ونى اشىپ, جۇرگىزىپ وتىرعان ۋنيۆەرسيتەتتىڭ عىلىم جانە يننوۆاتسيالار جونىندەگى پرورەكتورى, تاريح عىلىمدارىنىڭ دوكتورى ا.ىبىراەۆا العاشقى ءسوزدى وبلىس اكىمىنىڭ اتىنان قۇتتىقتاۋ ايتۋ ءۇشىن اكىمنىڭ ورىنباسارى ر.الىشەۆكە بەردى. قۇتتىقتاۋدا ءوڭىردىڭ قازاق ونەرى, مادەنيەتى جانە ادەبيەتىنىڭ ورتالىعى بولعان ءبىر عاسىرلىق باسىلىم وبلىستىڭ تاريحي شەجىرەسى ەكەندىگى ايتىلدى جانە ونىڭ مەرەيتويىن كەڭ كولەمدە اتاپ ءوتۋ جاز ايلارىنىڭ بىرىنە قالدىرىلعانى بەلگىلى بولدى. كونفەرەنتسيادا بايانداما جاساعان فيلولوگيا عىلىمدارىنىڭ كانديداتتارى, الاشتانۋشىلار قايرات ساق پەن زارقىن تايشىباي «سولتۇستىك قازاقستان گازەتىنىڭ» قابىرعاسىندا قىزمەت ەتكەن ايتۋلى تۇلعالار, الاش قاھارماندارى تۋرالى زەرتتەۋلەرى تۋرالى تولعادى. سونىمەن قاتار ق.ساق ءوزىنىڭ سوزىندە ايماقتىق تىلشىلەر تۋرالى دا ايتىپ, ولاردىڭ وسى كۇنگە دەيىن زەرتتەلمەي جاتقاندىعىن اتاپ ءوتتى. ز.تايشىباي ءوزى تاپقان گازەتتىڭ تاريحي بەتتەرىندە بۇگىنگە دەيىن وزەكتىلىگىن جويماعان تالاي پروبلەمالاردى اۋىزعا الدى. كونفەرەنتسيادا وڭتۇستىك قازاقستان مەملەكەتتىك ۋنيۆەرسيتەتى كوللەدجىنىڭ ديرەكتورى, تاريح عىلىمدارىنىڭ دوكتورى سەيدەحان الىبەك ءوزىنىڭ بايانداماسىندا «سولتۇستىك قازاقستان گازەتىنىڭ» رەداكتورلارىنىڭ ءبىرى بولىپ, 1937-ءشى جىلعى رەپرەسسيانىڭ قۇربانى بولعان تۋىس اعاسى سەيىلبەك ۇسەن ۇلىنىڭ ءومىرى مەن شىعارماشىلىعىنان مول ماعلۇمات بەردى. سونداي-اق ل.ن.گۋميلەۆ اتىنداعى ەۇۋ-دىڭ قازاق ادەبيەتى كافەدراسىنىڭ دوتسەنتى قايىربەك كەمەڭگەر «سولتۇستىك قازاقستان گازەتى» باسشىلارىنىڭ ءبىرى بولعان اتاسى قوشكە كەمەڭگەر ۇلىنىڭ قىزىلجاردا قىزمەت ەتكەن جىلدارىنان زەرتتەۋ دەرەكتەرىن العا تارتتى. ماماندىعى دارىگەر بولعان بۇل اعامىز ناعىز سەگىز قىرلى, ءبىر سىرلى بولعاندىعى دا بەلگىلى بولدى. ءوزىنىڭ جازىپ, شىعارعان سەگىز كىتابىندا ول ادەبيەت, سىن, مەديتسينا, قوعام ءومىرى, اگرونوميا, ءتىپتى حيميا وقۋلىعىن دا شىعارعان ەكەن.
سونداي-اق كونفەرەنتسيا جۇمىسىنا جەرگىلىكتى عالىمدار, جۋرناليستەر ت.ب. قاتىسىپ, ءوڭىر ايناسى تۋرالى ءوز ويلارىن ورتاعا سالدى. رەسەيدىڭ ومبى قالاسىنان كەلگەن «ميراس» قازاق ءتىلى مەن مادەنيەتىن دامىتۋ جانە ساقتاۋ قورىنىڭ ديرەكتورى اسقار رايسوۆ پەن ديزاينەر, ساۋلەت ەسكەرتكىشتەرىنىڭ ساراپشىسى ي.ۆاحيتوۆ تا قازاق مادەنيەتىنىڭ تاريحى ءوز قالالارىنىڭ ارحيۆتەرى مەن قورلارىندا وتە مول ەكەندىگى تۋرالى اقپارات بەردى. جيىنعا قاتىسقان ۋنيۆەرسيتەت ستۋدەنتتەرى مەن مۇعالىمدەر بەلسەندى قىزىعۋشىلىق كورسەتىپ, وزدەرى ءۇشىن كوپ ماعلۇمات الىپ وتىرعانى كورىنىپ تۇردى. اسىرەسە, وقۋ ورنىنداعى جۋرناليستيكا بولىمىندە وقيتىن جاستاردىڭ قىزىعۋشىلىعى ەرەكشە ەكەندىگى سەزىلدى. ولاردىڭ اراسىنان كەيبىرى گازەتتىڭ مەرەيتويىنا ارناعان ولەڭدەرىن دە وقىپ بەردى. شارانى ۇيىمداستىرۋدا ۇلكەن بەلسەندىلىك كورسەتكەن «جۋرناليستيكا» كافەدراسىنىڭ مەڭگەرۋشىسى ايسۇلۋ شايكەنوۆانىڭ دا ەڭبەگى ەرەكشە ەكەنىن اتاپ ءوتۋ كەرەك.
كونفەرەنتسيا جۇمىسىن «سولتۇستىك قازاقستان گازەتىنىڭ» باسشىسى جاراسباي سۇلەيمەنوۆ قورىتىندىلاپ, ءىس شارانىڭ ۇيىمداستىرۋشىلارى مەن كەلگەن قوناقتارعا ريزاشىلىعىن ءبىلدىردى.
قىزىلجار
