ايماقتار • 19 اقپان، 2020

ونەر مۋزەيىندەگى وزگەشە كورمەلەر

25 رەتكورسەتىلدى

«راحمان قاينارى» شيپاجايىنىڭ اۋماعىندا تابيعات اياسىندا سۋرەت سالدى.

سوڭعى جىلدارى شىعىس قازاقستان ونەر مۋزەيىندە اتقارىلعان جۇمىستار لەگى از ەمەس. « ۇلى دالانىڭ پاليتراسى» حالىقارالىق پلەنەر-كورمەسى، ART-زامان جوباسى، «جاستار شىعارماشىلىعى» وبلىستىق بەينەلەۋ ونەرىنىڭ بايقاۋى، حاكىم ابايدىڭ 175 جىلدىق مەرەيتويىنا ارنالعان مادەني شارالار - وسى ونەر وشاعىندا جۇزەگە اسىرىلىپ كەلەدى. بۇل تۋرالى بىزگە مۋزەي ديرەكتورى بەكايىم ۇياباەۆا ايتىپ بەردى. 

 « ۇلى دالا پاليتراسى»

– بىلتىر 3-14 ماۋسىم ارالىعىندا وبلىستا « ۇلى دالا پاليتراسى» حالىقارالىق پلەنەر-كورمەسى وتكىزىلدى. بۇل شارا ايماق باسشىسى دانيال احمەتوۆتىڭ باستاماسىمەن «رۋحاني جاڭعىرۋ» باعدارلاماسى، « ۇلى دالانىڭ جەتى قىرى» ماقالاسى اياسىندا جانە جاستار جىلىنا وراي وتكىزىلدى. كورمەگە رەسەي، گەرمانيا، فرانتسيا، تۇركيا، قىرعىزستان، گرۋزيا، ليتۆا، ءازىربايجان، وزبەكستان ەلدەرىنەن جانە رەسپۋبليكانىڭ ءار تۇكپىرىنەن 20 تانىمال سۋرەتشى كەلدى. كورمەنىڭ ەرەكشەلىگى، قىلقالام شەبەرلەرى شىعىستىڭ ەڭ كوركەم جەرلەرىنىڭ ءبىرى – كاتونقاراعاي ۇلتتىق ساياباعىنداعى «راحمان قاينارى» شيپاجايىنىڭ اۋماعىندا تابيعات اياسىندا سۋرەت سالدى، - دەيدى بەكايىم ۇياباەۆا.

ونىڭ ايتۋىنشا، وبلىستا حالىقارالىق دەڭگەيدە ءبىرىنشى رەت وتكىزىلىپ وتىرعان كورمەنىڭ ماقساتى – شەتەلدىك جانە قازاقستاندىق سۋرەتشىلەردىڭ اراسىندا شىعارماشىلىق بايلانىس ورناتۋ. ايتا كەتەيىك، بىلتىر 13 ماۋسىمدا شىعىس قازاقستان ونەر مۋزەيىندە « ۇلى دالا پاليتراسى» حالىقارالىق سۋرەتشىلەر پلەنەرىنىڭ جۇزگە تارتا ەتيۋدتەرىنىڭ قورىتىندى كورمەسى اشىلدى. كورمە ونەر مۋزەيىنىڭ ءتورت زالىنا قويىلدى.

– قىلقالام شەبەرلەرى «جاستار» ساياباعىندا كوللەدج جانە ونەر مەكتەبىنىڭ وقۋشىلارىنا ارنالعان شەبەرلىك ساباقتارىن وتكىزدى. سونىمەن قاتار مۇندا جاستار جىلى اياسىنداعى «ART-جاستار» جوباسىنا قاتىسۋشىلاردىڭ جۇمىستارىن تاماشالادى. «جاستار ارباتى» جۇمىس ىستەدى. پلەنەر-كورمەنىڭ ارقاسىندا مۋزەي قورى جاڭا تۋىندىلارمەن تولىقتى،  – دەيدى مۋزەي ديرەكتورى.

                                                                   سۋرەتشى كوزىمەن

2019 جىلدىڭ 15 قاڭتارىندا مۋزەي قابىرعاسىندا «ART-جاستار» كورمەسى اشىلدى. الۋان ءتۇرلى بوياۋلارمەن ورنەكتەلگەن تۋىندىلار قازاق حالقىنىڭ اتا داستۇرىنەن سىر شەرتىپ تۇرعانداي.

– «ART-جاستار» كورمەسىنە جيىرما بەس تۋىندى قويىلدى. كورمەدەن زاماناۋي، كوركەمدىك مەكتەپتەردىڭ ستيلدىك ەرەكشەلىكتەرىن كورە الامىز. نيكولاي دولبيلكين 1958 جىلى «سىلاقشى قىز» بەينەسىن سالدى. قايسان قادىربەكوۆ، الەكساندر ماحنونىڭ تۋىندىلارى قازاقستاننىڭ 19 عاسىرداعى كەزەڭىن بەينەلەيدى. «قىز قۋ»، «قوشتاسۋ» قايتا قۇرۋ زامانىنان بەرى وڭىردە شىنايىلىق بەينەلەمەدەن ەرەكشەلەنەتىن ناعىز اۆانگارد پايدا بولدى. وعان دالەل – بولات يسين جانە يۋري نەگوداەۆتىڭ جۇمىستارى. تاۋەلسىزدىك زامانىنىڭ سۋرەتشىلەرى ەركىندىك دەڭگەيىمەن، تۇستەردى قابىلداۋداعى وزگەشە جۇيەلەرىمەن، قازاق حالقىنىڭ ۇلتتىق داستۇرلەرىنە كوڭىل بولۋىمەن ەرەكشەلەنەدى، – دەيدى ول.

كورمەلەر تەك وبلىس كولەمىمەن عانا شەكتەلىپ قالمايدى ەكەن. بىلتىر پاۆلودار وبلىستىق كوركەمسۋرەت مۋزەيىندە جىلجىمالى كورمە ۇيىمداستىرىلىپتى.

– كورمەگە قازاقستاندىق سۋرەتشىلەردىڭ 30-عا جۋىق كەسكىندەمە، گرافيكا، جانە گوبەلەن تەحنيكاسىندا سالىنعان تۋىندىلارى قويىلدى. مۇنداي مادەني شارالاردىڭ ەكى مۋزەيگە دە بەرەرى مول. تاجىريبە الماسۋىمىزعا زور مۇمكىندىك تۋدىرىپ وتىر. جوبا تەك ۇلى سۋرەتشىلەردىڭ تۋىندىلارىنا عانا ارنالعان جوق. جەرگىلىكتى قىلقالام شەبەرلەرىن دە قامتيدى. ونەر اتاۋلى جالپىعا ورتاق بولعاندىقتان ونداعى قۇندىلىقتار دا بارشامىزعا ورتاق،  – دەيدى ول.

ءبىر قۋانتارلىعى، مۋزەي باسشىلىعىنىڭ قولداۋىمەن ونەر يەلەرى ونەر مۋزەيىنىڭ نازارىنان تىس قالماۋدا. بۇلاي دەيتىنىمىز، 2019 جىلى سۋرەتشى ماعاۋيا امانجولوۆتىڭ، اعاش وڭدەۋ شەبەرى قاليبەك ايناجاروۆتىڭ تاعى باسقا ونەر يەلەرىنىڭ جەكە كورمەلەرى ۇيىمداستىرىلدى. بۇل ءۇردىس بيىل دا جالعاسىن تاپپاق. وبلىستىق مادەنيەت جانە قۇجاتتاما باسقارماسى مەن ونەر مۋزەيىنىڭ قولعا الۋىمەن «ART-جاستار» جوباسى اياسىنداعى وبلىستىق «جاستار شىعارماشىلىعى» بايقاۋى دا وتكىزىلگەن. كورمەگە 53 اۆتوردىڭ 111 شىعارماشىلىق جۇمىسى قويىلدى. تاعى ءبىر ايتا كەتەتىنى، جىر پاديشاسى فاريزا وڭعارسىنوۆا مەن قارىمدى قالامگەر ءابىش كەكىلباەۆتىڭ 80 جىلدىق مەرەيتويىنا وراي «اسىل جان، ابىز اعا» اتتى ادەبي سازدى كەش ءوتتى.  

                                                                        اباي الەمى

ونەر مۋزەيى ءۇشىن وسى جىلدىڭ اۋقىمدى شارالارىنىڭ ءبىرى – حاكىم ابايدىڭ 175 جىلدىعىنا وراي «عاسىرلاردى توعىستىرعان دانالىق» اتتى  كورمەنىڭ اشىلۋى بولدى. مۋزەي ديرەكتورىنىڭ سوزىنشە، بۇل كورمەنى ۇيىمداستىرۋداعى ماقسات – اباي قۇنانباي ۇلىنىڭ شىعارماشىلىعىن ناسيحاتتاۋ، ۇلى اقىن الەمىن بەينەلەۋ ونەرى ارقىلى دارىپتەۋ. مۋزەيدىڭ 2 زالىنا جالپى سانى 21 كارتينا قويىلعان. بەلگىلى بولعانداي، كورمە ناۋرىز ايىنىڭ ورتاسىنا دەيىن جالعاسادى. – بيىل اباي قۇنانباي ۇلىنىڭ مەرەيتويىنا وراي ء«بىز تانىعان اباي» اتتى حالىقارالىق پلەنەر كورمەسىن ۇيىمداستىرۋدى جوسپارلاپ وتىرمىز. ون سۋرەتشى - شەت مەملەكەتتەن، ونى ءوز ەلىمىزدىڭ قىلقالام شەبەرلەرى. سونىمەن بىرگە شاراعا فوتو سۋرەتشىلەر دە قاتىسادى. سۋرەتتەر ارقىلى ءبىز اقىننىڭ تۋعان جەرىنىڭ قۇدىرەتىن الەم ەلدەرىنە كورسەتە الامىز، – دەيدى مۋزەي ديرەكتورى.

قوسا كەتەتىنى، ونەر مۋزەيى حالىقارالىق پلەنەر كورمەسى اياسىندا «ەڭ ۇزدىك ۆولەنتيور» اتتى بايقاۋ ۇيىمداستىرۋدى جوسپارلاپ وتىر.

– بايقاۋدىڭ ماقساتى – جاستاردى مادەنيەت سالاسىنا باۋلۋ. سايىستىڭ شارتى بويىنشا 18-50 ارالىعىنداعى قاتىسۋشىلار سۋرەتشىلەرمەن بىرگە ءجۇرىپ، اباي الەمىن قازاق، اعىلشىن، ورىس تىلدەرىندە تانىستىرادى. سونىمەن قاتار، مامىر ايىندا «اتىراۋ كۇندەرى» كورمەسىن  وتكىزۋدى جوسپارلاپ وتىرمىز، – دەيدى ول.

ناۋرىز ايىندا ۇلى اقىننىڭ شىعارماشىلىعىنا ارنالعان سۋرەت كورمەسى اشىلماقشى. شارا «جاڭعىرۋ» بىرلەستىگىمەن بىرلەسە وتكىزىلمەك.

ءيا، وسىنداي مادەني وشاقتا ۇلىلارىمىز ۇلىقتالىپ، ونەرىمىز وركەندەپ جاتسا نەگە قۋانباسقا؟! بۇگىندە ونەر مۋزەيى دانالارىمىزدى دارىپتەۋدى مەكتەپ قابىرعاسىنان باستاپ كەتكەن. سوندىقتان بولار، كيەلى ورداعا كەلەتىن كورەرمەندەردىڭ دەنى جاستار. اتالمىش مەكەمە الدەقاشان تۇرعىنداردىڭ رۋحاني ورداسىنا اينالىپ ۇلگەرەدى.

 

تاۋنار قايرات

وسكەمەن

سوڭعى جاڭالىقتار

ۇقساس جاڭالىقتار