«تاعايىندالعان كۇننەن باستاپ قالادا جول, مەكتەپتەر, اۋرۋحانالار, بالاباقشالار, ەمحانالار سالۋ, ساياباقتار,باقشالار, قوعامدىق دەمالىس ايماقتارىن قۇرۋ ءۇشىن بوس جەرلەردىڭ جەتىسپەيتىندىگىن اڭعاردىم. سوندىقتان مەن ورتالىق الدىنا پروبلەمالىق نەسيەلەر قورى كەپىلدىگىندەگى جەرلەردى قالانىڭ قاراماعىنا بەرۋ ماسەلەسىن قويدىم», دەپ ءتۇسىندىردى قالا اكىمى ب. ساعىنتاەۆ.
2019 جىلى 28 جەلتوقساندا قازاقستان رەسپۋبليكاسىنىڭ ۇكىمەتى «پروبلەمالىق كرەديتتەر قورى» اق جانە «Kazkom Reality» جشس جەرلەرىن الماتى قالاسىنىڭ كوممۋنالدىق مەنشىگىنە بەرۋ تۋرالى شەشىم قابىلدادى. بەرىلەتىن جەرلەردىڭ جالپى كولەمى 383,5 گا قۇرادى.
«بۇل جەرلەر قالا ءۇشىن ماڭىزدى الەۋمەتتىك جوبالاردى جۇزەگە اسىرۋ ءۇشىن عانا جۇمسالادى», دەپ اتاپ ءوتتى ب. ساعىنتاەۆ.
كوزدەلگەن اۋماقتاردىڭ ىشىندە رەكرەاتسيالىق جانە ساياباق ايماقتارىنا 166,34 گا ءبولىندى, ونىڭ ىشىندە 116,74 گا ىلە الاتاۋى تاۋىنىڭ ەتەگىنە كەلەدى, مۇندا باقىتجان ساعىنتاەۆتىڭ تاپسىرماسى بويىنشا العاش اشىلعان تاۋ لاندشافتى ساقتاپ قالۋعا كوڭىل ءبولىنىپ وتىر. قالا ورتالىقتارىن دامىتۋ ءۇشىن 7 بالاباقشا, 4 مەكتەپ, وقۋشىلار سارايلارى, ەمحانالار, مەتروپوليتەن, اۆتوۆوكزال سىندى الەۋمەتتىك نىسانداردىڭ قۇرىلىسىنا 87,44 گا جەر بولىنگەن. الەۋمەتتىك تۇرعىن ءۇي قۇرىلىسى 66,69 گا قۇرايدى. كولىك كوممۋنيكاتسياسىنا اكىمدىك 38,33 گا ءبولدى.
جالپى 2019 جىلدىڭ قورىتىندىسى بويىنشا جەر ماسەلەلەرى بويىنشا 6 693 وڭ شەشىم قابىلداندى, بۇل 2018 جىلعا قاراعاندا 2 ەسە كوپ.
سەيفۋللين/جانسۇگىروۆ كوشەلەرىندە كولىك ايرىعىن سالۋ ءۇشىن بۇزۋ قاراستىرىلعان 117 ءۇيدىڭ يەلەرىنە اباي داڭعىلىن كەڭەيتۋ ءۇشىن 59 ءۇيدىڭ مەنشىك يەلەرىنە وتەماقى تولەنگەن.
