- بىلتىر وبلىستا «نۇرلى جەر», «7-20-25», «باقىتتى وتباسى» مەملەكەتتىك باعدارلامالارى بويىنشا جۇرگىزىلگەن جۇمىستىڭ ناتيجەسىندە 2443 وتباسى باسپانالى بولدى. ونىڭ ىشىندەگى 1779 وتباسى الەۋمەتتىك جاعىنان از قامتىلعان توپقا جاتادى. جالپى وتكەن جىلى وبلىستا كوپ بالالى جانە از قامتىلعان وتباسىلاردى تۇرعىن ۇيمەن قامتۋعا 40 ميلليارد تەڭگە بولىنسە, بيىل بۇل ماقساتقا بيۋدجەتتەن 59 ميلليارد تەڭگە قاراستىرىلىپ وتىر. ءۇي كەزەگىنە تىركەلگەن تۇرعىندار اراسىندا 5527 كوپبالالى وتباسى جانە 20 مىڭ الەۋمەتتىك قولداۋعا مۇقتاج ادام بار, دەدى ەسەپتى بايانداماسىندا ايماق باسشىسى اماندىق باتالوۆ.
ياعني, وبلىستا تۇرعىن ءۇي قۇرىلىسى بيىل دا قارقىن الماق. وسى ماقساتتا 32, 6 ميلليارد تەڭگە قارجى ءبولۋ كوزدەلگەن. بۇل – ارعى جىلعا قاراعاندا 1,6 ەسەگە ارتىق. ال بولىنگەن قاراجات تۇرعىن ءۇي سالۋعا جانە ينجەنەرلىك ينفراقۇرىلىمدى جۇرگىزۋگە جۇمسالماق. قازىر جالپى اۋماعى 939 000 شارشى مەتر تۇرعىن قۇرىلىسى باستالعان. ونىڭ 147,7 شارشى مەترى «نۇرلى جەر» باعدارلاماسىنىڭ ەنشىسىندە. ناتيجەسىندە بارلىق باعىت بويىنشا 3600 وتباسىن باسپانامەن قامتۋ مۇمكىندىگى تۋادى. وسى لەكپەن 2400 كوپ بالالى جانە از قامتىلعان وتباسىعا دا تۇرعىن ءۇي الۋ باقىتى بۇيىراتىن بولادى.
ايتپاقشى, باسپانا مۇقتاجدىعىن شەشۋگە مەتسەناتتار دا مىقتاپ كىرىسە باستاعان ەكەن. الماتى وبلىسىنداعى بيزنەستىڭ الەۋمەتتىك جاۋاپكەرشىلىگى اياسىندا كوپ بالالى جانە از قامتىلعان وتباسىلارعا باسپانا ساتىپ اپەرۋ ءىسى كوپكە ۇلگى بولىپ وتىر. وتكەن جىلى قايىرىمدى جاندار جەكە قارجىسىنا 170 باسپانا ساتىپ الىپ, مۇقتاج وتباسىلارىنا تارتۋ ەتكەن بولاتىن.
ال جاقىندا وسىنداي قۋانىشقا قاپشاعايلىق 30 وتباسى كەنەلدى. قاپشاعاي قالاسىندا «7-20-25» باعدارلاماسى بويىنشا سالىنعان «Teniz Towers» تۇرعىن ءۇي كەشەنى قولدانىسقا بەرىلگەن ەدى. جەتپىس پاتەردەن تۇراتىن جاڭا كەشەن وڭىردەگى باسپانا مۇقتاجدىعىن شەشۋگە باعىتتالعان ەڭبەكتىڭ جەمىسى. وسى تۇرعىن ءۇي كەشىنەن 30 پاتەردى جەكە قارجىسىنا ساتىپ العان بەلگىلى كاسىپكەرلەر – بولات ابىلەۆ پەن وراز جاندوسوۆ جاڭا ۇيلەردى مۇقتاج جاندارعا سىيعا تارتتى.
الماتى وبلىسى
