكالىق-پسيحولوگيالىق تۇرعىداعى تۇزەۋ كابينەتتەرىنىڭ تيگىزەر كومەگى مەن پايداسى مول ەكەنى حاق. بۇل باعىتتاعى ارناۋلى وقۋ ورىندارى وبلىستىڭ بارلىق اۋداندارىندا قىزمەت جاسايدى. اقتوبە وبلىسىنىڭ اكىمى وڭداسىن ءورازاليننىڭ پايىمداۋىنشا مۇنداي كابينەتتەر ، ايرىقشا بالالارعا ارنالعان  ءبىلىم بەرۋ ينتەگراتسياسى شەڭبەرىندەگى  باستى ءارى ماڭىزدى قۇرالداردىڭ ءبىرى.

وڭىردە دەربەس جۇمىس جاساۋدى قاجەت ەتەتىن الەۋمەتتىك ءرولى جوعارى، كەدەرگىسىز اۋماقتاردى قۇرۋ ىسىنە  جۇرەگىننىڭ جىلۋى مول جاندار مەن قايىرىمدىلىق قورلارى دا قول ۇشىن سوزىپ وتىر. وسى ورايدا اقتوبە قالاسىندا قوس بىردەي پسيحولوگيالىق-پەداگوگيكالىق تۇزەۋ كابينەتىن اشۋعا «دارا»  قورى ۇيىتقى بولا بىلگەنى ءبىر مەرەي.

ء«ار الۋان، بىراق تەڭ: قازاقستاندا ينكليۋزيۆتى قوعامدى قۇرۋ»  جوباسى اياسىندا اشىلعان ارناۋلى كابينەتتەردىڭ ىسكە قوسىلۋى بۇل تۇرعىدا جەرگىلىكتى اتقارۋشى ورگاندارعا ءتۇسىپ وتىرعان سالماق پەن جۇكتەمەنى ازايتۋعا سەپتىگىن تيگىزگەنى انىق. مۇنداي يگى ىسكە جۇمىلا بىلگەندەردىڭ قاتارىندا «EastTardeSolutons» جشس-دا بار ەكەنىن ايتا كەتۋ پارىز. ەندەشە وسىنداي قايىرىمى مەن ساۋابى مول ءىستىڭ باسى-قاسىندا جۇرگەن گۇلنار دوسانوۆا مەن راحمەت دارمەشتىڭ باستامالارى قانداي قۇرمەتكە دە لايىقتى بولسا كەرەك.

اتالعان تۇزەۋ كابينەتتەرىنە «دارا» قورى قاراجاتىنىڭ ەسەبىنەن بۇگىنگى زامانعا ساي ارنايى جابدىقتار مەن قوندىرعىلار ساتىپ الىنعان. بۇعان قوسا 2019 جىلدىڭ اقپان ايىندا اشىلعان كەيىنگى تۇزەۋ كابينەتىنە كۇردەلى جوندەۋ جۇرگىزىلىپ، ەرەكشە بالالاردىڭ تۇتىنۋ قاجەتتىلىگىنە قاراي ورايلاستىرىلعان. مۇندا ەمدەۋ-دەنە شىنىقتىرۋ ساباعىنا ارنالعان جيناق، مونتەسسوري بولمەسى، سويلەۋ مەن ەستۋ قابىلەتىن دامىتۋعا ارنالعان كومپيۋتەرلىك باعدارلاما  جۇمىس ىستەيدى. سونىمەن قاتار بالامالى بايلانىس تاسىلدەرى، ديداكتيكالىق جانە كورنەكى ماتەريالدار بار.

-مۇندا بىلىكتى مامانداردىڭ بالالارمەن جەكە جانە توپتىق ساباقتار جۇرگىزۋىنە بارلىق جاعدايلار تۋعىزىلعان. كەشەندى شارالارمەن شۇعىلداناتىن كوماندانىڭ قاتارىندا پسيحولوگتار مەن پەداگوگ-دەفەكتولوگتار، جانە لوگوپەدتەر بار، -  دەدى بۇل جونىندە اقتوبە وبلىستىق ءبىلىم باسقارماسىنىڭ ءبولىم باسشىسى قايرات الدامجاروۆ.

اقتوبە قالاسىندا كەيىننەن اشىلعان پەداگوگيكالىق-پسيحولوگيالىق تۇزەۋ كابينەتى ەرەكشە ءبىلىم بەرۋدى قاجەتسىنەتىن 150 بالاعا ارنالعان. بۇل مولشەر مۇمكىن اۋىز تولتىرىپ ايتۋعا تۇرارلىقتاي بيىك مەجە دە بولماس. ايتسە دە وسى ارقىلى اقتوبەدە ينكليۋزيۆتى قوعام قۇرۋ شەڭبەرىندە تاعى ءبىر لايىقتى قادام جاسالدى دەۋگە تولىق نەگىز بار.

 

اقتوبە

سوڭعى جاڭالىقتار

ۇقساس جاڭالىقتار