الماتى وبلىسى: الەۋمەتتىك قورعاۋدىڭ الەۋەتى ارتتى

- ادامداردىڭ الەۋمەتتىك جاعدايىن جاقسارتۋ ءبىزدىڭ تىكەلەي مىندەتىمىز. اسىرەسە, مەملەكەت قولداۋىنا مۇقتاج جانداردى قامقورلىقسىز قالدىرمايمىز. وتكەن جىلى الەۋمەتتىك جاعىنان قورعاۋدى قاجەت ەتەتىن تۇرعىندار مەن كوپ بالالى وتباسىلارعا كومەك كورسەتۋ ءۇشىن وبلىستىڭ الەۋمەتتىك كارتاسىن جاسادىق. ول بويىنشا ارنايى ساناتقا جاتاتىن ادامدار ناقتى كومەك الدى, دەدى تۇرعىندارمەن وتكەن كەزدەسۋدە وبلىس اكىمى اماندىق باتالوۆ.

الەۋمەتتىك كارتادا ايقىندالعان مىندەتكە ساي, بىلتىردان بەرى الەۋمەتتىك كومەككە مۇقتاج وتباسىنان شىققان 42 مىڭ بالاعا مەكتەپتەر مەن بالاباقشالاردا ىستىق تاماق تەگىن بەرىلە باستادى. وسى ساناتقا كىرەتىن وتباسىلاردىڭ جاس مۇشەسىنە جوعارعى وقۋ ورىندارىندا ءبىلىم الۋ ءۇشىن 100 گرانت تاعايىندالعان. سونداي-اق 42 مىڭ وقۋىشى مەن ستۋدەنت جانە 8 000 كوپ بالالى انا قالاداعى قوعامدىق كولىكتە تەگىن ءجۇرىپ-تۇرۋدا. اۋماقتا از قامتىلعان اۋلەتتەردى كوگىلدىر وتىن جەلىسىنە تەگىن قوسۋ ءىسى دە جولعا قويىلدى, وتكەن جىلى 2277 ۇيگە گاز كىرگەن ەكەن. ال 22,6 مىڭ وتباسىنىڭ ۇيىنە ءيىس تيۋدەن ساقتاندىراتىن قوندىرعى بيۋدجەت قاراجاتى ەسەبىنەن ورناتىلىپتى.

وسى جەردە مۇمكىندىگى شەكتەۋلى جانداردى قولداۋعا باعىتتالعان شارالاردى ايتپاي كەتۋگە بولماس. قازىر وبلىستا 67 500 مۇگەدەك جان تۇرىپ جاتىر. بىلتىر جابىرقاۋلى جانداردى وڭالتۋ مەن باسقا دا ماسەلەلەردى شەشۋگە 3,7 ميلليارد تەڭگە قارجى بولىنگەن ەكەن. ناتيجەسىندە, تالدىقورعان قالاسى مەن ىلە, قاراساي, تالعار اۋداندارىنان مۇگەدەكتەردى وڭالتۋ ورتالىقتارى اشىلىپ, مۇمكىندىگى شەكتەۋلى بالالار ءۇشىن يگىلىكتى ءىس اتقارىلدى. بيىل بۇل باعىتتاعى جۇمىس جالعاسىن تاۋىپ, قارجىلىق قولداۋ ۇلعاياتىن بولدى. ەندى كومەككە مۇقتاج جانداردىڭ كەدەرگىسىز كەلەشەككە قادام باسۋى ءۇشىن قاجەت ىسكە 4,7 ميلليارد تەڭگە جۇمسالىپ, وڭالتۋ شارالارى 34 مىڭ ادامدى قامتىماقشى.

ايتپاقشى, ايماق بويىنشا اتاۋلى الەۋمەتتىك كومەك الاتىن وتباسىلار سانى ناقتىلانىپ, وسى ماقساتقا بولىنگەن بيۋدجەت قارجىسى ءبىرشاما ۇنەمدەلەتىن بولدى. مىسالعا, 2019 جىلى 257 500 ادامعا اتاۋلى جاردەماقى تولەنىپ, وعان 30,7 ميلليارد تەڭگە جۇمسالىپ كەلگەن ەدى. جاڭا جىلدان باستاپ بۇل ءتىزىم 144,1 مىڭ ادامدى قۇراپ, بەرىلەتىن جاردەماقى ءۇشىن 14,3 ميلليارد تەڭگە بولىنگەن ەكەن. ال 45 500 كوپبالالى وتباسىنىڭ مۇشەسى ءتيىستى جاردەماقى الىپ وتىر.