وبلىس اكىمى اماندىق باتالوۆ تۇرعىندارمەن كەزدەسۋ بارىسىندا مۇنداي ماسەلەنىڭ بارىن مويىندادى. قازىر ايماقتاعى «جەدەل جاردەم» قىزمەتىنىڭ وكىلدەرىنە ءوز مىندەتتەرىن مۇلتىكسىز اتقارۋ ءۇشىن 70 كولىك قاجەت. جانە العاشقى مەديتسينالىق كومەكتىڭ تيىمدىلىگىن ارتتىرۋ ءۇشىن كولىكپەن قاتار كەرەك-جاراعى ساي بىلىكتى مامانداردىڭ دا قاتارى كوبەيۋى ءتيىس.
-اۋدان اكىمدەرىنىڭ ەسەپ بەرۋى كەزىندە ەڭ كوپ شاعىم ايتىلعان ماسەلەنىڭ ءبىرى «جەدەل جاردەم» قىزمەتىنە قاتىستى بولدى. بۇل جاعداي حالىق كوپ شوعىرلانعان اۋداندارعا قيىن ءتيىپ تۇرعانى راس. ءبىزدىڭ ەسەبىمىز بويىنشا, ءبىر بريگاداعا 10 مىڭ ادامنان كەلەدى ەكەن. ياعني, «جەدەل جاردەم» بريگادالارىنىڭ سانىن كوبەيتىپ, قىزمەتتىڭ ساپاسىن جاقسارتۋعا كۇش سالامىز. ءبىرىنشى كەزەكتە كولىك تاپشىلىعىن شەشەمىز. قازىر رەسپۋبليكالىق بيۋدجەت ەسەبىنەن 35 كولىك ساتىپ الۋعا قارجى ءبولىندى. قالعان 35 كولىكتى وبلىستىڭ قاراجاتىنا الىپ جاتىرمىز, - دەدى ايماق باسشىسى.
جالپى, وبلىستىڭ دەنساۋلىق ساقتاۋ سالاسىندا كادر تاپشىلىعى قاتتى سەزىلىپ وتىر. وبلىس اكىمىنىڭ ەسەبىندە ايتىلعانداي, ايماقتا 214 مامانعا سۇرانىس بار ەكەن. ونىڭ ىشىندە 126 جالپى تاجىريبە دارىگەرى جەتىسپەيدى. وبلىس تاراپىنان كادر تاپشىلىعىن شەشۋ ءۇشىن دارىگەر دايىندايتىن جوعارعى وقۋ ورىندارىمەن تىعىز بايلانىس جاسالىپ جاتىر. قاجەتتى ماماندى وقىتۋ ءۇشىن وبلىستىق بيۋدجەتتەن 18 ميلليون تەڭگە قارجى قارالىپتى. بيىلدان باستاپ 47 جاس دارىگەر جوعارعى مەديتسينالىق ءبىلىم بەرەتىن وقۋ ورىندارىن ءتامامداپ, وبلىستىڭ اۋداندارىندا جۇمىسقا كىرىسپەكشى.
-مەديتسينا سالاسىنداعى مامان تاپشىلىعىنىڭ ءبىر ۇشى جاس دارىگەرلەردى باسپانامەن قامتۋعا تىرەلەدى. اسىرەسە, اۋدان ورتالىقتارى مەن اۋلىدارعا بارعان جاس ماماننىڭ تۇراقتاپ قالۋىنا جاعداي جاساۋىمىز كەرەك. بيىل ءبىرىنشى كەزەكتە جالپى تاجىريبە دارىگەرىلەرىن تۇرعىن ۇيمەن قامتۋعا كىرىسەمىز. ولارعا ارناپ بارلىق اۋدان مەن قالادان 126 پاتەر ساتىپ الۋدى باستادى. بۇل ماقساتقا 756 ميلليون تەڭگە بولدىك, - دەدى ءوز سوزىندە اماندىق باتالوۆ.
الماتى وبلىسى
